NIHIN CAAH PATHIAN BIA: SUAL NGEIHCHIHNAK. BY, REV.DR G. ZA THIO

Sualngaihchihnak ( Repentance):Lam 20:21, Judahmi nan si ah Jentailmi nan si ah, Pathian hmaiah nan sualnak kha i ngaihchih i kan Bawipa Jesuh zumh ding kha, nan dihlak in kan fawrh hna. Nizan ah kan palhmi hngalhternak kong kan zoh cang. Nihin cu a biapi tukmi sualngaih chihnak kong kan zoh rih lai. Ka palh ti i hngalh zongah kan sualnak kan i ngaihchih lo ahcun khamhnak kan co hlei lai lo.

Judas Iskariot zong a palhnak ai hngal i a ngaih a chia tuk ko na in ai ngaihchih lo caah ai awk le athi ko khah. Cucaah sualngaihchih hi a herh taktak mi asi. Johan nih mipi kha a fial hna (Math 3:2), Jesuh zong nih mah kong hi a chim ve ( Math 4:17). Cun Peter nih a hmasa bik a phungchimnak ah bia a halmi hna kha a fial hna ( Lam 2:38). Paul nih acunglei i kan hmuh bang Judahmi le Jentailmi he sual i
ngaihchih ding in a fawrh hna ( Lam 20:21).

Mah kong hi kan Cathiang chungah voi 100 reng lo kan hmuh khawh. Ifian khunnak ah sualngaihchih asi lomi hna hngalh kan herh. Cuhna cu sual i hngalh, sual tuahmi ruang i ngaihchiat, tuah tawnmi sual kha tuah ti lo ( zudin i let, kuak zuk i let tbk.), ti te hna i sualngaihchihnak an tling lo. Sualngaihchihnak i ai telmi hna cu:

Pakhatnak. Ruahnak i thlen ( change of mind) Pahnihnak. Lungthin cawlcanghnak ngeih ( change of feeling). Ngunkhuai khawlpa kha a sual ai hmuh tikah a tang ai cum ( Luje 18:13). Pathumnak. Duhthimnak ai thleng ( change of will) Palinak. Nunning ai thleng ( change of cunduct) Sualngiahchihnak kong i tahchunhnak thacem cu Jesuh chimmi fapa hniangpa kongah kan hmuh.

Acheu nihcun fapa tlaupa kan rak ti tawn khah ( Luke 15:11-20). Tawro in a thut ai hmuh tikah a lung a hung fim i a ruahnak le a feeling ai thleng ( Luke 15:17). Ai tinhmi zong ai thleng. Phundang i chim ahcun a duhthimnak ai thleng i ‘ Ka tho lai i ka pa sinah ka kal lai’ ati ( Luke 15:18). Khan a tho i a kal taktak. Mah nih a langhtermi cu a nunning hrim ai thlen cang ti hi asi ( Luke 15:20).

Fapa hniangpa lawng sualngaihchih a herhmi asi lo. A u pa zong a herh ve ko nain ai ngaihchihnak kong kan hmu lo. Cucaah a tlau vemi asi. Minung mit hmuh le mah i hmuhnak ah mitha asimi hna zong Pathian hmai ahcun miding le mitha tling kan um lo. Job kong kha ruat hmanh. Pathian bak nih Satan a chimhmi kan rel bal ko. Soisel awk um lo, miding, Pathian a tihmi le thatlonak a mertakmi ati ko bu ah (Job 1:8), thlaraulei dirhmun cun sualngaihchih a herh ve ko.

Cucaah Job nih Pathian kha amit in avan hmuh tikah cun hitin ati cang. Cucaah keimah le keimah cu ka hua ( ka fih) i leidip le vutcam lakah thu in kaa ngaihchih, ati ( Job 42:6). Amen! Sual i ngaihchih hi Pathian laksawng asi (Lam 11:18). Sual ngaihchihnak a chuah tertu hna cu thawngtha theihnak ( Lam 2:38-41), Pathian thatnak ruang ( Rom 2:4), kan nun a rocar tuk i lungkuai le ngaihchianak kan tonmi te hna hi an si ( Sam 78:34; Job 42:5,6; Luke 15:17).

Hitin van dongh ter ning. Nan thin hung hlah seh. Sual ngaihchihnak a ngei rih lomi cu a hrinthan lomi an si caah khrihfa tak cu an si rih lo. Sual ngaihchihnak lo cun sualngaih thiamnak co khawh asi lo i Thiang Thlarau zong co khawh asi lo ( Lam 2:38). Pathian nih a Thlarau in kan fianter ko seh! SHARE ko, a herhmi an um ko lai. Credit: Thio Za

Be the first to comment

Leave a Reply

Your email address will not be published.


*