Cozah nih Phaisa A NgeiLo, Ram Mi Zapi Tangka Si, ThanCho Nak Rian Le RamKhel

Cozah Nih Tangka A Ngei Lo, Ram Mizapi Tangka a Si; Thanchonak Rian Le Ramkhel
Dawtmi u le pa le hawikom hna,Chin Miphun Authawng ah ka tial mi capar kan hrawmh hna. A dihlak in relpiak ding ah kan sawm hna.Hmailei kong ah khua a ruat kho mi nih hitin khua an khaang: –
Zeidah ka tuah lai, zeidah kaa timh, a caan zeizat dah ka rauh lai” tiin khua an khan. Policy an thlak. Cuhnu ah tinhmi a tlam a tlin khawh nakhnga “tangka a herh zat” in BUDGET an ser i ‘luhlinh’ in an kawl.

Pawlisi an i fian hnu ah a bawmtu ding le a tlam a tlintertu ding ‘tangka kong’ cu an ruat, an tuaktan i an kawl.Chin miphun cu kan si a faak. Nain Chin mi ca ah “zeidah ka tuah lai, zeidah kan herh, zeitluk dah caan a rauh lai,’ timi ka hngalh. CNLD nih pawlisi a ngeih. A tlamtlinnak ding ah ‘luhlinh in rianṭuan’ ding in MP cuh kaa tim.

Tangka kan ngei lo, ti hlah usih. Chungkhar pawcawm kho kan si dih. “Luhlinh in miphun caah tangka” kan kawl ahcun kan i tinh mi, kan tuah duhmi a tlam a tling ko lai. Cucu CNLD nih aa tlaihmi a si. Cu ṭuanchuahnak ding ah ka fimthiamnak le ka ti khawhnak kha mizapi thazaang i bochan in MP cuh kaa timh hi a si.Nihin ah ram ṭhangcho kan timi hna khi rian an ṭuan i an i zuam caah a si. Chin mi chung in ram ṭha a phan mi paoh rian ṭuan lo le rian ngei lo an um lo. Cu an rianṭuan mi tein chungkhar sahlawh rualchan an kan zohkhenh.

Ralkap uknak ruang ah ramchung remdaihnak a um kho lo. Kan ram le kan miphun nih kan tuar khun. Ramdang nih Kawlram le Chin ramkulh ah ra in chaw phumnak an tuahmi a tlawm. Cozah nih a um ciami Budget chung dah ti lo cun, rian an ṭuan lo, ramdang fimthiamnak, rumnak hmang in kan ram sersiamnak a lam an tuaktan kho lo.

Tulio cozah le a luancia cozah kan zoh tik ah Chin miphun caah tinhmi pawlisi an ngei lo. ‘Chin ramkulh ṭhanchonak caah zei bantuk timtuahnak dah nan ngeih’ tiah kan hal lengmang hna nain an ka let kho bal lo. An ngei bak lo, ti a fiang. Cunglei in “Fial mi” tiang lawng an ruah khawh. Mizapi mithmai nakin cunglei nih ‘tuah uh’ timi an orh. Mizapi ai-awhtu an si nain mizapi aw-an an ngai lo. Cunglei bia an ngai, Naypyidaw cozah ṭihnak lungthin he kan miphun an kan hruai kan ti ahcun kan palh lai lo dah!

Zapi nih zumh ngamnak nan kan ngeih naklai kan nawl hna. Atu lio cozah le MP nih cunglei in a ra ciami lawng in ṭhanchonak an tuah khawh. Kannih cu anmah he kan i dang. Cunglei in Budget a ra ciami cu amah ning tein a ra ko lai. Asinain kan i dannak cu mizapi nih zeidah an herh, kum khat caah zei ṭhanchonak dah kan ṭuan khawh lai, timi phunglam le a lam kan hngalh. Cucaah, atu lio cozah le MP nak in tamdeuh saumau in Budget kan tuaktan khawh lai. Kan herhmi tangka le ṭhanchonak kha kan chuahpi khawh hrimhrim lai.

Kawlram cu miphun kip cawh in dirhmi a si. Cozah nih tangka a ngei lo. Mizapi nih ngunkhuai kan pekmi in cozah nih rian a ṭuan. Dawr kan tuah i sipin le a dangdang ngunkhuai lawng a pemi kan si lo. Company hna nih an zuarmi, cite, ti, hnipuan, mirang vawlei, camphio, datsi, facang, chiti, cite ngapi..tbk .. kan nunnak caah kan herhmi thilri vialte kan cawknak man khi cozah sin ah a lutmi a si. Cozah sin ah ngunkhuai pe loin aho Company hmanh nih zuarnak nawl an ngei lo. Mizapi nih kan cawk hna caah Company pawl nih cozah ngunkhuai an pek i cu tangka in rammi caah Budget a ratnak a si.

Cozah nih a hmanmi tangka hi mizapi kan tangka le keimah ka thawhmi aa tel ve ti hi kan zumh le kan pemh a herh. Ramchung ah a ummi zeizong vialte hi kan thawhvo, kan ngeihmi aa tel. Keimah pumpak phaisa aa tel ve ti in mizapi nih kan pom a herh hringhran.Cucaah Chin miphun nih cozah bawmhnak le tangka in kan nung kan ti lo ding a biapi. Kanmah kan tangka tu kan tawlrelter hna i kan pekmi chung in kan lam, kan sul le an tuahmi a si. Kan MP cheukhat nih Chin Party cu “mee pek an phu lo, tangka an hmu lai lo, ṭhanchonak an tuah kho lai lo,” an ti.

Cucu sullam a ngei lomi a si. Mizapi thawhvo, nawlngeih nak le mizapi upat lo a si. Hlennak a si. Aho Party hmanh le pumpak nih anmah tangka in ram ṭhanchonak an tuah lo. Mizapi thawh ciami in tuakṭan mi a si ko.Mizapi nih aho dah kan miphun a daw i, mizapi zawnruahnak taktak he thimfung lemsoinak a tuah, mizapi upatnak in tutan thimnak ah aa cuh? ti hi kan zohfel ngai hna a hau.

Crd Van Bawi Lian.

Be the first to comment

Leave a Reply

Your email address will not be published.


*