REV. DR. G. ZA THIO: A ZUM LO NAIN A ZUMH TTHAN

A Zum Lo Nain A Zumh Than Belief–after Unbelief. Zarhpi zing paoh hi chungkhar pumhnak ah khamhnak kong ka chim. Kan hrinthan dih ko kan ti bu zongah i fian chinchin a herh ka ti lawng hmanh si lo in ka tupa hi kum 17 a tling cang i a hngakchiat lio ah khamh aco ko ti ka ruahmi kha Pathian bia in khamh i fiang seh ti ka duh caah ka chim lengmang nak asi.

Tuzing ah ka chim hngami kan hrawmh hna. Anthony Harrod cu ralkap pensen la cangmi asi. Zu nih a salmi asi. Thawngtha chimnak ah hawi nih an sawm peng i a vai pum. Cunak cun misual ka si ti ai hngal. Kha kong a theih le cangka evangelist Jonh Lawson nih ava fuh i Khrih co ding in a cawnpiak. Ai kenmi Baibal cauk te ai chuah i a van kau i, Pathian nih vawlei kha a dawt tuk caah a Fapa ngeih chunte kha a peek, cucaah a mah a zummi paoh cu….” ati thlu in Anthony kha dengteo in a hmai ah a zoh i …’ nangmah dawh an telh cu’ a van ti.

Cun a relmi a van peh an thi ti lai lo, zungzal nunnak an ngei lai,” ati thlu in ‘nangmah dawh an telh cuh,’ ati than. Anthony cu a lau. Keimah zudingpa le chiatnak i a khatmi Pathian nih a ka dawt ti cu asi in asi kho bak lo. A thiangmi Pathian nih a keimah tuktak te hna cu a ka dawt bal ding asi loh ati i a kuttum in cabuai kha faktak in a cumh pah in, A zumh in ka zum lo,” ati. Khale caangka, Lawson, mi bialeh a thiam tuk mi nih, thinhung lote in bia a hal.

Kum zeizat dah ralkap rian na tuan, ati. Anthony nih, Kum 21 le ni 14, ka tuan,” ati. Lawson nih ai lak zau i cabuai kha a kuttum in a cumh ve i, Ka zum naisai loh,” ati ve. Cule cangka mipa nih, Lih a ka chimh tiah maw na ruah? tiah ati. Kum 21 le ni 14 ka tla, ti cu ka zum bak loh, tiah Lawson nih a nawlh. Mah hnuah Anthony nih a inchungnu kha, Ka lehhmah ca kha hei la law van pu, tiah a fial.

A va lak i a van put. Cu hnu ah Lawson nih, Pathian Bia hmanh na zumh lo cangah zeitin dah mah ca te hna cu ka zumh khawh la le? tiah ati. A Baibal ca kha ai laak zau i a rel ciami Johan 3:16 kha a rel than. Mah le cangka Anthony chunglei mit cu biatak nih a van ceuter i a nunnak a van khen. Ee ka hmuh cang, ka zumh cang. Pathian cungah kai lawm, ati. Cuticun a rak zumh lomi kha a zumh cang.

Khamhnak a co i khamh ai fiang cawlh. Rom 10:9,10 hi rel ta hmanh. Na kaa in Jesuh cu Bawipa asi tiah na ti i amah cu Pathian nih mithi hna sin in a thawhter tiah na lung in na zumh ahcun khamh na si lai. Zeicahtiah kan lung in kan zumh i Pathian he remnak kan hmu: kan kaa in kan chim i khamh kan si. Nizanah kan hmuh cang ko khah.

Baibal cu Pathian nih thaw a chuah hnawhmi asi i mei bantuk asi ( Sam 119:105). Cun tii bantuk zong asi i kan zumh le cangka a kan hrinthan ter (Johan 3:5; 1 Peter 1:23). Pathian bia zumh ai harhmi na si sual maw? Anthony bang zum cang ko. Nan chungkhar le nan buu ah a hrinthan lo an i tel sual maw? Nihin kan relmi te hi chim chin ve. Bawipa nih thluachuah a peek ko lai. Amen and Amen!! Na siaherhmi an um le zaangfahten SHARE ve hna. Zarhpini asi le Bawipa rian tuan ko hna usih. Credit: Rev. Dr. G. Zathio

Be the first to comment

Leave a Reply

Your email address will not be published.


*