PORHLAWTNAK IN KA CHIMMI A SI HRIMHRIM LO. DR RUAL UK

Biaknak Inn Cu Khar Asinain Biakinn Cu Khar Asi Lo.Pathian a um lo tiah a titu China Comonist Party khualipi pakhat Wahun in a chuakmi. Pulhrai (Covid 19) nih minung kut in sakmi Pathian kan biaknâk inn cu kum khat dengmang a khar cang. (Kan boruak zoh tik ah tu kum chung cu biaknâk inn hi khar dawh a si.)

Kawhhran (Khrihfabu) kip ah cheu hra cheu khat le thawhlawm a zor thluahmah i member tam deuh cu kan thlarau thazâng zong a zor thluahmah cang. Zeicatiah zarhpi zing ah thlarau lei thazâng kan lak tawnnâk biaknâk inn cu pulhrai nih a khar caah a si. Sihmanhsehlaw Biaknâk inn cu khar asinain Biakinn cu khar a si lo timi Biatak hi zûmtu kip nih kan hngalhfian a herh tak takmi a si.

A ngai ngai ti ahcun Biakam Thar Baibal nih minung kut in sakmi Biaknâk inn ( dik lo ngai in Biakinn tiah kan timi ) hi a hngalhpi mi a si lo. Cân zei maw zat cu Jerusalem kawhhran nih khan minung kut in sakmi Judahmi hna Țempal kha an i hrawm tak tak ko. Lam. 2.46. Asinain Jesuh ralchanhtu Judah hruaitu hna nih an Pastor Peter le Johan kha an tlaih hna i thong ah an thlak hna. Lam.4.3

Cu ri cun zûmtu hna caah Jerusalem Țempal cu an khar kanh hna i minung kut in sakmi biaknâk inn ah an i pum kho ti lo. Asinain Pathian sakmi Biakinn cu khar khawh a si lo caah Pathiam Biak le Thangțhat le Rianh kha an ngol hlei lo.Pulhrai (Covid 19) nih biaknâk inn a khar lio ah hin Pathian Biak le Thangțhat le Rianh hna hi kan ngol sual ah cun Biakinn tak tak cu khar a si lo timi biatak hi kan hngalh ding zat in kan hngalh lo caah a si kho ko.

Baibal nih ‘Nan pum cu nan chungah a ummi Pathian sin in nan hmuhmi Thiang Thlarau Biakinn (Țempal) a si tiah a ti.1Kor 3.16. Hi biatak hi na hngalh tak tak ah cun a bupi in Pathian kan biaknâk inn kha pulhrai nih khar hmanhsehlaw pumpak in siseh chungkhar in siseh Pathian biak le thangțhat le rianh kha na ngol hlei lai lo.

Pathian zângfahnâk thawng lawng lawng in kei le ka inn chungkhar zong biaknâk inn khar a si thok in zarhpi voi khat te hmanh tlolh lo tein Pathian kan biak kan thangțhat i kan rianh lengmang ko. Bawipa ram caah thawhlawm thawh zong kan tlolh hrim hrim lo. Hihi porhlot ruamkainâk lei in ka chim hrim hrim lo.

Minung kut in sakmi biaknâk inn hi pulhrai nih khar hmanh seh law Pathian kut in sakmi Biakinn tak tak kan pum le kan lungthin Thiang Thlarau Biakin tak tak cu khar a si hrim hrim lo ti hi zûmtu vialte nih kan hngalh fian a herh caah ka chimmi a si. Thiang Thlarau Biakinn (Țempal) tak tak cu kan pum hi a si ti hi na hna le na thluak nih cun a rak theih cang hmanh ah na nunnâk tak tak nih a hngalh lo ah cun minung kut in sakmi biaknâk inn khar a si ah hin Thlarau biakinn zong khar chih a si lai i thlarau lei thazâng la kho loin na um sual ko hnga. Cuticun BIAKNÂK INN CU KHAR asinain BIAKINN CU KHAR A SI LO Timi hi na nunnâk ah a fian tak tak a herh.Credit: Dr Rual Uk

Be the first to comment

Leave a Reply

Your email address will not be published.


*