TRUMP LE BIDEN KONGAH VAWLEI CUNG RAMHRUAITU AN HOLH CANG

Joe Biden cu vawlei cung ramhruaitu hna zong nih lawmhpinak an tuah kho rih lo. US thimnak cu alinsa chin lengmang cang, Joe Biden president asi tiah an thanhlulh ko nain zeihmanh biafiang taktak a chuak rih lo. Trump lei ttang hna nih US biacaihzung sangbik Supreme Court ah an chuahpi caah thilsining fiangin akal kho tilo. Atulio US cu Democrats le Republican karlak ah biatak tein buainak a um cang.

Joe Biden cu a voi 46nak US president tiah thanhnak an tuah nain Trump lei ttang hna nih cun an cohlang kho ve lo. Theihcio bangin US thimnak tuah lai hrimhrim khan vote thlak kongah biatak tein thawngpang alinsa cangmi asi. Trump le Biden vote kongah vawlei cung ram hruaitu vialte zong an lung anuamhter ti hna lo. Hi thimnak konghe pehtlaiin atanglei bangin an hmuh.

Russia President Vladimir Putin nih US President thar timi Joe Biden cu lawmhpinak zong atuah kho lo. Russia President nih atimi cu US thimnak result hi official asi lo ahcun asi kho rih lo tiah a chim. Aliamcia thimnak Trump nih teinak arak hmuh lio ah khan vawlei cung ram hruaitu hna le Putin hna lawmhnak bia an rak chim colh.

Asinain tutan thimnak cu atutiang rih ahcun an cohlang kho ve rih lo. Cun hi konghe pehtlaiin Putin’s spokesman Dmitry Peskove nih ati mi cu phungning te zuamnak, adik bak timi theih caan siseh phungning tein thanhnak an tuah dingmi hngah asi ko, Cutik ahcun lawmhpinak cu tuahte dingmi asi tiah a chim. Anmah lawng hibia a chimmi an si lo.

Tuluk president siseh Brazil le Turkey cun Mexican president Andres Manuel Lopez Obrador hna zong nih legal challenge hi a tlamtling hmasa ahau i, cu ni le caan cu hngah cio asi ko tiah an ti ve. Thimnak teinak ahmutu hi result fiangtein a chuak i, phungning tein thanhnak tuah hnu lawngah Turkey lawmhpinak kan tuah te lai tiah an chim.

US mipi le democracy hi kan upat i, kan ttihzah mi asi tiah Omer Celik nih a chim. Donald Trump le Biden cu kan theih veve mi an si ko, aho president an si zongah rianttuanpi dingah timhcia kan si ko tiah Turkey president kong thanhnak nawl angeimi Omer Celik nih achim chap. US President taktak cu January thla ah an thanh te lai ti asi. Hi bia an thanh hlan ahcun ahodah timi theihkhawh asi rih lo.

Be the first to comment

Leave a Reply

Your email address will not be published.


*