IRAN NIH VAWLEIPI THEIH IN THAWNGTHANHNAK ATUAH CANG

US he an i Tithiamlo lio pi a si ko nain Ballistic le Cruise Missile a Sernak kong Iran nih Thawng a Thanh. 1,400 km tiang a phan khomi cruse missile thar kan ser khawh cang, tiah Iran Defence Minister Amir Hatami nih Thursday ah khan a chim. Tu lio hrawng hi missile program ngol dingin US nih a chimh lio pi a si.

Hi missile hi surface-to-surface kahnak a si i, a min ah Qassen Soleimani, tiin an min an bunh. Hi missile hi 1,400 km tiang a kahphaak khawh i, Abu Mahdi, tiin min an pekmi missile hi cu 1,000 km tiang a kah khawh ve, tiah Hatami nih a chim.An missile hman an thlaakmi cu an State TV ah an laughter hna i, “hihi kan Iran defence power a thawntertu ding a tharhlambik mi cruise missile a si” tiin tlaang an tar.

January ah khan Baghdad airport (Iraq) ah Iran Quds Force an lubik Soleimani le Iraqi hriamtlai hna an lubik Abu Mahdi al-Muhadis cu US nih a thah hna.Tutan kan missile, abikin kan cruise missile ko hi kan caah an biapituk hringhran. 300 km in 1,000 km tiang kap kho dingin kan tuahtamh (develop) kan tuah chung hi kum hnih hmanh kan rau lo.

Cucaah hlawhtlinnak nganpi a si. Kan ralkap thazaang le kan missile programmes pawl hi mah le mah ai kilveng kho tawk cu kan si ve ko cang, tiin Iran President Hassan Rouhani nih a chim.2015 lio i vawleicung ram thawngthawng pawl he Iran nih nuclear deal a tuahmi zulh in hriamnaam ser lo dingin UN nih a cung i khamnak a tuahmi a ni le caan cu October in a dih ding khi a si cang caah, cu ti khamnak ni le caan cu vun pehsauh than rih dingin US nih UN cu a hnek cuahmah lio pi hna a si.

2018 i Trump nih Iranian neuclear deal in a chuah hnu le Iran cung i phihkharnak a tuahchap hnu khan cun Iran le US karlak an i hmuhthiamlonak hi a zualhma chinchin cang.Iran nih hin nuclear a sernak rian siseh, ballistic missile ser ai timhnak siseh, cun a raminnpa ah raal a thawhtermi vialte hi a maaktaak khawhnak dingah US nih biataktein reh le rengh a timh peng ko.

Kan cung i phihkharnak na tuah chung paoh cu nanmah US he biaruahtinak ngeih kan i tim lo, tiin Iran lei nih an chim.Thursday ah khan New York ah UN Security Council nih Iran cung i hriamnam ser lo dingin phihkharnak an tuahmi a ni le caan pehsauh than rih dingin US nih a duhnak a langhtermi cu Thursday i New York ah UN Security Council nih an hnonpiak hna hnu cun, Iran cung i US nih phihkharnak a tuahmi vialte vun nunter dih than dingin, Trump nih bia a ka ronh, tiah US Secretary of State Mike Pompeo nih a chim. Credit: Chelsea Bawi

Be the first to comment

Leave a Reply

Your email address will not be published.


*