NIHIN CAAH PATHIAN BIA: JESUH HAWIKOM KAN SI ( WE ARE HIS FRIENDS)

Jesuh Hawikom Kan Si ( We Are His Friends) Johan 15:15, Nannih cu sinum kan ti ti hna lo, zeicahtiah sinum nih cun a bawipa tuahmi kha a hngal lo. Sihmanhsehlaw ka Pa sin in ka theihmi vialte kha kan chimh dih hna caah, ka hawile, ti tu ah kan ti cang hna. Zumtu nih kan comi laksawng tampi lakah a sung tukmi pakhat cu Jesuh Khrih hawikom kan simi hi asi.

Mirum le bawi hna hawikom si hna khi zeitluk in dah hngar an um. Mah nak i a sang deuh le a sung deuhmi cu Pathian zong asi i Khamhtu zong asi mi, zeizong vialte a ser i a zohkhenhtu Jesuh hawikom si hi asi. Hi kong thaten kan fiannle kan hman thiam ahcun vawlei nun hi hna a ngam tuk ko. Atanglei hna hi philh hlah usih, cun hmang thiam usih. Jesuh hawikom si cu:

Pakhatnak. Ai phundang rumro. Minung le minung i hawikomh asi lo, Pathian le minung i hawikomh asi. Abraham kha Pathian hawikom a rak si khah ( 2Cahn 20:7;Isa 41:8; Jame 2:23) 2. Pathian ai tangthum. Siangpahrang nih a eekrut sinum he ai kom bal lo nain Jesuh Pathian nih dahkaw ka hawile a kan ti cu ( Johan 15:15). Thil um bal lo ko a lo eh.

Pathumnak. Na pumpak hawi asi. Na hawi asi bu ah ka hawi asi ve. Zeitik caan paoh ah tlawlh lo in kan hawitha bik asi kho. Pathian vel hi cu amak tuk ee. 4. A nguh pengmi hawikomhnak asi. Keimah le nangmah nih dah kan hlawt tinlo ahcun anih nih cun a kan hlaw in a kan kaltak bal lo (Heb 13:5,6). Hi vawlei cung a ummi ami kha a dawt zungzal hna i annih cu a dongh tiang hrimhrim in a dawt hna tiah a biathiang ah kan hmuh ( Johan 13:1). Cucaah dawh an tlaih zaanah Judas Iskariot kha ” Ka kawi ( Ka hawi) khulrang in tuah ko, ati khah ( Math 26:50).

Panganak. Nunnak pek dawtnak asi. Johan 15:14 ah, Mi nih a hawile caah dawtnak ngan bik a ngeih khawhmi cu an ca i a nunnak pek hi asi, ti kan hmuh. Jesuh cu a nun lio zongah mi sual hna hawikom an rak ti ( Math 11:19). Misualmi kan caah a nunnak a pek hnu ah amah a zummi cu zungzal in a hawikom kan si thai.Amah bel rian kan ngei. Cu rian cu a har lo.Kan fialmi hna nan tuah ahcun nannih cu ka hawile nan si, ati.

Zei tuah hme a kan fial? Nawlbia pahra zulh maw? Si hlah. Atanglei van rel ah a kan fialmi cu kan hmuh. Pakhat le pakhat i daw u, ati ( Johan 15:17). Zumtu pakhat le pakhat kan i dawt ahcun Bawipa a lung ai lawm tuk. Cun kan rian dang pakhat a tang rih. Cu zong cu a har ve lo. Hawikom kan sinak hi Satan nih kan hnahnawh hlah seh ti a duh caah ralrin a kan pek. Vawlei hawikom si a duhmi paoh nihcun Pathian ral ah an i ser, tiah James nih ati ( Jame 4:4) caah vawlei he i hawikomh lo kan hau.

Jesuh hawikom kan si ko ahcun zeicahdah vawlei nun kongah kan ral a chiat i tihnak kan ngeih? Hlah ah pei kan sak kha. Kannih kan sual sifah ingtu,Kan hawi Jesuh asi lai.Pathian sinah kan duh vialte,hal ahcun a tha dah ngai, tiah kan sa ko nain kan hawi Jesuh min in kan hal tawn lo ( ZBC-307). Cun hla thiamah, Bawi Jesuh cu keimah caah hawikom tha bik asi,” tiah kan sa nain kan kom duh lo i vawlei he tu kan i kom ( ZBC-100).

Vawlei cung mifim cem Solomon nih, Unau hnak in a fek deuhmi hawikom zong an um ve,( Phung 18:24) atimi hi zumtu kan caah cun Jesuh hi asi ko ee. Vawlei kan hawikom cu thihtak an hmang, umnak i thial an hmang, cun mi bawm kho lo an si tawn. Jesuh bel kan sinah a um kho zungzal ( Math 28:20) i ai thleng bal fawn lo (Heb 13:8). Bawipa nih thlua kan chuah piak rih seh.Amen !!

NAWLNAK. NIHIN CAAH PATHIAN BIA ti tlangpi hmang in kum khat caah ka lim cang. Bawipa cung le careltu, sharetu nan dihlak cungah kai lawm. Ka tialmi kha cauk in voi khat chuah cang asi. Atuzong uk hnihnak chuah kan tim. Mah ai lim cun uk thumnak zong chuah than kan duh. Caan rem kan hngak ko. Thlacam kan bawm u.
Cun nichiar si ti lo in a tlangpi dang hmang in tial le thapek cu kai tim thiam ko. Mah ca zongah thlacam ka bawm rih ko u tiah Jesuh min in kan nawl than hna.Thaizing zong post kgawh kai zuam lai. By. Rev. Dr. G. Za Thio

Be the first to comment

Leave a Reply

Your email address will not be published.


*