CHIN RALZAM CAAH THAWNGPANG TTHA TUK A CHUAK, BIDEN THEU THEU

Chinmi ralzam dirhmun in India le Malaysia ah a ummi hna caah thawngpang ttha tuk a chuak. Joe Biden nih min athut cang i, ralzam ka lak hna lai tiah thanhnak atuah cang. Joe Biden nih ralzam hna cu kumkhat chungah minung tingkhat le thongkul le thongnga 125,000 ka lak hna lai tiah minsen athut cang tiah US innraang pi WHITE HOUSE nih zapi theih in thanhnak an tuah cang.

Hi konghe pehtlaiin ralzam lak dingin kum an relning cu hitihin asi. October nikhat 2021 in an thok lai i, kumvui october nikhat 2022 tiang khi asi lai. Aliamcia US president Barack Obama nih khan kumkhat chungah ralzam minung thongsawmriat le thongnga ka lak hna lai tiah min arak thut i, cu chungah minung 84994 bak US ramchung ah an lut kho tiah an langhter.

Obama nih ralzam biatak tein alak mi hna cu Donald Trump nih president a vun ttuan i, ralzam hna cu kumkhat ah thong hleinga lawng lak dingin min a rak thut. Donald Trump nih ralzam alakmi hna hi aliamcia kum 1980 hnu ahcun ralzam ala tlawmbik mi asi. Thimnak tuah lio ah Biden nih arak timi cu president ka tlin ahcun ralzam tampi in ka lak hna lai tiah arak chim.

Cun ralzam sinak ruangah nu le pa he hmunkhat a um kho lomi hna cu hmunkhat ah an um kho lai, chungkhar nuamtein an um lai tiah arak. Achim bantukin President Joe Biden nih ralzam hna cu kumkhat chungah minung 125000 lak dingin minsen a thut cang. Kumkhat ah mah vialte minung alak hna asi ko ahcun Chinmi zong tampi US ah an lut kho cang lai tinak asi.

Kawlram Thawngpang:Aung San Suu Kyi ruahnak petu Australia minung Sean Turnell zong kawlralkap nih an tleih ve cang. Chawlehnak lei ah Aung San Suu ruahnak apetu Australia minung Sean Turnell hi aliamcia kum 2017 December thla in Naypyidaw ah a ummi asi. Chawlehnak lei kongah Aung San Suu Kyi ruahnak acheu lengmang mi asi. Hi konghe pehtlaiin Sean Turnell nih ahnu bik thawngzamhnak ah a chimmi cu case pakhat in an ka tleihmi asi. Asinain zeibantuk case in dah an ka tleih timi tucu ka thei ve rih lo.

Kan dam tthat lio asi ko. Sualnak zeihmanh ka ngei lo tiah Reuters agency he ahnu bik an i chawnhnak ah a chim. Kawlralkap nih uknak an lak hnu ah NLD hruaitu upa hna cu an tleih thluahmah hna. President Win Myint le Aung San Suu Kyi zong an tleih hna i, tuchun nitiang mipi hmai ah langhter an si rih lo.Atuhi Aung San Suu Kyi le Win Myint cu inn chungah erhkhumh an si. Kawlralkap nih uknak an lak hnu ah buainak a chuak chin lengmang cang. Vawlei cung ram hruaitu hna zong kawlralkap hna cu nan tleihmi hna pawl thlah hna uh, cun nawlngeihnak zong pe tthan hna uh tiah an ti hna.

Asinain tuchun nitiang ah zeihmanh an tuahmi a um rih lo. Hmunkip kaakip a ummi Kawlram minung hna nih duhlonak an langhter cio hna.Kawlralkap nih tuchun thok in kawlram chung buainak alinsa sual lai timi an phantuk caah facebook siseh Twitter siseh Instagram tiangin an phih dih cang. Tuchun thok in kawlram mipi zong khengbel tum lawng aza ti lo tiah an ti i, khuachung ah duhlonak an langhter cang hna. Hiti ning tein kawlram mipi an chuah chin lengmang asi ahcun ralkap le mipi karlak ah buainak alinsa taktak te ko lai tiah an ruah.

Be the first to comment

Leave a Reply

Your email address will not be published.


*