PATHIAN CU PAKHAT IN MAW PUMTHUM IN DAH KAN HMUH LAI

Vancung Ah Pathian Cu Pakhat In Maw Pumthum In Dah Kan Hmuh Lai:Mah biahalnak hi Theological Thinking ka hmuh khawh tawkmi ka chim lai. Direct in fianh khawh asi locaah step by step in a tawi khawh chungin fianh khawh kaa zuam lai. Cun nan zumhning zong asi lo kho men. A ruang cu Trinity a zummi Khrihfabuu zongah mah bantuk kong i cawnpiak hi a um setsai lo.

Pakhatnak. Pa Pathian (Jehovah) Cu Thlarau Asi:Pathian cu thlarau (spiritual being) asi caah hmuh khawmi Pathian asi lo (Jh4:24, Exo 24:4, 11:1).Pathian cu ahohmanh nih an hmu ballo i, thlarau asicaah hmuh khawh zong asi lo. Jesuh lawnglawng nih Pathian cu a hmuh (Jh 1:8, Jh 4:46, Jh 8:38, 1Tim 6:16). Pathian cu minung sin ah (forms) Mei, khuadom, vanmi, Minung (wrestler with Jacob) etc in a rak i langh.(Isai6:1-6, Exo 32, Amah Pathian ngaingai cu Thlarau asi caah Hmuh khawhmi asi lo.

Pahnihnak.Thiang Thlarau Cu Thlarau Asi:Thiang Thlarau cu ahodah asi? Thiang Thlarau cu Pathian Thlarau a si. (Gen 1:2, Isa 61:1, 11:2, 2Sam 23:2).Thiang Thlarau cu Jesuh Khrih Thlarau asi. (Act 16:7, Phi 1:9, Jh 7:39, Rev 1:4, 4:5, 5:6).Pathian hmanh hmuh khawh asi loahcun a Thlarau chinchin cu hmuh khawhmi asi lo ticu a fiang tuk. Thiang Thlarau zong (forms) thlipi, lei-meialh, thuro tibantukin aa langh nak hmuh khawh asi (Gen1:2, Mt 3, Act 2). Kan i fiang awk cu Thiang Thlarau cu THLARAU asicaah hmuh khawh asi lo.

Pathumnak. Jesuh Cu Thlarau A si Lo:Modalist Oneness nih Jesuh cu Thlarau asi tiah Bible umlomi an i chim tawn. Jesuh cu ahodah asi kun?Jesuh cu (God-Man) asi. A sullam cu Minung sinak 100% a ngei i, Pathian sinak (Deity) 100% a ngei. Cucu khuaruahhar (The uniqueness of Christ) asi. Jesus nih Title pathum a ngei i cu hna cu Pathian Fapa (Son Of God), Mi Fapa (Son of Man) le Pathian Tuu Fano ( Lamb of God) an si. A tawinak chim ahcun Pathian Fapa (Son of God) sullam cu Pathian 100 %(Deity) asinak asi.

Son of God hi Jesuh lawnglawng asi. Zumtu nih Pathian Fa kan i timi hi son of God siloin Child of God kan si. Bible ah zumtu hi Son of God tiah a um lo. Children of God ti asi. Lai holh nih a tlinh deuh rua lo.Mi Fapa (Son of Man)…sullam cu Minung 100% (humanity) asinak asi. Jesuh nih amah le amah hi Pathian Fapa ka si aa ti bal lo. Midang tu nih an ti. Amah le amah cu MI Fapa (Son of Man) tiah aa ti nak 79 Bible ah kan hmuh.

Pathian Tuu Fano (Lamb of God).Jh 1:29. Bible ah Jesuh cu Tuu Fano asinak voi 103 kan hmuh khawh. Tuu Fano nih a langhter micu Pathian le minung karlak ah remnak sertu/ thuphah cawipiaktu (Mediator) asi.(Heb 9:11-15). Pathian Tuu Fano cu Adam le Eve khamhnak caah siseh Israelmi sual raithawinak siseh Calvary ah an thahnak ah siseh A hramthok kaa tein a rak um cangnak cu Bible hlun OT ah kan hmuh khawh.

Oneness zumhning bantuk in Jesuh hi Pa Pathian rak sisehlaw Mediator (Pathian le minung karlak ah remnak daihnak le sual thuphah cawipiaktu) hi sullam a ngei lai lo. Jesuh cu atu zongah kan Mediator asi. (1Tim 2:5, Heb 8:6) Johan nih vancung kong vision a hmuh tik ah Pathian Tuu Fano a hmuh. A tlangkomh i chim ahcun Jesus cu God-Man sining pahnih (Two natures) a ngeimi asi i, atu ahhin vancung khua ah Tuu Fano bantukin aum. Jesus cu Thlarau asilo caah hmuh khawh tongh khawh mi asi.Jesuh cu Thlarau asilo timihi kan ruah awk asimi cu God a sinak ahcun Thlarau asi i, Man a sinak ahcun Thlarau asilo tinak asi. God-Man a sicaah hmuh khawh asi ti kha chim duhmi cu asi..God-Man (Two natures) a ngei peng.

Palinak. Jesuh Thawhtthannak Pum: Jesuh a thih i nithumnak ah a thot’han. Kan ruah awk asimi cu Jesuh A thohthan ah khan Thlarau in a thothan lo (Amen). Vulei a nung lio i, a pumsa bakin khan a thothan. Asinain thih thiammi pum sitiloin athi khotilo mi (Immortal) Sunparnak Pum (Glorified Body) in a thothan. Zumtu zong a mah bantukin kan thothan ve te lai (1Cor 15…).

Jesuh cu a thawhthan hnu ah Thlarau asi locaah a zumtu tampi nih an hmuh khawh. (1Kor 15:6, Luke 16:9-11) Thomas nihcun a kut in a tongh (John 20:19-23). Ti le rawl a ei(Luk24:30-32). Gloried body asicaah zumtu hna innka kar in an i pumhnak ah a lut khawh (Jh20:26).(Rev 1:17-18). Jesuh Hmape (The Scar of Jesus) cu zungzal hmelchunhnak asi i, a tlau ti lai lo. Jesuh cu sunparnak pum in a thothan ko nain an chunhnak A kut, A ke le a hngak i ummi hmape co a tlau lo.(Luk 24:38-40) Athihnak le Ahmape cu vulei serhlan in a rak ngeih ciami le Jesuh cu Vulei serhlan in rak thahciami Tuu Fano asi.(Rev 5:12) Kan ruah dingmi cu Jesuh cu thihnak in a rak thohthan nak pum bantuk te khan vancung ah a um ko. Caan tongh tikah Mi Fapa in a ra lai i, vancung khua ah Tuu Fano in zungzal in zungzal tiang thangthat asi lai.

Panganak. Vancung Ah Pathian Cu Zeitindah Kan Hmuh Lai. (Pakhat maw Pathum?) Mah biahal nak hi van lehcolh ahcun Van cungah Pathian pakhat lawng kan hmuh lai. A ruang cu Pathian pakhat lawng aum caah asi. Trinity zumhnak hi Pathian pathum asilo. Pakhat khual a tlawng i pakhat cu hmun dang kaa dang ah an um lo. Pa le Fa le Thiang Thlarau cu t’henawk a thami ansi lo. Co-existence ansi.

Coexistence sullam cu Umnak le Nunnak aa hrawmmi, aum tti zungzalmi le aa tthen bal lomi nunnak pakhat aa hrawm mi tinak asi. Na tuak kho maw? Pa le Fa le Thiang Thlarau cu a hramthok tein (Coexistence) an rak um cang. (Jh14:16-17, Ephi3:14-17, Jh 1:1-14, Heb 9:14). Pa le Fa le Thiang Thlarau cu a dangdang ah an um bal lo. Pakhat an si.

Pathian cu Thlarau asi i Jesus chung ah aum, Jesuh zong Pathian chungah aum (Jh 10:38). Thiang Thlarau cu Pathian le Jesuh i an Thlarau asi. An i hrual ning le Coexistence an sining hi na fiang kho maw. Pathian le Thiang Thlarau cu hmuh khawh lomi Thlarau ansi caah Jesuh (Mi Fapa) lawng kan hmuh khawh lai. Calvary ah thihnak in atho thanmi God-Man asimi Jesuh cu vancung ah kan hmuh lai. Jesuh hmuh kha Pathian hmuh asi ko zeicatiahcun Pakhat (Echad) ansi caah asi ko(Jh 14:9-11) thuk tukin va ruat duh hlah.

Zungzal Vancung ahcun Jesuh cu Pathian Tuu Fano tiah kawh asi lai. Pathian Fapa, Mi Fapa tiin Biathlanm Vision ah kan hmu kho lo. Jesuh timi min zong Zungzal a mah thangthatnak ahcun hmannak kan hmu ti lo. Jesuh cu a min Title ah Pathian Tuu Fano asi tihi Biathlam ah voi 27 kan hmuh khawh. Tuu Fano thangthat si ko seh, sunparnak co ko seh tiah zungzal in zungzal tiang thangthat asi lai.(Rev 5:12,13:8. Rev 21:26-27).Tuu Fano a min thangthat zungzal ko seh

Vancung khua ah JESUH kan hmuh lai. Van kan phak tik ah fiang tein kan hgalh chinch’n te lai. Vancungah Pathian pathian (pumthum) bak in kan hmuh ahcun Pathian pathum (polytheism) asi hnga. Jesuh hmuh cu Pathian hmuh kha asi ko. Jesuh ah an tling dih. Jesuh kha Pa asilo nain Pa sinak kha Jesuh ah a tling. Jesuh cu Thiang Thlarau asilo nain Thiang Thlarau sinak cu Jesuh ah a tling. Cucaahcun Jesuh hmuh cu Pathian hmuh asi ko.A thlam in kan zumh i atakin kan hmuh te lai. Jacob R Thang