US CU TULUK NIH THEIHTER NAK A TUAH KO CANG HIH

US Cu Tuluk nih theihternak atuah pin ah fak ngaiin a tthuat tthan cang. Tuluk nih a timi cu US kan ram kongkau ah hin rak i thlak hlah tiah theihternak atuah. Hi konghe pehtlaiin Tuluk nih atimi cu HongKong caah phungle lam national security law hman dingmi ramchung kongkau a si caah rak i thlak hlah tiah US athanh.

Phung kalh loin Tuluk nih a ramchung ah nawlngeihnak ahman ko tiah China Foreign Ministry nih a chim. Cun Hong Kong le US nih hnatlaknak an tuahmi Hong Kong Autonomy Act 1992 kong zongah a soisel chih rih. Hithil an tuahmi hi Tuluk le Hong Kong hrawh timhnak asi pin ah US nih hin Tuluk hi lih a puh lengmang tiah a peh rih.

Hi konghe pehtlaiin US President Donald Trump nih tuzarh nithum ni ah Executive Order a chuah. Cu order a chuah mi cu Hong Kong he chaw leh chawhrawlnak ttinak an tuahmi vialte a ngol dih. Hi thil atuahnak a ruang cu Tuluk cungah alungtlin caah asi tiah an chim.

Culawng siloin US President Donald Trump nih Tuluk official chawleh thalnak siseh bank lei ah US nih abawmhmi hna zong phihkharnak tuah ding in timhlamhnak zong an tuah. US nih Hong Kong he chawleh thalnak a ngolnak a ruang cu atanglei bangin an langhter.

Tuluk nih Hong Kong caah national security law ahman ruangah a si. Hi phunglam tuahmi hi Hong Kong mipi zalonnak hrawhhralnak asi tiah US President Donald Trump nih a chim. Cun US nih Hong Kong caah thilttha or bawmhchanhnak a tuahmi vialte zong phunglam tuahmi nih a hrawh tiah tiah a chim chih.

Tuluk nih Hong Kong caah phunglam a sermi National Security Law ruangah hin Hong Kong mipi zeimzaw zat hna nih an ram hi an chuah tak ngaingai te lai tiah US President Donald Trump nih a zumhning zong a chim chih.