NIHIN CAAH PATHIAN BIA, THLACAMNAK LAKSAWNG

Nihin Caah Pathian Bia, Thlacamnak Laksawng. 1Sam.12:23 Nan ca i thlacam ka ngol thawng in Bawipa cung i sualnak ka tuah hnga cu ka duh ding naisai a si lo. Acunglei bia hi biaceihbawi le profet zong asimi Samuel nih Israelmi a chimh mi hna asi. An thin a phan lioah a chimhmi hna asi. Samuel cu a rian in ai din cang lai. Sihmanhsehkaw a miphun caah a tuah khawhmi a tang rih.

Cucu an ca i thlacam piak kha a si. Eas-West i rian a ka thokpitu Dr. Bob Livesay he bia a phunphun kan i ruah tawn. Aka chimhmi pakhat cu atu tiang ka philh kho lo. Ka rian in kai dinh hnu cun kei cu midang caah thlacam rian ka tuan cang lai” ati. Samuel he ko an i lo. Cu hnute cun kei zong khua ka ruat ve. Kum 75 hnu i ka nun rih ahcun ka rian biapi cem ah thlacam hi kai hmaithlak la ka ti ve.

Hiti ka ti tikah, kan kum a upat lawng ah thla kan cam lai ka tinak asi hrimhrim lo. Atute hin midang caah thla hi kan cam ding asi. Kan hawile caah laksawng tha bik kan peek khawhmi hna cu an ca THLACAM PIAK hi asi. Kan hawile le midang caah chaw le va le phaisa laksawng kan thenh khawh hna lo zongah asung tukmi thlacam piaknak laksawng thenh awk kan ngei ko.

Samuel bia kha thate in van ruat ta u sih. Israelmi ca i thlacam piak lo cu Bawipa cung i sual tuah tluk in a hmuh caah thlacam piak lo cu Ka duh ding naisai asi lo” ati (1Sam.12:23). Vawikhat cu Englandram tarnu pakhat kha hlautu ngei bang zantim let ah a tho i tuangah khukbil bak in thla a cam.Rammui ca thlacamnak a tuah. Sau ial a cam hnu ah vision bak tuk in Afrikaram caah a van cam lioah mipa pakhat ihkhun cung i thidengmang phun in a itmi kha a hmuh.

A innkam i mi pawl nam he an dir zong a hmuh. Cutikah thinglung dihlak in mipa caah thla a cam. Tlawmpal hnu ah mipa cu a dam i a ihnak in a tho hlut. Cu le cangka mi zong cu a inn khan an tin a hmuh. Mah kong cu a dairi cauk ah ani thla le a caan he a tial.Kum hnih a rauh ah an biakinn ah Afrikaram i missionary a tuanmi pa tehte a hung khang. Tarnu nih a zoh tikah thla a cam lio i a hmuhmi kha asi ti a hngalh.

Cucaah pumh tin hnu ah a ton i bia an i ruah. A tonmi le a hmuhmi kha a chimh tikah missiinary pa cu ai lawm tuk i tarnu cu a kuh i a tap thluahmah. Fikfa nih a rak seh ruangah thideng i a zawtnak le Afrikami nih a thih le cangka asa ei an timhnak kong kha a chimh. Tarnu nih thla a cam ni le caan he ai kaih ko.Thlacam piak a sunlawi ning le a hmual ngeih ning cu tuak ko hmanh.

Zumtu si cu a rak tha in a rak hlawk tuk. Kan caah Jesuh Khrih nih thla a kan cam piak (Rom. 8:34, Heb 7:24, 25). Cun Thiang Thlarau zong nih Pathian kha a kan nawl piak (Rom.8:26). Culawng hlah, zumtu unau tampi zong nih thla an kan cam piak lengmang. Kei hna hi atu tiang ka nun le ka dam le Bawipa rian ka tuan khawh rih hi kan nu le ka fale le dawtu hawikom hna nih thla nan ka cam piak caah asi.

Paul- phung lawng a chim lo, midang ca le khrihfabu caah atu le atu thla a cammi asi (Efes 1:15-17, 4:14-18). Cucaah mah capar tawi a relmi u le nau le fale nan dihlak, midang ca i kan laksawng hi an ca thla kan cam piakmi hna hi si ko seh. Kan campiakmi hna nih an theih lo zongah Bawipa nih a theih ko. Cun san zong a tlai tuk ti philh hlahu sih.

Hla i kan sak tawnmi Nang ca thla kan cam piak nang ca thla kan cam piak nang ca thla kan campiak ..nang ca thla kan cam ti asi bang, midang le ram le miphun caah biatak deuh in thlacam tang hna usih. Thingkuang le zal sanh hau lomi, a sunglawi tukmi thenh ding laksawng kan ngei. Cucu THLACAMNAK LAKSAWNG hi asi. Bawipa nih a reltu, sharetu le hmang chintu thluachuah in pe hna seh. Amen! Credit: Rev. Dr G Zathio

Be the first to comment

Leave a Reply

Your email address will not be published.


*