US AH A ZAMMI TULUK SIBAWI NIH THILSINING APHUAN DIH

Tuluk cozah ttih ruangah US ah a zammi Virus Expert Dr Li Meng Yan nih zawtnak kongah biathlithup a phuanmi asi.Amah hi Virology siseh Immunology lei ah thiamnak sang angeimi asi i, Hong Kong School of Public Health ah rian attuanmi zong asi. Aliamcia April 28 ah khan a vapa le afale kaltak in Tuluk a chuahtak mi kha asi.

Tuluk cozah nih fahnak an ka pek sual lai tiah nunhim duh ah US ah a zammi asi. US aphak hnu ah Fox News nih ton biaruahnak an ngeihnak ah a chimmi cu Tuluk cozah nih coronavirus fahnak hi ahramthok ah mipi sin theihternak atuah hlan ah khan thilsining an theih dih. Hithil hi athlithup in dottletnak i, cu ahcun ka Supervisor zong nih athei lo tiah a chim.

US ah ka luhnak aruang cu coronavirus kongkau ah biadik ka phuan ruangah a si. Ka rianttuannak Laboratory hi WHO zong nih zumh atlakmi Laboratory an timi asi. Dr Yan hi SARS zawtnak he alomi pawl konglam dottletnak atuahtu thiamsang zong asi tiah an chimmi asi.Cun hi zawtnak hi minung i chawnh khawh mi asi timi konghe pehtlaiin atanglei bangin a chim rih.

Aliamcia december ni 31 ah khan coronavirus zawtnak hi minung sin ah i chawnh khawhmi zawtnak asi timi hi Centre for Disease Control and Prevention ah rian attuanmi ka hawi sin zongah ka chimmi asi. Asinain an hruaitu nih zeite hmanh ah an relpiak lo tiah a chim chih. Cun zawtnak angeimi hna cu Tuluk cozah nih thatein azohkhanh hna lo.

Culawng siloin zohkhanhnak tha zong pek a tim hna lo tiah a chim chih. Hi zawtnak ttih ruangah Sibawite si hna seh, CDC rianttuantu hna zong nih an ttihtuk caah a thirh in athirh hna tiah ati rih.Tuluk cawlcangh ning a phuan hnu ah Dr Yan nih ka nunnak caah thinphang asi cang tiah aa theih caah a theories tthenkhat hna cu US-Base Hongkong blogger asimi a hawi pakhat sin ah apek.

Dr Yan nih hin a vapa zong US ah kal dingin a fial nain a vapa nih aduh lo ti asi. US aphak hnu ah FBI zong nih Dr Yan cu suimilam tampi chung biaruahnak zong an ngeih. US a zam hnu ah Tuluk cozah nih a umnak hmun Qingdao cu an kal hnawh hna i, a chungkhar hna cu a umnak an hal hna pin ah an inn le lo zong an hrawh hna ti asi.

Dr Yan cu US a phak hnu ah University of Hong Kong nih a page siseh online portal le email hna cu an phiat piak colh i, Hong Kong university ah Dr Li Meng Yan cu chungtel member zong a si lo. Hi konghi amah nih a chim chih mi asi. Hi konghe pehtlaiin US ah a ummi Tuluk Tanzung nih an ti vemi cu mah nu hi kan theih balmi asi lo tiah an ti ve.

Tuluk nih zawtnak an theih bak in biatak tein rian an ttuan ko. Hi zawtnak kongkau ah Tuluk lunghrinh ding pakhat hmanh a um lo tiah US ah a ummi Tuluk Embassy nih cathanh an chuah ve. Ref: ZN