TUANNAK AH A LANG MI DAWTNAK ( LOVE IN ACTION).BY REV DR ZA THIO

Tuannak ah A Langmi Dawtnak ( Love In Action). 1Johan 3:18, Ka fale hna, kan i dawtnak hi hmur le kaa lawng in asi awk asi lo, dawtnak taktak, thil tinakah a langmi dawtnak asi awk asi. Nizan ah facebook ka van kau le Kawl holh in catawite pakhat ka rel. Hitin ai ti. Hakha khua ah hramhram dawi ruangah umnak inn caah mihar nan um ahcun keimah inn ah a lak in nan um kho.

Chunghkhar panga um khawh asi. Thlakhat chung facang le chiti kan bawmh hna lai.” Hiti atitu a min ka van zoh le Pu Hrang Tin Thang ai ti. Alungput le a cate nih ka nun a ka tongh tuk. Hi ciammam hi teh riantuannak i a langmi dawtnak timi cu asi ka ti le nihin zongah mah kong hi tawiten ka van tial duh. Paul nih Dawtnak cu mi cungah zaangfahnak a ngei,” ati ( 1Kor 13:4).

Acung i kan rel bang dawtnak pa tiah an rak kawhmi Johan zong nih dawtnak cu hmur le kaa lawngin asi awk asi lo, thiltinak ah a langh ding asi awk asi ati ve ( 1 Johan 3:18). Kawlram hmun tampi le Hakha ah tutan kan thil tonmi kong ah bawmh hau le hnemh hau tampi an um. Atulio caan hi Pathian nih dawtnak hi tuannak ah langhter hna seh law thluachuahnak pee te hna ning ati caan asi ko lai ti ka ruat ngai.

Khrihfa he falo he, biatakten a peemi le a tuanmi kong kan rel i kan theih tikah ahopoah kan rak i lawm hna. Ahocio paoh kan ti khawh tawk in pee caan le tuan caan as ti philh hlah usih. Kum 1962, May thla ni 2 ah San Fransisco tadinca nih an rak chuah balmi thanh-ca pakhat ah nu pakhat nih hitin a rak tial an ti. Asual bak lomi ka va cu thih daan tiang pek ding in taza cuai asi. Asual lonak kong biaceih
zung i chimpiak ding sihni kan herh tuk.

Dingte le hmante in biaceih piak dingah bawmh kan hau. Sihni peek ding phaisa bel kan ngei bak lo. Amahbel ka va a sual lonak kong a ka chim piak khawh i ka va a luat ahcun kum 10 chung a inn rian ka tuan lai. Rawlchuan, thil suk le inn thianh rian vialte fel tein ka tuan lai.” Mah thanh caa cu sihni Vincent Hallino nih a rel tikah a lung a tha lo i bawmh awk ah ai tim.

Mipa kha lainawngtu arak si lo. An puh sawhmi asi. Cucaah thlahra chung heh tiah aizuam i a buaipi. Anetnak ah cu bia cu a tei i mipa cu a luat. Mah hnu ah minu cu sihnipa te inn ah ava kal i riantuan piak ding in bia ava chimh hna. Vincent nih minu cu, ” Na va na dawtnak nih a luattermi asi. Kan inn rian tuan piak a hau lai lo mu. Lunglawmten va tin ko,” ati. Vincent tuahmi le abia cu mipi nih an van theih.

Mi nih an van thangthat i an van uar. Mah le cangka sihni minthang taktak ah ai chuah. Minu nih ava a dawt tuk caah misinum kum 10 tuan ai tim. Vincent nih kha nu dawtnak a hmuh tikah man la lo in a lak in sihni a leih piak hna i mipa a luat. Dawtnak a rian tuan khawh ning cu a mak tuk ee. Pakhat le pakhat kan i dawt ahcun Pathian hrim ai lawm i a dawtnak le zaangfahnak kha mi hna cungah ruah
bang a surter tawn.

Vawlei cung minthang Francis of Assisi cu khual lam a kalpah ah a ran bak i a rangmi, zoh ah fihnung le tihnung asimi thinghmuipa kha lamlai nilin tangah a hmuh. Fih phun in ai la i a lanhtak. Alung a tha than lo i a hei kir hnawh i a kuh, cun a hnamh. Akir i a van i mer thanah thinghmuipa kha a hmu ti lo. Akhuaruah a har. Cun a van i ruat than i a lung a pem.

Thinghmui ngeimi rak si lo in Jesuh Khrih tu a rak si ko ti ai fiang i chun-nitlak lam a kalpah in ai lawm. Bawmh hau, zuan hnawh hau le cawithlir hau kan va bawmh hna ah khin Jesuh an si ti in ruat hna usih law biatak nih a kan fial bang dawtnak cu tuannak in langhter hna usih. Bawipa nih kan dirpi in kan tuanpi ko seh. Amen. Credit: Rev. Dr.G Zathio

Be the first to comment

Leave a Reply

Your email address will not be published.


*