NUNNAK TAK CU ZEITINDAH KAN CO LAI? REV, DR. ZA THIO

Nunnak Tak Cu Zeitindah Kan Co Lai? 1Johan 5:13, Pathian Fapa a zummi nih zungzal nunnak kan ngei ti kha nan i hngalh khawhnak lai hi ca hi kan kuat hna. Mirum tlangvalpa pakhat nih Jesuh kha a fuh zau i hitin bia a rak hal bal. Athami saya, zungzalnunnak hmuh awkah zeidah ka tuah lai? Mah mirumpa hi atu chan mirum tampi nak cun uar a um deuh. Anih cu a rum ngai nain zungzal nunnak kong a buaipi.

Mirum tampi cu zungzal nunnak hnak in i nuamh le ngeih chin lengmang lawng an ruat. Hi zawn ahcun uar a um ngai. Asinain bia hal ai palh. Zungzal nunnak hmuh awkah zeidah ka tuah lai ti lo in Jesuh kha, “Zungzal nunnak co dingah zeidah na ka tuah piak lai?” rak ti ding deuh asi. Zeicahtiah zungzal nunnak (Nunnak tak) cu kanmahten tuah i co khawh asi lo, cun cawk khawh zong asi lo.Jesuh nih a lak in, man lo in a kan peekmi asi.

Amah tuah ding in a hal tikah nawlbia zulh a fial. Kha tikah ai ruah palh i ka no lioten ka zulh ko tiphun in a leh. Khan Jesuh nih a zulh khawh lozia a hngalhter. Misifak kha na chawva va then hna ati tikah a chai ti lo, hmaichia le ngaihchia ngai in a kir ti kan hmuh (Luke 18:18-23). Nawlbia cu a tha tuk nain sual i a tlu cangmi minung ahohmanh nih zulh khawh a rak si lo. Nawlbia san a tlaihnak cu kan sualnak hngalhter kha asi ko (Rom 3:19,20).

Asikunah nunnak tak cu zeitindah kan co kun lai? Ahar hrimhrim lo, zeicahtiah Pathian nih alak in a duh le ti hal in a hal mi paoh a kan peek. Johan nih hin nunnak kong hi uar cem in akan cawnpiak. Baibal cang tampi tial ding a um nain pahnihte lawng kan zoh lai. Thaten rel hna hmanh. Johan 3:16, Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei cang.

Hika zawn i vawlei timi hi minung dihlak a chim duhnak asi, fingle tlang le ti an si lo. Nangmah le keimah kan si. Cun amah a zummi paoh ati caah, na zumh duh le zumh duh lo lawng asi ko. Cucaah kan lung fiannak ah keimah dirhmun in van tial ning. Cuticun Pathian nih Za Thio kha a dawt tuk caah a Fapa ngeihchun (Jesuh) kha a peek. Za Thio nih a zumh ahcun a thi ti lai lo( hellah a tla lai lo), zungzal nunnak ( nunnak tak) a ngei cang.

1Johan 5:13, Pathian Fapa a zummi nih zungzal nunnak kan ngei ti kha nan i hngalh khawhnak lai hi ca hi kan kuat hna. Pathian Fapa ( Jesuh Khrih) a zummi ati ko hi mu. Tipil ingmi, bu ah a lutmi, miding le mi tha, Bawipa zanriah a eimi, thawhlawm a pemi, mi nun-tha, mifim le cathiam, tbk, ati lo hi mu.Cun a zumh hnu ah a felmi le a dingmi ati fawn lo hih. Van zumh bak khin zungzal nunnak an ngei ati ko hih.

Zungzal nunnak kan ngeih hnu in dawhawh tipil in phung asi cuh. Nunnak tak kan ngeih hnu in dawh Bawipa zanriah zong kan hman la cuh. Nunnak tak kan co hnu in dawh, kan chawva zong kan pek la cuh. Nunnak aco cangmi dawh khrihfabu member tling zong an si cuh. Khamhnak kan co mi cu Pathian laksawng asi (Efes 2:8,9). Kan zumh le cangka khamh kan si. Khamh asimi paoh Pathian kutchuak le serthanmi kan si.

Cuhnu cun Pathian duhmi thil tha kha kan tuah phung asi (Efes 2:10). I palh citcet lai ci aw! Vawlei cung ralpi a thawh lioah himnak dingah tiin khur thuk pipi hi inn kamah an i cawh cio. Bom thla ding vanlawng a rat cun khurah an zaam tawn. Voikhat cu vanlawng a hung zuangmi an hmuh caah pafa hna pahnih cu khur ah zuang ding in an tli. An khur a thuk ngai. Apa azuang hmasa. Khan a fanu kha hung zuang ati.

Afanu nih a ngamh lo. Apa nih nute hung zuang bai ati nain a ngamh thiam loh. Zaan asi i apa kha a hmu kho lo. Asinain apa nih, Ka fanu nangmah na ka hmuh a herh lo, keimah nih kan hmuh ko, a vanti. Khale cangka a fanute cu hnangam tak in ava zuang. Apa nih a rak pomthap le ai lawmtuk. Nang zong nangmah nih Jesuh na hmuh kher a herh lo. Amah a panhmi paoh cu a kan hmuh i a kan cohlan ko.

Johan 6:37 ah, Ka Pa i a ka pekmi paohpaoh cu ka sinah an ra lai i ka sin i a rami paohpaoh cu ahohmanh ka dawn hna lai lo,” tiah Jesuh nih ati. Angaite tiah cun Jesuh cu pei nunnak tak cu asi ko cu (Johan 14:6). Jesuh ngeih cu nunnak tak ngeih asi ko. An hngah ko, an sawm ko, asin na kal paoh ahcun an cohlan cawlh ko lai. Nangmah nawl asi ko hih. Bawipa min thangthat si ko seh! Amen.Credit: Thio Za

Be the first to comment

Leave a Reply

Your email address will not be published.


*