SALAI KB THAWNG:KUM KHAT CHUNG NAWLNGEIHNAK AN LAK TTHAN KHAWH MEN

Kum khat chung nawlngeihnak an laak than khawh men. Kan chim voi hra, kan tlawn Hranhring,” ti mi theo kan chuak ko ai. Vawlei cung ah Ramchung Ralthawh (Civil War) sau bik ram 5 lak ah aa tel mi cu kan Myanmar ram hi a si ve. Kan hnulei ah, “Tahlak ah nihchuak Myanmar ramkheel,” ti mi tlangtar in ca ka tial bal cang. Hmaikaltu cu NLD an si nain damti a hnulei in daamti pahtu cu vei an si. Hmaikal cu NLD an si.

Kan hngalh cio bang NLD nih term hnihnak peh a timh nain tawh ngeitu nih nawlngeihnak cu an lak thiamthiam ko. Inn chung kan luh khawh nakhnga a pakhatnak bik a herh mi cu tawhfung a si. Cu tawhfung cu vei kutcung ah a um mi a si tik ah zeitihmanh in chuh awk an tha lo.Nizaan tihnite ah an pu bik nih a chim mi cu, “Phunghram hi kan zulh tung lo ahcun a hrawh in hrawh a hau,” tiah a chim bal.

February 1 cu Myanmar ram Ministers le Hluttaw Palai hna thimnak ni a si nain phone line siseh, internet line siseh, phih dih a si. Amah belte, Ni 70 hrawng hnu ah nawlngeihnak an laak thai ding le laak thai lo ding a fiang te lai, ti a si fawn.February 1, zaanlei 3:30 riang hrawng phih a si kha mu. Aruang cu nawlngeihnak lak an timh ca ah a si, ti cu a fiang mi a si ko. Khatlei ah a um ve mi cu, tahchunhnak ah, “2020 November 8 thimnak, Chinram hmanh ah ningcanglo mee 6000 renglo a um,” tiah vei nih an thanh kha mu.

Phone line le Internet siseh, Radio siseh, phih dih a si tik ah zei thawngpang hmanh kan theih kho ti lo. Hiti vei nih nawlngeihnak an laak than mi kong hi vawlei cung minthang media a si mi, Aljazeera Media nih Mirang in caan tawite a thanh mi chung in kan theih khawh mi a si. Kan bia tawi ko seh. Tawh ngeitu lo cun innchung luh khawh a si lo. Pa That le Kawi Kir pheikalh (zuu cep) zingdaap kik lak i an tunh an ven lio ah, zingka daamti pah kha Pa That nih a tih tuk i,

Kawi Kir, nang hmai ah kal law, kei nih a hnu in daamti ka vun pah lai,” tiah a ti. Kawi Kir nih aa fiang ve lo. Hmaikal a si poh ahcun, pasal ti phun in, “aw, si ko cuh,” tiah a ti. A hnu ah a lung a hung fim i, “Ka dua, Pa That, na thluak pei a rak tha tuk hi. Zeitindah a hnulei cun daamti cu na pah khawh lai,” tiah bia an i al i zing khat cep ven ah kum 70 renglo an rau ai. Cu theo, cu theo. By.Salai KB Thawng

Relchih:Pi Suu Hi Zaangfak Ngai A Si. Cozah an rak tlaih kaa in ralkap lungton aa zuam lengmang. A sullam cu:Ralkap nih uknak an lak thannak ding ah a ruang (reasons) an ngeih naak hnga lo a lam kip in a kunpiak lengmang hna. Ralkap lungput a hmaan lo zia le a fehfuan lo zia a rak theih tuk. Hngakchia tuahsual umh bak in a rak umh hna i, an duh hoih in a umpiak hna.Mipi le ram zawn a ruah ruangah zeibantuk tuar har tuar zong a poi ah a chia lo. A tuar a fak tuk.

Rohingya kongah security kan him lo an ti sual lai i uknak an lak than sual lai tiah amah nih vawleicung mi vialte sualpuhnak aa khinh dih.Suu Kyi cungah mawhphurh vialte a rak tlung. Ram tam pi nih upatnak an pekmi lila tiang in chuh than a tong. Asinain aa in.Tlaang Cung mi kong zongah mawhphurh vialte a tong. Aa in thiamthiam.
Ka chim ve i kaa runven ve a si ahcun ralkap pawl ka huarsuan sual hna lai i uknak lak thannak khua an khaang than sual lai tiah amah nih tuarnak aa ham i ralkap tu cu a tuarnak hma le lungthin in a thlemh hna.

A bochan tukmi U Ko Ni an thahpiak lio zong ah daite in aa in. Ram a dam kha a biapi tuk ah a chiah. Doh le kalh in cun kan tei lai lo ti a fiang; a lam zong a si lo ti aa fiang.Nemnak in kan nemter hna lai ti kha a hmuitin a si peng. Cuticun kum nga a vun dih. Thimnak a vun um than tikah aho party vanhai loin cozah ser kho ding tiang in mipi nih a dirpi than hna. Ralkap party pawl cu anmah ralkap chung dah ti lo cu aho hmang nih a duh hlei hna lo.

Hi hnu kum nga chung a kan hruai than ahcun kan him lo chin lengmang ti zong an theih. An i runvennak phunghram zong virhkhoih khawhnak lam a um chin lengmang. An him lo chin lengmang. Hruh lam an zulh than lo ahcun an dai chin lengmang cang. Cucaah an ziaza thing ah an phohpian than sual lai tiah a toderhpiak lengmang ko hna bu ah vote hrokhrolnak nan tuah tiah lulam hngal loin atu bantukin nawlngeignak an lak thannak a si.

Atu bantukin a ruang an kawl lo cun nawlngeihnak ngeih than khawhnak lam an ngei fom ti lo cu! Suu Kyi fimnak, nunnemnak le ram dawtnak cu tei awk a that ti lo caah nawlngeihnak tlaih than khawh lam hramhram in an kawlnak a si. Thih lai ekceh bantuk a si cang. Caan nih lai a rel than lai. Zoh rih a hau.Atu cu, zeitluk in dah ralkap nun le ziaza thlemh a har ti kha vawlei pi nih a hmuh than cang. Ralkap na runven hna; na dirkamh hna an ti i upatnak an pek ciami lila tiang an chuh thanmi kha a thar in khua an ruat than cio cang hna lai. Pi Suu i a ram dawtnak, a fimnak le a tuarnak vialte hna hi upat lo awk an tha hrim lo. Credit:Luther Tinhre

Be the first to comment

Leave a Reply

Your email address will not be published.


*