Breaking New : Mindat Ah Kadohnak Fak Ngai In A Chuak , Ralkap 4 Zong An Thi,

Nihin zanlei suimilam . 3:30 hrawng ah aa thawkmi Mindat khua kahdohnak ah Myanmar SAC ralkap lei in minung 4 an thi i, palik motor pakhat zong mei in an khanghpiak hna, tiah kan theih. Mindat ah SAC ralkap thazaang chap ding in Pakhuku le Matupi lei in ralkap motor pawl an kal, tiah khuami nih an chim. Mindat mipi le SAC ralkap kahdohnak hi April 24 zaan khan a ral i thawk. SAC ralkap nih an tlaihmi mino 7 an thlah duh hna lo caah Mindat mipi nih Lai meithal pawl he an kah ve hna hi a si.

May be an image of one or more people and outdoors

Credit: The Chin Journal

Relchap: Jakarta Biachahnak Phen Ah Zeidah A Um?

April 24, Indonesia khuapi Jakarta ah tuahmi Myanmar buainak kong ceihnak ASEAN hruaitu hna meeting biachahnak phun 5 cu kan theih cio cang. Caankarlak cozah NUG, UK le UN nih Myanmar buainak kongah ASEAN hruaitu hna an i zuamnak cu kan cohlan, kan lungtling tiah cathanh an chuah. Asinain thiamsang tampi nih cun Jakarta biachahnak hi an lungtling lo, an soisel ngai. Thiamsang hna nih Jakarta biachahnak an soiselmi kong cu kan peh than te lai. Tutan cu Jakarta biachahnak phenah zeidah a um timi kong tu ka vun tial lai.

Theihtlei pakhat: ASEAN zulhphung ah ram pakhat a ram chung kongah ramdang i thlak lo ding, cozah pakhat a nawlngeihnak kha hnorsuan lo ding timi a um. Hi bantukin zulhphung an ngeih ko buin Myanmar buainak ceihkhannak meeting an tuahmi cu ASEAN tuanbia ah theihtlei ngai pakhat a si.

Khuaruahhar pakhat: Asinain mipi thimmi hluatdaw palai hna (CRPH) hruainak in sermi National Unity Government (NUG) sawm loin hramhram in nawlngeihnak a la i sualnak. angei lomi rammi hna a that cuahmah komi ralhrangbu hruaitu MAH rilmal meeting ah an sawm kha cu khuaruahhar pakhat a si.

A thli tein biachahnak pakhat an hlonh: Mipi hmuh in ASEAN biachahnak an thanhmi cu 5 a si, a ngai ngai ti ahcun biachahnak an hlonhmi pakhat a um. Cucu “Ramkhel thongtla pawl chuah hrimhrim ding” timi a si. Hihi zapi lungtlin in biachahnak tuahmi a si. Asinain thanhnak an tuah tikah hi zawn hi an hlonh, asiloah an remh tiah Reuter nih April 25 ah a tial.

ASEAN Chairman nih meeting biachahnak a thanhmi ah biachahnak an remh ti kan hmuh i kan lau ngai tiah meeting biachahnak a hmu i a reltu min chim a duh lomi pahnih nih Reuter ah an chim. Zeitikah, zeitindah an remh ti bel cu an chim lo. Malaysia PM zong nih tlaihmi vialte thlah ding timi cu ASEAN hruaitu dihlak an lungtling tiah a social media ah a tial.

A fiangmi cu ASEAN biachahnak phenah hin China a um ti hi a si. Bichahnak 5 an thanhmi zong khi ralhrang nih an zul nemmam lai lo. ASEAN ram 10 hna cu China huham tangah a ummi lawngte an si. Phundang in chim ahcun thingkung nganpi China tangah a kheomi thingkung hmetete bantuk khi an si. Cucaah cun ASEAN nih Myanmar mipi hna duhning in zeihmanh a tuah kho lai lo, a chuahpi kho lai lo. Ralhrang rual nih sau deuh an uk khawhnak dingah a bawmtu men an si.

Be the first to comment

Leave a Reply

Your email address will not be published.


*