Pastor Van Tum, Thantlang Khua Kongah Thil Pahnih Ruahawk Le Zoh Awk

“Sui” Thantlang le “Kan rum lo nan kan I nuam ko” (Not rich, but happy)Atutan thil kan tonmi ruangah keimah pumpak in Thantlang khuanu khuapa, mino le Khrihfa hruaitu le hruaitu dang vialte nan cungah mawhchiatnak, chimhhrinnak, siknak le soiselnak tampi ka tuah ve. Mi tampi nih cun ka cattialmi cungah na thinhar ngai ko lai I nan lung zong a fak ko lai. A ka huatu zong nan um men ko lai. Asinan kan dawt hna ruangah mahti I kan tinak hna a si.

Kan huat hna ruangah kan timi hna a si lo. Kan Thantlang khua hi a lamkip in tthangcho ve seh ti ka duh ruang bikah a si ko. I sik le I mawhchiat cu I dawt ruangah a si ko. Bible zongnih na dawtmi na fa cu fungfek in tu a ti.Thantlang khua kongah thil pa 2 ruah awk le zoh awk ka duhmi.

Pakhatnak”Sui Thantlang” timi biafang hi voi tamngai ka hmuh cang. A hmangtu pawl nih an hman duhnak a ruang cu a um ko lai nan keicu Sui Thantlang tiah auh hnawhchannak aruang ka hmu lo. Thantlang cu kokek (nature) lei zong in khuadawh asi fawn lo. Thantlang khua nak in kokek lei ah a dawh deuhmi khua a tamtuk ko. Nan “sui” timi biafang an khuamin hmai ah an hmang hna lo. Thantlang khua ah sui, ngun, lunghring, lungsen, zinan, le mansung thil a chuakmi zong a um fawn lo.

Thil mansung a chuahnak khua hmanh nih an khuamin hmaiah “Sui” timi biafang an hmang lo/an I bunh lo. Cusi ah ziah kokek in a dawh fawn lomi khua, thil mansung a chuak fawn lomi khua min hmaiah “Sui” timi biafang cu an hmankun ne hnga timi hi a hmangtu nih chimfiannak an tuah a hau lai. Mi khuadang le pengdang nih zeiruang ah dah “Sui” timi biafang hi nan hmang kan chimfianh hnik uh kan ti hna seh law teh zeitin dah kan fianhning hna a si lai timi hi ruah ahau bak. Sui timi biafang chimfian awk neih ttung lo/theih ttung lo I hman sawhsawh cu ningzak tuk a si lai.

A chimfiantu ding nih “Sui” ti kan hmannak aruang cu kan nunzia le kan zatlang nun a dawh ruangah a si ti seh law cucu atutan thil a cangmi nih hin a hman lo zia a langhter colh ko lai. Kan Khrihfa nunzia a dawh ti fawn uh sih law cucu a palh fawn ko lai. Aruang cu atutan thil a cangmi hi kan khrihfa nunzia he a tlak bak fawn lo/a kalh bak. Curuangah “Sui” timi biafang hi hman sawhsawh in hman men ding a si lo. “Sui” Thantlang ti hman kan duh ahcun Thantlang khuanu khuapa, mino, Khrihfa hruaitu le vawlei lei uktu nan zate rian nganpi nan nei. Sui Thantlang tiah auh kan duhnak le kan auhnak aruang cu kan nun ziaza dawh, kan nunphung dawh, kan zatlang nun a dawhnak, kan felnak hna ah a um a hau. Cu vialte kan neih ttung lo ahcun “Sui” timi biafang kan hmannak dingdang aruang a um ti lo ti khawh si.

(2) Adang pakhat a um rihmi cu “Kan rum lo nan kan I nuam ko” (Not Rich, but Happy) nan ti rih fawn. “Nuamh siloah nuam” timi biafang hna hi Khrihfa sinak ah hmanmi a si lem lo. Khrihfa sinak caah cun “lawmh siloah lawm” timi biafang deuh hman a si tawn. “Not rich, but happy” timi biatlang hna hi Khrihfa kan sinak chirhchan in maw nan lak siloah zeitin dah mah biafang hi nan hman ning a si hnga timi zong ka ruat. “Kan rum lo nan kan I nuam ko” nan ti nan atu cu nan I nuam kho ti lo hi aw. Atu cu vawlei cung pumpi Laimi (Chinmi) nih fawh nan santlaih lonak, nan chambaunak, nan ralchiatnak, nan daithlangnak, mi thleidan nan neihnak, nan fel lonak, khrihfa nunzia dawh nan neih lonak, nan zatlang nun a dawh lonak, I ruan lonak, duhdawtnak nan neih lonak, mi bawmh nan duh lonak vialte ruangah nan kong an in ceih dih cang hna hi/an in thangchiat dih cang hna hi/an in soisel dih cang hna hi/an in mawhchiat dih cang hna hi. Khoika ah dah nan I nuamhnak cu a um kun ne? Kan rum lo nan ti fawn. Atu cu Chinmi zate nan kan hlen lawng siloin nanmah le nanmah zong nan I hlen cang bantuk asi. “Kan rum lo nan kan I nuam ko” ti loin “Kan rum lo nan kan I lawm ko” tiah thleng uh. Aruang cu kan rum lo nan kan I lawmhnak ding cu Khrih lawnglawng hi a si ko, khrihfa kan si dih ruangah. Nan rum lo nan khrihfa nan sinak I nan I lawmh ahcun thleidannak nan neih lo a hau lai, nuhmei, ngakttah le sifak nan dawt hna a hau lai, nan ral a tthat a hau fawn lai, khrihfa nunzia dawh nan neih a hau fawn lai I din lonak, ziknawhnak le eihmuarnak vialte zong nan doh ngam a hau lai. Atu cu nan rum fawn lo I nan I nuam fawn ti lo/nan I lawm kho ti lo.

Sui Thantlang tiah nan auhnak aruang mi pengdang le mi khuadang sinah zeitin thla nan chimfian ning a si lai? Nan rum lo nan nan I nuamhnak aruang zong nan chimfian a hau lai. Aruang cu nan I nuam ti lo hi. Nan chungsi a vang cang. Nan I hngilh kho ti lo. Nan ning a zak cang.

Sui ti awktlak a sinak a um fawn ti lo, Thantlang ah.Sui Thantlang ti auhtlak a sinak dingah thla kan campiak hna. A lamkip in Thantlang cu tthangcho ko seh. Nan nunzia tuk ah nan I lawmhnak le sui tinak cu um ko seh. Dawtnak he.

Crd: Van Tum

Be the first to comment

Leave a Reply

Your email address will not be published.


*