TUCHUN CAAH PATHIAN BIA. LAWRKHAWM KONG (RAPTURE) BY.REV.DR.G ZATHIO

Lawrkhawm Kong ( Rapture).Baibal Relding: Johan 14:1-3; 1Kor 15:50-57.1 Thess 4:13-18. Nihin cu Pathian ni asi le Sunday school phun in lawrkhawm (rapture) kong tawiten kan zoh ti hna lai.Lawrkhawm ti cu Mirang cun rapture ti asi i Latin in a rami biafang asi. Greek cun Harpazo ti asi. Rapture ti biafang hmang in cun Baibalah a um lo. Trinity biafang a um lo nain kan hman bantuk in hman asi.

Harpazo cu Laiholh i leh ahcun cawi-laak asi lo, tlaih i laak kan ti hnga. Mirang cun caught up asilo snatch away ti asi. Fiannak ah Enok kha Pathian nih nungbu in a laak (Gen 5:34), Elijah kha phuchim in cawi asi(2 Siang 1:1,11), Filip kha Bawipa Thlarau nih lodiam in a laak ve ( Lam 8:39,40). Cun Paul zong van thumnak ah cawi asi (2Kor 12:2-4).Hibantuk in mithiangmi hna zong Khrih nih kum 7 harsatnak vawleicung i a tlun hlan ah a laak te hna lai.

Acunglei Baibal cacang hna hi thaten rel hmanh. Cu laak tik i ai tel dingmi hna cu phu hnih kan si lai. Athi i van i a kai cia mi hna le lawr tik i vawlei a nungmi zumtu hna ti in. IThess 4:13-17 ah kan hmuh bang Jesuh kha van in ara lai. Asin a ummi mithiang hna an thlarau ai ratpi lai. Muko thawng an theih in athi ciami zumtu hna kha pum thar in an tho lai i vanah an kai lai. An thlarau le an pum aifon lai i a thothanmi pum he an nung cang lai.

Kannih a nung rihmi cu Paul nih 1Kor 15:52 i a chim bang mipthep karah kan i thleng lai i a rawk le a thi kho ti lomi, a thothanmi pum he vanah a thiciami hna hnu ah cawi-laak kan si ve lai. Isaak nih a nupi lampi i a rak don bangthli lak in Khrih nih a kan don lai i vanah asinah a kan laak lai( Johan 14:3). Cun Bawipa sinah cun a zungzal in kan umti cang hna lai ( Johan 14:3; 1Thess 4:17).

Khrih voihnih nak a ratnak kong kan cawn tikah lawrkhawm kong hi cawn hmasa asi tawn. Kan pale tampi nihcun Jesuh voihnih a ratnak hi hmai hnih a ngei an ti ( two phases or two stages). Ahmai khatnak cu lawrkhawm hi asi. Mah hnu kum 7 ah Jesuh cu Olive tlangah a pum bak in a tum than lai i kum 1000 chung vawlei ah Siangpahrang dirhmun in a uk te lai. Hihi a hmai hnihnak kan timi cu asi.

Lawrkhawm ahcun a mithiang hna caah ( for His saints) ara i voihnihnak vawlei tawng in arat tikah cun mithiang hna he ukti ding in ara than te lai( with His saints). Lawrkhawm ahcun a thlite in mifir rat bang a ra te lai ( 1Thess 5:2; Math 24:44, 50). Avoi hnihnak ahcun zapi mithmuh bak in sunparnak he ara lai ( Bia 1:7) i kum 1000 vawlei hi a pen lai. Lawrkhawm a um chan cu a mithiang hna nih vawleicung a tlungdingmi Pathian thinhunnak le dantatnak kha an tuar lonak hnga
caah asi.

Baibal thiam a cheu nih cun kum 3 le a cheu hi zumtu nih kan tuar ve lai an ti nain tam u nih cun kan tuar lai lo an ti ( Bia 3:10). Kei zong harnak faktuk a tlung dingmi kum 7 hlan ah a kan lawr la ti hi ka pom deuh. Careltu ule nau le fale hna, na thih tikah van kai set ding in nai manh cang maw? Kan thih hlan hna ah lawrkhawm um sela w teh nai tel hnga maw? Mifir nih thil a thli i an fir tikah arbawm le puanchia an laa kel lo.

Man ngei le man sungmi lawng an laak. Lawrkhawm tik zongah Jesuh nih a thisen man asi mi, Thlarau a ngeimi lawng hi a caah man sung kan si caah a kan laak te lai. Cucaah nihin ah kan sawm hna. Lawrkhawm ah i tel ding in i tim tuah hna usih. Jesuh nih Johan sinah Tuan ah ka ra lai, ati tikah Johan nih, Cubantuk cun si ko seh. Bawipa Jesuh ra ko cang, ati bang ti ngam ve usih ( Bia 22:20).Bawipa nih careltu, sharetu le chimchintu hna in umpi ko hna seh mu. Credit: Rev.Dr.G Zathio

Be the first to comment

Leave a Reply

Your email address will not be published.


*