Pu Puia A Chuah Lio Ah Midang Zong A Chuahpi Hna Kongah Salai Van Tin Sang The Hakha Post In A Chuak Ve Mi Nih A Chim

The Hakha Post in ka chuaknak kong he pehtlai in bia a ka hal mi tete an um ca ah tlawmpal fianter ka duh ,A hmasa bik ah, The Hakha Post ah tuanvo ngeitu upa hna, riantuanti hawi staff dihlak, ramchung ramleng in The Hakha Post a dirkhamtu hna le kan ca reltu nan dihlak cung ah keimah pumpak in lunglawmnak bia ka chim.

The Hakha Post Zung ka luhnak,
The Hakha Post zung hi 2019 Marh thla chung ah Intership in ka rak lut. Ka rak luhnak a ruang hi, Media riantuan a huam mi ka si ve ca ah, caan karlak (sianginn khar chung) rian cawn pah in kan bawm hna lai ka rak ti hna i, cu tin cun ka rak tuan. June in sianginn kai ah Yangon ah ka rak kal than. Yangon ka um chung zong Online in bawmh awk a tha mi tete zong ka rak bawmh pah hna.Cun, 2019December thla dih lai ah Hakha ka phan i, January thla in The Hakha Post Zung ah caan tling in riantuan kaa thok. Ka tuan mi cu Reporter a si. Hi ka tuan chung ah ka si khawh tawk in kaa zuam ve.

The Hakha Post Zung in ka chuaknak,Rian in kan chuaknak kong ah, Saya Pa Puia (CEO) nih a sawm hna, tiah hruaitu cheukhat le mi cheukhat nih an kan ti. Cu a si lonak cu CM Page in Interview tuah mi ah ka chim cang. Tlawmte nolh ka duh mi cu, Saya Pa Puia nih hin an kan sawm hrimhrim lo. Zung chung riantuantu kan si bantuk in, thilsining hi a hlan deuh in kan rak theih ve. Cucu hoho a palh a hman ka tiduhnak a si lo. Asinain kan cunglei hruaitu buainak an ngeih mi kan theih ca ah, riantuan tha a nuam ti lo. Cutik ah, phuahnak ca ka tial i ka chuah hi a si. Phuaknak ca ka tial mi hi keimah duhthimnak le biakhiahnak te a si ko. Phuahnak ca ka rak tial ah hin September thla dih ah kaa din lai ka rak ti.

Asinain, thla dih hlan ah phuah ka si.Nai; CM Page nih The Hakha Post hruaitu biahalnak an tuah mi hna ah, a chuak mi zong phungning tein thlacamnak he kan thlah hna an ti. Asinain an kan thlah lo. Septemer 26 (zarhtein) zung ka tin hnu ah, chuaknak ca a tial mi chung in minung 4 cu rian in i din cang u, rak kai ti hlah u, tiah zaanlei sang ah thlacamnak zong tuahpiak loin an rak ti hna. Cu ahcun kei zung ah ka um ti lo asinain, amah zong rak kai ti hlah seh an in ti, tiah ka tuanti hawi nih an ka chimh. Khua ka ruah mi cu, Hakha Post ah phungning tein rian a tuan mi kan si ko i um lo kar hna hi rian in rak i din cang seh ti cu, tiah ka khuaruahhar ngai.

Chuahnak ca ka tial mi ah September thla dih ah ka ti fawn. Hihi an kan chuak ning ah hin cun, ka lung zong fak ngai. Asinain, The Hakha Post riantuantu ka hua hlei hna lo. Keimah cu lunglawm tein The Hakha Times ah riantuan kaa tim cang.

Note: Ka chuahnak kong ah bia aa ka hal.mi an tam pah ca ah, ka vun fianter hi a si. A ruah zia ka thiam u, ka palhnak um ahcun ka ngaithiam u tiah kan nawl hna.

Be the first to comment

Leave a Reply

Your email address will not be published.


*