NIHIN CAAH PATHIAN BIA: KHRIH THISEN LO CUN, REV DR G ZA THIO

Nihin Caah Pathian Bia ( The Word of God for Today ) Khrih Thisen Locun ( Without The Blood of Christ) Heb 9:12, Cun phungbia ning cun zeizong vialte hi thisen in thianhter dih an si i thisen luanh locun sualngaihthiamnak a um kho lo ( Without shedding of blood there is no forgiveness). Biakam Thar cauk rel tikah a herh taktakmi Locun ti pathum an um. Cu hna cu Khrih Thisen, Zumhnak le Keimah timi an si. Khrih thisen lo cun sual ngaih thiamnak a um kho lo.

Zumhnak lo cun Pathian lung ton khawh asi lo. Keimah (Khrih) locun thei tlai khawh asi lo. Nihin cu Krih thisen locun sualngaihthiamnak a um kho lo ti kan zoh hna lai. Baibal Hlun chung thaten kan rel ahcun Pathian nih minung sualnak kha zeitik hmanh ah thisen lo in a ngaithiam bal hna lo. Thisen a herhnak hi Genesis ah a lang hmasa.

Adam le Eve caah Amah Pathian bak nih satil a thah i hnipuan a serpiak hna i a aih hna(Gen.3:21). Kain le Abel zong nih rai an thawi tikah Kain nih thisen a ngei lomi in rai a thawi caah Pathian nih a cohlang lo. Thatein tuah ko ati zongah a duh lo i a nau lehlam a thah (Gen.4:1-8). Moses sin in thaten a chimh hna. Nunnak cu thisen chungah a um caah thisen kha Amah Pathian he remnak caah biakthengah nan pek lai ati hna (Lev.17:11).

Cathar kan rel tik zongah fiangten kan hmuh. Zanriah an ei dih ah Jesuh nih a zultu hna kha, Hihi nan zate in ding u. Zeicahtiah hihi sualngaihthiamnak ca i thletmi biakamthar fehternak KA THISEN asi ati (Math.26:28). Johan zong nih Kannih cu a kan dawt i a thisen hrimhrim in kan sualnak chung khan a kan tawl cang ati ve (Bia.1:5). Atak kan ti ahcun khamh kan si le sualngaihthiam kan si hi Khrih thisen thawng lawnlawng in asi (Efes.1:7; 1 Johan 1:7; Heb, 9:12-22).

Cucaah THISEN LOCUN sualngaihthiamnak a um lo ti kan fian a hau. Hihi vailamtah biatak ah ai telmi asi. Vawlei cungah hin thil tampi lo in kan nung kho ko. Motor, sehbing, elekttrik, hanfawn, video, kedan, vanlawng, tibantuk hna tel lo in kan rak nung kho ko. Asinain thlitu, tii, ceunak le rawl locun kan nung kho lo. Cuban tuk in khrihfa kan sinak dingah, asi lo, vancung kainak dingah kan herh lomi thil tampi an um.

Sualngaihthiam kan sinak lai Khrih thisen locun a ngah bak lo. Hi ruangah pei Jesuh Khrih nih vailam cung i a thih i a thisen a luanternak asi cu. England ram an siangpahrang nu Queen Victoria cu misifak le mihar va len le tha va peek hi a hmang tawn. Vawikhat cu inn fate i a ummi tarnu a va leeng. Bia an i ruah i a lawi lai ah amah lawng khua asami tarnu kha, Zeidah kan tuah piak lai ati.

Tarnu nih, Zeihmanh ka herh lo, ka tlamtling dih ko Bawinu tiah a leh. Asiloh, thil pakhat in tuah piak ka duh ko eh, ka chim ko ati than Khan tarnu nih Tuah piak ka herhmi a um lo, Bawinu aw. Asinain hi thil pakhatte hi bia ka kamh kho law ka duh ati. Victoria nih Ka ti khawhmi asi ahcun kai zuam lai cu ati. Tarnu nih cun ai lak i, Vancung khua ah kan ton te lai tiah bia ka kam law ka duh bik ko ati.

Victoria Sianpahrang Nu nih cun, Bawipa Jesuh Khrih THISEN thawng in cucu ka tuah te ko lai mu a van ti. Ava sunglawi tak ve. Nang le kei teh Khrih Thisen in Pathian nih ka sual aka ngaihthiam cang i ka thih zong kei van ka kai lai kan ti kho cang maw? Hihi philh hlah, cun daithlanh hlah. KHRIH THISEN LOCUN sualngaihthiamnak a um lo. Maw Bawipa, na Thiang Thlarau in kan fianter ko mu, Amen. Credit: Thio Za ( Rev. Dr G Za Thio)

Be the first to comment

Leave a Reply

Your email address will not be published.


*