TUKSUM BAK ASI KO CANG, MINUNG TAMTUK AN NUNNAK ALIAM CANG

Sudan buainak cu ttihnung asi ko. Minung 80 renglo an nunnak aliam cang. Sudan i, West Darfun buainak achuakmi ruangah minung 83 an thi cang tiah Central Committee of Sudan Doctors CCSD nih alanghter. Buainak achuahnak hmun hi El-Geneina khuapi ah asi i, hliamhma atuarmi zong minung 160 renglo an si cang. Miphun pahnih karlak ah buainak hi a chuakmi asi i, nirukni khan buainak hi aa thok cang mi asi.

Hi buainak achuahnak aruang bik hi an langhter rih lo. Hi konghe pehtlaiin Sudan nawlngeitu hna nih an timi cu West Darfun ah hin nirukni thok khan curfew thanh asi cang tiah an chim. Thawngzamhnak pakhat nih alanghter mi cu buainak achuahnak hi Arab minung pakhat nih Arab minung asilo mi nam in asawh ruangah buainak hi achuak mi asi tiah a langhter. Hi konghe pehtlai thiamthiam atanglei bangin Sudan PM nih a chim.

Buainak a chuakmi deihter dingah buainak a chuahnak hmun ah Security force hna cu luhter an si cang tiah Sudan Prime Minister Abdalla Hamdok nih Nirukni ah khan twitter ah arak langhter. aliamcia thla hmasa deuh i United Nations African Union Mission in Darfur (UNAMID) laktthan an si ruangah hika hmun ah buainak aa chapnak hi asi tiah report tthenkhat nih an langhter ve. Tutan miphun buainak achuakmi hi thilthar cu asi lo ti asi.

Aliamcia kum 2003 zong ah buainak fakpi in arak chuak cang i, minung tingthum hrawngtluk an nunnak arak liam pin ah minung 2.5million hna cu a himnak hmun ah an rak tthial cang hna. Tutan buainak konghe pehtlaiin UN Chief nih a lung atthat lonak kong alanghter. Anotnio Guterres nih atimi cu West Darfur buainak achuakmi hi cu a poituk hringhran tiah a chim. Sudan nawlngeitu hna nih a sikhawh chungin mipi hna cu kilveng ko hna seh tiah a chim.

Thawngpang Dang:South Korea President nih Biden sin ah nawlnak atuah cang. Donald Trump nih North Korea he remnak serding ah Kim Jong-un he rian an ttuannak cu president na si tikah pehzulh ding tiah South Korea president nih Joe Biden cu nawlnak atuahnak kong achim. Seoul, presidential Blue House ah, ramchung le foreign journalist hna cu biaruahnak an ngei. Cu ahcun South Korea president nih atanglei bantukin achim.

US nih Donald Trump hruainak in North Korea Nuclear le Missile programme donghter asi khawhnak dingah rian attuan cangmi cu pehzulh peng ahau mi asi ko. US le North Korea karlak ah hin palai rian ttuan zong kan ngeihlah lo ti zong achim chih. Aliamcia nikum ah Trump le Kim hna cu Singapore ah summit an tuah hmasa bik ah remnak an tuahmi cang mi cu pehzulh peng ahau mi asi ko tiah a chim.

Trump le Kim tonnak an tuah hmasa lio ah pakhat le pakhat pehtlaihnak ttha tuah i, Korean peninsula i, nuclear programme donghter asi khawhnak dingah rianttuan ti dingin timhtuahnak an rak ngeihnak kong zong achim. Asinain avoihnihnak tonnak an ngeih ahcun remnak an rak tuah kho lo. Culawng siloin work-level talh an tuahnak zongah an hlawh arak tling lo. Trump nih North Korea he pehtlaihnak atuahmi vialte cu Biden nih president asi tikah pehzulh seh tiah aduhnak alanghter.

Be the first to comment

Leave a Reply

Your email address will not be published.


*