FAKTUK IN SUPREME COURT A PHOMH CANG HNA, ABIA CU APIN BAK

Supreme Court nih biachahnak an tuahmi cu faktuk in Texas Republican Chairman Allen West nih lehnak atuah colh hna. Texas state nih tutan US president thimnak kongah ningcang loin thil a um, lih le hrawkhrawl atamtuk, timi aphunphun he state pali hna cu Supreme court ah taza a cuai hna. Hi taza cuainak hi Trump caah ruahchannak nganpi aummi asi.

Texas state nih Supreme Court ah tazacuainak atuahmi hi state dangdang state 17 nih an dirpi, Tthenkhat thawngzamhnak nih cun state 19 nih an dirpi tiah an langhter ve. Culawng siloin Donald Trump a cozah lila zong nih Texas state timhtuahnak cu an dirpi vemi asi. Cutluk in ruahchannak nganpi a um lio ah Supreme Court nih an hnonpiak hna.

Supreme Court nih an cohlan lonak a ruang bik cu hibantuk tazacuainak hi phunglam kalning asi lo tiah an ti hna ti asi. Hi konghe pehtlaiin Supreme Court cu Texas Republican Chairman Allen West nih lehnak atuah colh hna. Abia hmanmi hrimhrim a fak ngaingai. Allen West nih Supreme Court lehnak atuahmi hna cu atanglei bangin hin asi.

Phungning lam loin thimnak an tuahmi siseh phungning loin an duh paoh in thil an tuahmi hna hi kan zoh sawhsawh hna ahcun phunglam thatein a zulhmi le phunglam tangah ningcang tein a ummi vialte hna nih kan tuar lengmang ko lai. Curuang ah phunglam zultu state hna cu chuak in adang tein Union dirh ahau tiah lehnak atuah hna.

Hi konghe pehtlaiin Supreme Court nih cohlan lonak thawng an thanh hnu ah Donald Trump sihni Mr Giuliani le Ms Jenna nih an timi cu a dih rih lo, lamdang kan kawl lai tiah an ti ve. Lih le hrawkhrawl vote kong hi biacaihzung ah ngeih le theih hrimhrim ding hi Trump nih a zumhmi asi. Hi buainak kong hi Trump lawng nih adirpi ngam tiah Giuliani nih a chim.

Relchih aduhmi caah. Thimnak konghe pehtlaiin Donald Trump caah cun ruahchannak lam a um tilo, Ruahchannak nganpi a um tiah an timi vialte cu pakpalawng ah an cang dih tthan. Taxes state nih tazacuainak an tuahmi cu Supreme Court nih a hnonpiak hna. Taxas State nih Georgia le Pennsylvania cun Michigan le Wisconsin hna hi thimnak kongah ningcang loin thil an kalpi tiah Suprem Court ah taza an cuainak hi asi. Asinain tutan ah Suprem Court nih a hnonpiak hna.

Hi taza cuainak kalpi mi hi mipi nih an dirpi ngaingai mi asi i, State 17 le Congressman minung 110 zong nih an dirpi pin ah Donald Trump a cozah zong nih an dirpi ve mi asi. Hi konghe pehtlaiin Supreme Court ah case dirpi dingah Tez Cruz zong timhtuahnak angei cang. Sihmanhsehlaw case cu Supreme court nih a hnon piak diam hna.

Tutan ah Supreme Court nih case an cohlan lonak aruang bik cu phunglam kalning asi lo tiah an ti. America cu Federal, Republic an si tikah State nawlngeihnak hi asang ngaingai. State pakhat buainak pawl kha state dang i thlaknak nawl aum lo ti asi. Afawinak cu tutan US thimnak kongah buainak hi rampi huap siloin state buainak khi asi.

State kip nih an president ding an thimmi ah teinak a hmu mi kha thanhnak an tuah hna. Ning cangloin thil akalpi mi an um zongah anmah state nih hin ttavuan an lak tawn ti asi. Hi thimnak konghe pehtlaiin phunlam thiamsang hna nih an timi cu atutan buainak hi cu a tlaituk cang. Aruang cu Electoral Vote thlaknak caan Nihnih thum te lawng ai duh cang. Cucaah hi dirhmun ahcun zeibantuk biacaihtu hmanh nih an tawlrel lai lo ti asi.

Tutan ah ruahchannak nganpi a ummi zeihmanh lo ah a vun can tik ahcun Donald Trump caah cun lungfak ngaingai khi asi cang. Donald Trump nih thimnak vote kongah biatak tein a dirpi mi cu vote hi audit tuah dih siseh tiah a chim lengmang. Biacaih zung nih an kham lengmang asi ahcun Donald Trump nih Martial Law hi ahman te ko lai tiah an zumh.

Be the first to comment

Leave a Reply

Your email address will not be published.


*