PATHIAN DAWTNAK A NGAN ZIA, COVID-19 NIH AA KAN DAWN LO.

Cinthlaknak Ah Covid-19 Nih A Kan Dawn Lo.​Pathian dawtnak le lamhruainak hi a ngan i a ttha tuk hringhran. Minung nih hin ruahchannak cu kan ngei ko nain thaizing hi kan hmu kho taktak lo. Thaizing kan hmuh rih lomi, kan pal rih cio lomi kong ah lungre thei in kan um sual tawn. Timhtuahnak fel hi ahohmanh nih an soisel bal lo, a uar lomi zong an um lo.

Nunnak ah rian kan ruahning, thazaang kan chuahning hi a biapi ngaingaimi a si. Thaizing ah zei kan lawh lai kan hngalh lo caah atu timi nihin na caan ttha bik na ngeih lio ahhin, ka rian ka lim manh sual lai lo, ka minung hawi ka daw manh sual lai lo, Khrih khamhnak thawngtthabia ka chim manh sual lai lo, ti ban tuk, in ruat law rian ttuan ko, ti hi a biapimi lungput le timhtuahnak a si.

A herh tuknak zawnte ahcun i hneek deuh zong a hau ko lai.Covid-19 zawtnak rungrul pulrai nih vawleipi a hun den tikah a lamkip in kan zaw, kan ttih, kan tha a chia. Zung kai a si ti lo, pumh khawh a si ti lo. Duh paoh in khualtlawn khawh a si ti lo. Asinain pumpak in rian ttuan hlah u tiah cozah le ngandamnak lei nih an kan thlauh hrimhrim lo. An kan thlauhmi le runvenmi belte cu a herh lo ah mibu sinak ser hlah u, ttha te in i zohkhenh u, mibu run veng tti hna usih ti tu kha a si.

Lai khuate kan unau hna hi zeidah an lawh ve hnga ti cu ruah lo awk a ttha lo. Pathian dawtnak a ngan zia cu, dum le lo rian an tlawlh hna lo, an cinthlakmi hna zong an ttha ngaingai hna. A kan cawmtu vawlei cu zawtnak rungrul nih hna a hnawh kho lo. Jakob nih a fale caah Pathian sin i thluachuah a hal piakmi hna vawlei rim thaw, van dap ttha timi kha lungthin ah a hung chuak.

Thlanglei Laitlang kan unau hna nih an i tthathnempi ngaimi tawlre ba cinthlak zong kha chaklei ummi hna zong nih kan hun uar khawh ve cang i, fingtlang kip ah kan cinthlak khawh ve hna. Dum le lo kan kal ahcun zeitluk in dah kan tha a nuam, thlizil kan dawp, Pathian sermi fing le tlang, tiva hna he hawikomhnak kan ngei kho. Kan vawlei rimte a thaw tuk ee. Rev Dr Lal Pek Lian (IBC)

Be the first to comment

Leave a Reply

Your email address will not be published.


*