REV.DR. ZA THIO: JESUH THIHNAK LE THAWHTHAN LIO AH KHUARUAHHAR THIL HNA

Jesuh Thihnak Le Thawhthannak Lio Ah Khuaruahhar Thil Hna.Baibal Relding:Math 27:39-53; Luke 24:12;Johan 19:38-42, 20:3-20. Jesuh vailam cung an tahnak in a thawhthan tiang karlak ah hin khuaruahhar thil a tlungmi pasarih hrawng kan hmuh. Mah kong hi thuk deuh i ruah set ahcun Khrih hi Pathian Fapa le Khamhtu asi hrim ko ti zumh lo awk a tha lo. Nihin cu Jesuh a thawhtlhan ni asi caah mah kong hi kan zoh ko hmanh lai.

Atanglei hna hi kan rel dih in thihnak teitu Bawipa cu thangthat hna usih. Pakhatnak. Nazi pathum chung khua a mui. Chumhmui a tlung kan ti lai cu. Math 27:45, Pahnihnak. Biakinn puanzar kha amah tein alu in atawlei tiang ai cheu. Math 27:51, Pathumnak. Vawlei ai hnin, lung an i cheu i thlan an i hung. Math 27:51,52, Palinak. Pathian mi, a rak thi ciami tampi an tho.Jesuh a thawhthan hnu ceo in an thlan chung in an chuak i khuapi chungah an lut. Tampi nih an hmuh hna. Math 27:52,53.

Panganak. Zarh i ani khatnak ni, zingkate ah lii ai hnin.Vancungmi ara i Jesuh an vuinak thlankhar kha a thawn. Math 28:2, Paruknak. Perer le Johan thlan chung i an luh tikah Jesuh ruak an hmu lo. Ruak zual puan le alu mennak puan lawng an taang. Luke 24:17; Johan 20:6,7, Pasarihnak. Jesuh cu Mary le a zultu hna sinah ai langh. Emau khualei i a kalmi Kleopas le a hawi sin zongah ai langh. Luke 24:13-32; Johan 20:17-20.

Khuaruahhar tuk asimi cu hi thil hna a hmu atongmi tlangbawi upa le hruaitu hna nih Jesuh kha Pathian Fapa asi an zumh khawh lomi hi asi. Lungthin a hah cangah cun tih a nung hringhran ko. Sihmanhsehlaw Rom ralbawipa le a hawile nih cun Jesuh kha Pathian Fapa asi hrimhrim ti an zumh khah ( Math 27:54). Mirumpa Josef le Nikodemu nih cun an zumh i a ruak zong thlan tharte ah an vui ( Johan
19:38-42).

Lunghak tukmi tlangbawi upa hna nih thlan congtu ralkap hna kha phaisa in zik an nawh hna i zaanah a zultu an ra i an fir an ti ter hna ( Math 28:11-15). Minung lungthin ngai hi mu! Kha ti khan thawhthan kong kha an vaivuanh. Iziptram i pyramid hna an min a thannak cu thutlo si an thuhmi an siangpahrang a thimi hna an pum, asi lo, an ruak a um rih caah asi.

London khua i Westminster Abbey cu a lar ngai, zeicahtiah an ram minthangmi hna an pum an chiah hna nak asi caah. Mohammed thlan cu lung in tuahmi ruak kuang chungah a ruh ro an um caah a min a lar ve. Washibgton D. C. i Arlington Cemetery thlan cu mi nih an upat ngai, a ruang cu American mi minthang hna an vui hna nak asi caah. Atu i ka van telhmi thlan hna an min thannak a chan le Jesuh thlan a min a thannak cu an i dang rum ro.

Mah thlan hna cu mi minthang hna an an ruhkhua a um caah asi. Jesuh thlan a min a than tuknak tu cu a lawngmi asi caah asi. Jesuh cu thihnak nih a tlaih khawh lo caah athlan a lawng. Zeiruangah hme a lawn, an fir i an thial ruangah asi lo, THIHNAK KHA A TEI I A THAWHTHAN caah asi. Hallelujah! Jesuh min cu thangthat in um zungzal ko seh. Amen! Credit: Thio Za

Be the first to comment

Leave a Reply

Your email address will not be published.


*