RUSSIA PRESIDENT PUTIN NIH THANHNAK ATUAH

Russia Covid-19 Vaccine.Russia President Vladimir Putin nih Covid-19 zawtnak ikhamhnak, Vaccine kan serchuah tiah a thanh. A fanu zong vaccine a chun a ti. Asinain virus expert thiamsang pawl an lunghring. Vaccine ser tik ah Pre-clinical, phase 1, phase 2 le phase 3 tiin testnak tuah a si.

Mah tluk rianrang in an serchuah mi hi a tlamtling mi a si lai lo tiah an zumh. Russia nih zeitindah Vaccine testnak an tuah? Vaccine a chunmi caah himnak a um maw? Side affect a um lai maw? an chuahmi vaccine nih himnak a pek taktak lai lo tiah lunghrinhnak ngeih cio a si. Cucaah Russia serchuah mi Vaccine a caw ngammi ram um dawh an si rih lo.

United Arab Emirates le Israel Nih Daihnak An Ser.Middle East ram vialte lak ah, US hawikom tha bik, UAE le Israel ram cu President Donald Trump zuamnak thawng in ram hnih karlak daihnak cu tuchun ah an ser khawh cang. President Trump, Israeli Prime Minister Benjamin Netanyahu, UAE President Sheikh Mohammed bin Rashid Al Maktoum le Crown Prince of Abu Dhabi Sheikh Mohammed bin Zayed hna telephone in ceihhmainak an ngeih dih hnu ah atu bantuk ram hnih dainak an ser khawh cu a si.

Cucaah Israel le UAE ram cu official tein pehtlaihnak an ngei than cang lai.President Trump nih “ Middle east ah US ralkap um a herh ti lai lo, gas zong anmah sin cawk kan herh ti lo” tiah a chim. US, UAE le Israel cozah nih statement a chuah pin ah dainak minsen zong an thut. President Trump nih democrats pawl he deal tuahnak in Israel le UAE caah deal tuah a fawi deuh” tiah a chim.

Second Stimulus Check.Democrats le Republican hruaitu hna kap hnih hnatlaknak an ngeih khawh hlei lo caah Second Stimulus Check pek ding cu a fiang kho hlei rih lo. Thaizing tiang i lungtlinnak an ngeih khawh lo ahcun September thla ah an thawn cang lai. Democrats hruaitu hna nih November President thimnak cu mail in thimfung thlak in Postor service in kuat an duh caah $25 billion hi Second Stimulus Check he komh chih in pek ding an timh caah President Trump nih a duh ve lo.

President Trump nih mail in thimfung thlak cu lih le hrokhrol a tamtuk lai caah zeiti hmanh in cohlan khawh dingmi a si lo, Democrats pawl nih thimfung fir an duh caah mah hi hranhram in telh chih an duhmi a si” tiah a chim. Democrats party hruiatu Nancy Pelosi nih Republican party nih Coronavirus Stimulus package ah hin US$ 2 trillion hman ding in an lungtlin lo ahcun a voi hnihnak bawmhnak, Second Stimulus Chek kan pe kho lai lo tiah an ti ve. Cucaah thaizing lawng caan a tang I, thaizing hi kaphnih lungtlinnak an ngeih hlei lo ahcun september thla ah a thawn cang lai.

US Ah Rian Ngei Lomi An Zor.Department of Labor nih tuchun ah rian ngei lomi cazin an chuah I, kan hnu zarch chungah rian ngei lomi 963,000 lawng nih unemployment benefit an sawk caah kan hnu zarhchin nak in minung 735,000 an tlawm deuh caah rian ngei lomi an zor deuh cang tinak a si. Rian ngei lomi an zornak state cu Florida (-23,180), New York (-21,905), Georgia (11,652), le Texas (-11,233) ah an si. Coronavirus ruangah rian ngei lomi 60 million tluk an si. Credit: Salai Lairamthang

Be the first to comment

Leave a Reply

Your email address will not be published.


*