PRESIDENT TRUMP PEI AN RAK NAWL KO HI, CU LO AHCUN ALAM A UM BAK LO

General Services Administration nih Biden le Kamala cu nan riantuan cang u tiah thawng a thanhmi hi a ngai ngai ti ahcun, Trump administration hnatlaknak tello in asi kho lo. Tutan ah Trump administration nih Biden innka a on piaknak a ruang tak tak cu White House chief of staff Mark Meadows thawngin asi. Meadows nih biatak tein mah kongah tuanvo a laknak thawngin asi.

President Trump nih innka a on khawhnak dingah Meadows nih President cu heh tiah a nawl tiah report nih alanghter. Cucu Meadows he naihniam tein a ummi nih an chimmi cu FoxNews nih alanghter chin than. Nizan ah U.S. General Services Administration chief Emily Murphy nih thawngthanhnak kongah atimi cu, Nihin ka tuanmi kongah Executive Branch official White House telh in direct siseh indirect in siseh pressure peknak pakhat hmanh a um lo.

Keimah ka theihmi le hmuhmi kha zalong tein ka chim ti hi nan theih dingah ka duhmi asi. Cun, biachahnak ka tuahmi zongah hin tuan deuh ah, tlai deuh ah na tuah awk asi timi tiah a ka timi an um lo. Zeibantuk dah thil dik asi timi cu a caan te ah a lang ko lai tiah achim chih. GSA nih US Constitution le phunglam loin rian a tuan lai lo. Tutan kongah Congress nih biatak tein tuanvo an lak awk asi tiah a chim.

Emily biachim nih President Trump lung a ton ngai ngai. President nih Emily cungah alunglawmhnak bia achim. Emily Murphy, na cungah kaa lawm, kan ram caah thazaang chuah in na tuanmi ruangah kaa lawm. A hlan bantuk in na cungah fahnak in pe than ti hna hlah seh. Biatak tein thimnak kong hi kalpi thluahmah ko, nangmah kan in zoh ko hih tiah a ti. Biden zong riantuan hram a thawk ve cang lai, atu hi zawtnak kongah rian khinhmi a ngei cang hna.

Cu pinah amah he riantuantu ding Cabinets pawl zong a thim dih cang hna. Hmaizarh chungah cun, a Cabinet a thimmi hna cu phungning tein thanhnak a nei cang lai tiah report nih ati. Emily nih achimmi hi White House leiin nawlpeknak a um hnu ah thanhmi asi ti fiang tein a lang. Mah kongah CNN nih achim ning ahcun, Biden cu US President caah fehter asi cang tiah a ti ve.

Relchih:US Thimnak kongah Joe Biden a cak tiah timi hi zumh awk attha rih lomi thil a si. Tulio US thimnak konghe pehtlaiin Media kip nih an langhtermi Joe Biden nih teinak a hmuh timi hi zumh awk attha lo taktak mi thil asi. Lih thawngpang hna nih Trump zong nih dirhmun akianh cang tiah thawngzamhnak kip nih an langhter pin ah Trump zong nih White House a chuahtak lai tiah a phunphun in an chim.

Sihmanhsehlaw hi vialte an chimmi hi official thil pakhat hmanh asi lo timi hi kan theih ahau. Ningcang lo taktak in an langhtermi biadik lo asi. Media kip nih Joe Biden a tling tiah an timi hi lih le hrawkhrawl lawngte asi. Aruang cu tulio president thimnak hi official in thanhnak an tuahmi a um rih lo. Donald Trump zong nih teinak ka hmu lo, Biden cu thutnak ka kianh tiah timi pakhat te hmanh achimmi aum rih lo.

Tuchun ah thilsining fiang deuh in thanhnak tuah zong asi lai. State tthenkhat ahcun Vote hi an reltthan cuahmah lio asi i, court zongah thil tampi tuah dingmi a um rih. Supreme Court nih thilsining biatak tein a cuanh cuahmah lio pi asi rih. Phungning tein thanhnak an tuah hlan ahcun President asi dingmi theih asi rih lo. Media kip nih an langhter mi hi cu biadik asi lo.

Aruang cu cozah nih pakhat te hmanh president a simi thanhnak an tuah rih lo caah asi. Democrats hna nih zeihmanh ruat loin rampi hruai lawng an i tim i, lih le hrawkhrawl hlennak in biaza phunkip an langhter. Culawng siloin Donald Trump athatnak konglam vialte ttialmi hna cu an phihkhar dih hna. Cun an phihkhar lo hmanh ah biadik asi lo tiah an tii, nawlngeitu hna nih an hnawhpiak dih hna.

Rak ka theithiam ulaw, Media lei nih thawngpang thar an langhtermi chung ah Biden a tthatnak an chimmi lawngah hin kan thinlung pe hna hla usih. America ah zumtu ttha asimi Republican party lei bia hi nifatin an chuah or phuanmi hna hi zoh pah lengmang cio uh tihi kan sawm duh hna. Mipi sin ah biadik taktak thanh hi atthami asi i, Cunglei khuakhan lairelnak hi kan hngah cuahmah.

Tihi, zumtu vialte hna nih cun kan theih awk a si i, kan Bawipa Pathian nih hin a bawi tthutden in khua akhaang peng ko i, cu bia cu zumtu hna nih kan i hngahhlang tuk mi Jesuh Khrih taksa, a khrihfabu le ami hna cu thla kan campeng ko. Kan hnu lei in Pharoh ralkap rual hna nih a kan dawi i, kan hmai lei ah Rilipi nih akan kham. Sihmanhsehlaw Donald Trump le America mipi caah Pathian rianttuannak hi kan cuanh lio asi.

Aruang cu vawlei cung ramkip vialte siseh kanmah tiangin akan hnursuan khawh dih mi thil a si caah asi. Cucaah mipi vialte hna zong nih zumh awktlak lomi thawng hi kan i fian ngaingai ahau tihi cah kan duh hna. THanhnak an tuahmi paoh zumh colh lo dingin iralring ngaingai hna usih. Zumtu hna nih USA caah thla kan camnak hi Pathian nih lehnak akan tuah lai.Daitein um uh, Pathian ka si tihi thei uh tiah akan ti, Khrihfa kan sinak bangin thawngzamhnak kip zumh colh loin siseh thlacam daithlan hlah uh tihi cah kan duh fawn hna. Thlacam nun akan petu le ruahchannak tampi akan ruahtertu nih hin kan mit hmuh ah zeithil dah a tuah lai tihi hngak ko hna usih. Credit: PC Biaksiam

Be the first to comment

Leave a Reply

Your email address will not be published.


*