Laimi Vialte Nih Cawn Awk Tlak NuSung

Caṭial thiam Nusung Hrangtlung nih Kalay Bethlehem Ngakṭah Sianginn Christmas a tuah piak hna

Australia ah ummi Caṭial thiam Laimi (Chinmi) nih Nusung Hrangtlung tiah kan theihmi nungak Sui Len Sung nih Bethlehem Orphanage, Kalay, ngakṭah sianginn hna cu 2020 Christmas sunglawi taktakin a tuah piak hna tiah thawng kan theih. A sunglawi tuk hringhran.

Sui Len Sung @Nusung Hrantlung hi Chinmi (Laimi) a thei lomi kan um tik ti theng lai loh dah. Biazai ṭha ṭha in a awitu Laimi nih Lainu ngak caṭial thiam kan i ngaihmi pakhat a si. Amah hi Biazai lawng zong si loin, nu hna thazaang peknak tibantuk a phunphun in ca a ṭialmi Author pakhat a si.

Naite ah Chin Tube nih a tuahmi People Choice Ward 2020 ah Author Of The Year ‘Keimah’ timi cauk a ṭialmi hmangin teinak a hmutu le a cotu pakhat a si. Atu bantukin ngakṭah hna dawtnak thinlung ngeiin a cawlcanghmi zoh tikah zohchun awk tlak taktak nusal ṭha a si. Hmalei a karhlannak le a nunnak lamthluan ah Pathian nih lamhruai in umpi ko seh.

Nusung Hrangtlung “Bawipa nih an pekmi na pahrang (talent) nih midang lawmhter ve seh”

Hi kong he pehtlai in Bethlehem Orphanage nih hitithin an langhter, “Lunglawmhnak. Amah ca ah siseh a nu maw a unau ca hmanh ah hmang siang lo tein Ngaktah caah a pe dihtu nungak Nusung Htg – Nunu Austrilia i ummi Leng Nusung Htg – Nunu nih Chintube nih peekmi 2020 Author of the year in a hmuhmi laksawng dihlak le a hrehzah chap chih in kan nih Bethlehem Orphanage, Kalay, ngaktah sianginn 2020 Christmas cu sunglawi tak in an kan tuah piak. A sunglawi tuk ee. Nusung, kan i lawm tuk mu. Bawipa nih lam in hruai ko sehlaw thluachuahnak let tampi in in pe ko seh. Thacamnak in kan in philh bel lo,”.

Nan dawtmi,
Bethlehem Orphanage chungkhar
kalay

Note: Kum 2020 ta a si ko nain, a thil tuahmi upatnak le zohchun tlak a sinak langhter duh ruangah kan rak langhter ṭhanmi a si.

Be the first to comment

Leave a Reply

Your email address will not be published.


*