NIHIN CAAH PATHIAN BIA. THIAM COTERNAK( JUSTIFICATION)

Thiamcoternak ( Justification)Rom 4:8, Pathian nih sualnak a tuah mipa, a sualnak sual i a relpiak lomipa cu a vaa lawm dah! Rom 5:1, Atu cu zumhnak thawng in thiamcoter kan si caah kan Bawipa Jesuh Khrih thawng in Pathian he kan i rem.Biatak hi cu an rak tha tuk eh. Cuhmanh ah khamhnak kong he ai pehtlaimi biatak hngalh le i fian ko hi zumtu kan caah a sunglawi tuk.

Thiamconak kong thate hngalh le i fian le bang cu hna a ngam tuk. Cun nun zong a bawm tuk. Mah kong hi chim le phuan kan daithlang ngai. Cucaah nihin i tawite i ka tialmi hi na rel dih hnu ah Pathian bia ka telhmi zong hi nai manh tikah rel te hmanh, an bawmh tuk lai. Thiamcoter ti a sullam cu sualngaihthiam, asi lo, dantatnak i luatter ti lawng nih a zaat lo.

Athuk deuh. Paul nih a chim bang, sualnak a tuahmipa a sualnak ngaihthiam asi lawng hmanh si lo in, a sualnak kha lang lo ding in khuhpiak dih hnu ah, a sualnak kha sual i relpiak lo khi asi ( Rom 4:7,8). Hallelujah! Mi vialte hi Baibal thaten kan zoh tikah kan ruahnak (Math 5:28), kan biachim ( Math 12:34-37) le kan tuahnak (Phung 6:16-19) ruangah Pathian lung a tong lomi tazakhan( criminal) lawngte kan si.

Hosea 7:2 ah, An sualnak nih khan a kulh hna i ka hmaika khan an luat kho lo, atimi minung kan si dih. David nih cun Sam 51:4 ah, Ka sualnak cu nangmah cungah asi..a thalo ah na ruahmi kha ka tuah… bia na ka ceih tikah na hman….sual na ka phawt tikah na ding,” ati kha. Cucaah kan zate in tazakhan le dantat ding lawngte kan si.Asinain Pathian nih a kan dawt tuk caah kanmah aiawh in Jesuh Khrih kha vailam cung ah dan a tat.

Mah kong cu Isaiah 53:6,11,12 chungah fiangten kan hmuh. Aruang cu Jesuh Khrih a zummi paoh kha kan sual a kan ngaihthiam lawng hmanh si lo in an sual lo tiah puh i thiamcoter a kan duh caah asi ko (Rom 3:25,26). Paul nih,” A thisen thawng in thiamcoter kan si cang,” ati ( Rom 5:9). Thawngtha a thei i Khrih a zummi paoh cu Pathian nih Khrih thisen ruangah kan sualnak a hmuh ti lo pinah, Khrih dinfelnak kha kan dinfelnak ah a kan relpiak ( I Kor 1:30; 2 Kor 5:21) cang caah an sual lo tiin thiam a kan coh cang.

Mah Baibal caangte hin thazaang i lak hna usih: Pathian thimmi cu ahonihdah sual an puh khawh hna lai? Amah Pathian hrimhrim nih pei, NAN SUAL LO tiah ati hna cu,” ( Rom 8:33). Bawipa min thangthat si ko seh. Amen. Merlin Carothers cu vawleicung ralpi pahnih lio ah thilti sualmi a ngei i taza an cuai. Kum 5 thong thlak ding asi. Asinain biaceihbawi nih thongtla lo in ralkap rianah kum 5 peh seh, a zam bel le thih hlanlo thongthlak siseh ati caah ralkap rian ah an luhter.

Kum 5 tlin hlanah na chuak kho cang ti caa ara. Biaceih zungah a taangmi caan hi zeitin dah ka si lai tiah a va hal. Kha tikah biaceih zung nih, Kan rampi tamadah Truman nih tlamtling tuk in an ngaihthiam.Upadi a buar lo i sualnak a tuah bal lomi bantuk in thiam an coh cang caah, na duhning paoh in na um kho ko,” an rak ti. Anetnak ah a hrinthan i cauk minthang Prison to Praise a tial. Mi tampi nih an relmi cauk asi.

Thiamcoternak asimi hna cu phuhrunnak an ngei ti lo. Thiamcoter kan si cang caah Khrih thawng in Pathian he kan i rem ( peace with God). Laksawngah Thiang Thlarau kha a kan peek i Pathian nih a dawtnak zong a toih in a kan toih fawn ( Rom 5:5). Culawng hlah, Khrih nih Pathian hawikom ah a kan ser caah Pathian ah kan i lawm rih ( Rom 5:11). Bawipa nih ca reltu, share tu le chimchintu kan umpi in kan huppheng ko seh. Amen. Credit: Rev.Dr.G Za Thio

Be the first to comment

Leave a Reply

Your email address will not be published.


*