SUNDAY SERMON, JESUH KHRIH KAN TLANGBAWI NGAN.BY REV DR G ZA THIO

Jesuh Khrih Kan Tlangbawi Ngan. Hebru 4: 14, Cucaah kan zumhnak hi fekte in i tlaih ko usih. Pathian umnak hrimhrimah ahung lutmi Tlangbawi Ngan kan ngei. Amah cu Pathian Fapa Jesuh kha asi. Hebru 7: 24, 25. Sihmanhsehlaw Jesuh cu zungzal in a nungmi asi caah zungzal in tlangbawi asi. Cucaah cun amah thawng in Pathian a fuhpanhmi hna paohpaoh cu a khamh khawh zungzal ko hna; zeicahtiah zungzal in a nun caah Pathian kha a nawl piak khawh zungzal hna.

Jesuh Khrih hi ahodah asi ti le amah nih a kan tuanpiakmi hngal hi hrinthannak zong asi pinah teinak nun ngeihnak ca zongah lamhruaitu asi. Jesuh Khrih cu Pathian thimdam tertu, aiawhtu, remnak sertu le kan shihni asinak ka tial cang. Nihin cu kan Tlangbawi Ngan asinak kan zoh rih lai. Kan hngalh cang bang tlangbawi rian cu minung hna an caah sual raithawinak tuah piak, Pathian nawl piak le an caah thluachuah hal piak te hna asi. Cun Bawipa nawlbia zong an cawnpiak hna.

Tlangbawi hna le an riantuanmi vialte nih Jesuh Khrin kan Tlangbawi Ngan asi te lainak le a riantuan nak an aiawh chung. Jesuh Khrih nih a thawhthan hnu ah amah thisen thengte kha i put in vancungah a va kal i hmun thiang bikah, Pathian hmai ah ava thlet i khamhnak (tlanhnak) kha a kan ser piak (Heb. 9:12). Atulio ah Jesuh cu kan Tlangbawi Ngan , Pa Pathian sinah a kan nawl piaktu asi. Cucaah Jesuh thawng in Pathian a panhmi paoh cu a khamh zungzal hna.

An herhmi thluachuah zong a hal piak hna. Genesis dal 14 nak ah Abraham kha raldohnai i a hung tlun tikah khan Salem khua i siangpahrang le tlangbawi zong asimi Melkhizedek nih nelrawn ah a rak don i changreu le misur zuu zong a phorh. Cun Pathian sinah thluachuah zong a hal piak ti kan hmuh. Melkhizedek cu kan Tlangbawi Ngan Jesuh hmuhsak tu asi i Abraham cu amah bantuk i Pathian a zummi kanmah dirhmun asi.

Kan Tlangbawi Ngan Jesuh nih sual ngaihthiam kan sinak lai Pa sin ah a kan nawl piak lawng si lo in (Heb.7:24,25), kan herh lio caan te ah zaangfahnak hmu ding zong in a kan nawl piak (Heb.4:14-16). Zumtu hna, herhmi kan ngei maw? Phuhrunnak um bak lo in Jesuh min in Pathian kha hal ko, peek ding le bawmh ding in Pathian ai manh zungzal ko.

Vawi khat cu Alexander siangpahrang kha Gaza a lak hnu ah Jerusalem zong kha dantat dingin a van fuh. Cu lio an tlangbawi zik cu Jaddua asi. An lau tuk. Jaddua le tlangbawi paoh nih an thuam he an chuak. Cun mipi zong nih an zulh hna.Alexander nih a lang in thuam rang taktak lawngte i ai thuammi a hmuh hna tikah a rang in a tum i a van fuh hna. Tlangbawi ngan a luukhuh hmailei i benhmi suiphel cung i tialmi Jehivah min a hmuh tikah tlangbawipa cu salam a pek.

Khan mizapi le tlangbawi dihlak nih upatnak he Alexander cu an kun piak dih i salam an pek ve. Cuhnu ah Jaddua nih Daniel cauk chung i ai tialmi, Persia hrawktu ding hi nangmah na si ko tiah a chimh i a hmuhsak. Cutikah Jerusalem cu hrawk lo in mipi cu a tin ter hna. Athaizing ah a kawh hna i nan duhmi ka hal u ati hna. Kha ti khan thah le nawn le dantatnak um lo in an khuapi he an minung he an him. Hihi Jehovah bawmhnak thawng in asi ko.

Cucaah kannih ami hna zong Jesuh Khrih kan Tlangbawi Ngan asi zia le kan caah Pa awrhlei kam ah thu in nawlpiaktu asi hi philh lo in kan herh lio caan kipah Bawipa cu ralthate in panh usi law hal ko usih. Bawm lo le pee lo in a kan um lai lo. Bawipa nih careltu dihlak kan fianter in thlua kan chuah piak ko seh. Amen. Kan hawile HRAWMH VE KO HNA USIH. Credit: Rev, Dr G Zathio

Be the first to comment

Leave a Reply

Your email address will not be published.


*