PATHIAN SIN AH THAZAANG LAK CAAN NGEIH KAN HAU

Pathian Sinah Thazaang Lak Caan Ngeih Kan Hau. Luke 22:39, 40. Cun Jesuh cu a chuak i atuah tawn bantuk khan Olive tlangah ava kal i a zultu kha a sinah an kal ve. A hmun kha a phak tikah annih cu a thawh hna i, Tukforhnak chungah nan tlak sualnak hnga lo thla cam tuah u,” ati hna. Jesuh Khrih nun kan zoh tikah cawn ding kan ngeimi pakhat van langhter ka duh. Rian tuan ai thok lai ah ramcar ah ni 40 le zan 40 rawl a ul.

Tukforhnak a tei (Luke 4:1-4). Riantuan ai thokka zongah tuanten a tho i ramlakah thla acam. Peter te nih an va kawl tikah thlacamnak ah an va hmuh (Mark 1:35-37). Lamkaltu a thim hna lio zongah tlangcung ah a kal i zaan
khuadei thla a cam ( Luke 6:12). An tlaih lai zaan zongah Gethesemane dumah thlacam ah a kal. Peter le a hawile zong kha hitin bia a chimh hna: ” Tukforhnak chungah nan tlak sualnak hnga lo thla cam tuah u.” ( Luke 22:40,46).

Cucaah kannih zong rian biapi kan tuan cang la kan ti paoh ahcun Pathian sinah thlacamnak in thazaang kan laak lengmang a herh. Khua pakhatah thinghau thiam tak a rak um. Amin cu Lass asi. Mino tampi zong asin ah thinghau an cawng. Amin a thang tuk. Anih cu thing a hau hlanah a hau ding thingkung kha aingiat ta hna. A haunak zawn, an tluuknak ding, zei kung in dah ka thok lai ti tiang thaten a tuak hmasa.

Cun a hreitlung haa le afang kha thaten a.chek. A fang kha a taat lawng si lo in puanchia ah chiti a toih i cu puan cun a tuam hmasa..Thing a hau tik zongah ai din i a hreitlung ha le fang kha a zoh cikcek than hna. Thing hau zuamnak puai an tuah. Eris he an i zuam. Eris cu tlangval no, pa cak tak le muidawh zong asi. A chuak thiam fawn. Hiti zoh ahcun Eris nih a tei lai an ti dih. Kung 10 veve hau ding asi.

An van thok cu an thawng tuk veve. Kung li an taang veve cang. Khatikah Lass cu ai din i a hreitlung fang kha chiti a thuhmi puanchia in a tuam le a thu ta. Eris tu cu chet lo maw tiin a vang tang. Kung hnih lawng a tang. Lass a tho than ve. Eris nih adonghnak thingkung a van tuk bak ah a hreitlung fang a beuh daih ai. Hehlaw pasal avan ti i ai tuk sek zongah afang nih thing kha a tei ti lo. Lass nih avan hau ceomo i a dongh nak ah Eris cu a tei i pakhatnak a hmuh.

A tulio te le bang cu ram chung um kan si ah ramleng um kan si ah kan taksa, kan thinlung le kan thlarau tha a ba dih hna. Mah lio caan ahhin kan herh cemmi pakhat cu Pathian sin ah thlacamnak in thazaang lak hi asi. Zumtu nun cu raldoh nun asi ti cu kan hngalh dih. Satan le a pati hna teinak dingah kan hriamnam tha bik cu minung sermi hriamnam le thazaang an si lo. Jesuh nih a Pa sinah thlacamnak in thazaang ai lak bantuk in kan’ nih zong kan Pa le kan Pathian sinah thazaang lak hi tlolh hrimhrim hlah usih tiah Pathian bia chirhchan in kan sawm than hna. Bawipa nih aherh ati ning in thluachuah kan pek piak than seh. Amen! Credi: Rev. Dr G. Za Thio

Be the first to comment

Leave a Reply

Your email address will not be published.


*