NIHIN CAAH PATHIAN BIA: JESUH AHO NIH DAH A THAH? BY REV DR G ZATHIO

Jesuh Aho Nih Dah A Thah? Gal 1:4 Atu chan, chan tha lo chung hin kannih cu luatter awkah, Pathian kan Pa duhnak zulh in, Khrih cu kan sualnak caah ai pe.Voikhat cu pastorpa pakhat nih phungchimtu pakha a khrihfabu ah phungchim a sawm. Aphak le cangka thla an cam ti. Mah hnuah a sawmmi pa kha pastor nih hitin a nawl. Tuzing i phung na chim tikah taksa nuamhnak,nupa sualnak heiti phun cu chim hlah law a tha.

Mizeimawzat an thin a hung sual lai i an nuar sual la. Cun haukauhnak le duhfahnak kong zong chim duh hlah, mirum pawl nih an rem la lo le hmailei ah pumh an ra ti sual la loh ati. Asikunah zei kong hme ka chim ne hnga? tiah a hal. Cun pastorpa nih, Jesuh a rak thattu Rom ralkap hna kong chim ko.Zeicahtiah kan bu ahhin Rom ralkap an i tel loh ati. Kha pastorpa phun hi kan tam ngai la dah ka ti.

Jesuh a thattu hi Rom ralkap an si ti in a ruatmi kan um len ko lai dah.Aho nih dah Jesuh kha vailam thing cungah a thah set? Atanglei hna hi zoh hmanh. 1 Rom ralkap nih an thah, 2 Pilat nih a thah, 3 Tlangbawi hna le upa hna nih an thah, 4 Judas Iskariot nih a thah, 5 Kan sualnak nih a thah. Camipuai ban tuk in bia hal um seh law zeitindah na phit hnga? Thate le thuk deuh i ruah set ahcun hitin kan ti hnga.

Minung hna kan sual leiba champiak duhah Pathian hnatlak le tinh piak bang amah le amab kan caah ai pe le asi ko. Acunglei i Paul bia nih a fianter ngai. Sual biaceihnak in kan luatnak hnga caah Pathian kan Pa duhnak zulh in, Khrih cu kan sualnak caah ai pe ti kan hmuh ( Gal 1:4). Jesuh zong nih Johan 10:17,18 ah, Ka Pa nih a ka dawt cu ka nunnak kha pek ka sian caah asi.

Cu pek ka sian cu ka nunnak kha ka hmuh thannak hnga caah asi. Ka nunnak cu aho nih an ka chuh asi lo, keimah lungtho tein pek ka sianmi asi ko. Peknak nawl kha ka ngei i lakthannak nawl zong ka ngei. Cucu ka Pa nih tuah seh ti aka duhmi kha asi, tiah ati. Kan fiang ngai la ti ka zumh ko. Pentikos ni i Peter nih phung a chimnak zongah hitin ati ve.

Pathian nih Jesuh cu nan sin i pek awk ahkhan a rak ruah ciami le a rak khiah ciami asi bang in nannih nih amah cu nan thah, misualmi hna kha amah cu vailamtahnak thing cungah nan khenhter hna, ( Lam 2:23).Jesuh thahnak kong ah hitin kan tiah hin a fiang bik ko. A Pa duhnak in Jesuh nih a nunnak kha misualmi kan caah pek a sian caah misualmi hna nih i bawm in vailamtahnak ah an thah.

Hiti asi cu Pathian ral asimi kannih kha Pathian he kai rem i kan i hawikomh thannak hnga ding caah asi.( Rom 5:19,11; 8:7). Hitluk i kan chan a that lo le a chiat lio ahhin daithlang hlah usih. Paul bia bang, Pathian he i rem ko u tiah Khrih min in kan nawl hna, ( 2Kor 5:20). Pathian cu dong lo in sunparnak pek si ko seh!Amen. Credit: Thio Za.

Lailei Chungkhat Chimcio Usih: Hi thawngpang hi a biapi ngaingai mi thil a si caah thawngpang i thanhcio hna usih. Ralrinnak tluk in a ttha mi a um lo. Laitlang khuate kip ah Min Aung Hlaing hruaimi Ralhrang pawl an vak ngai cang. A cheu ralkap cu khuachung zong luh lem loin, khua a hel mi hna an um tiah Thantlang peng khuate pakhat sin in kan theih.Thantlang peng khuate cheukhat ahcun USDP party an tam, a poi khun mi cu USDP Party cheukhat cu khua ah bochan deuh mi hna an i tel caah khuami nih an ngamh tuk hna lo.

Ralkap lei ah a ttang mi an si ko tiah kan theih. Nai Ralkap nih rampi uknak hramhram in an lak bak khan Thantlang peng khuate tampi ah USDP thanthar (Flag) cu USDP party lutlai pawl nih an i thlai caah khuami cu an lau ngai ti asi.Khua nih bochan deuh mi an si fawn caah mino thinlung an zawt ter i cawlcang ngam loin a um mi an rak tam pi.Cun tutan zong ah Ralkap cheukhat cu khuachung ah an lut lo, nain thil sining an ngiat mi cu a um ko ti asi.

Cu caah USDP party nih kan thil tuah mi Ralkap sin an kan report lai ti an phan caah khua mino cheukhat cu a thinphang mi an um tiah kan theih fawn.Ralkap nih meithal nan ap dih lai timi thawngthanhnak an tuah bak in khua cheukhat ahcun Meithal a um zat a rel mi an um, USDP party nih khua ah Meithal zun zeizat dah a um timi a thli tein dothlat hna sehlaw a dawh ko ti asi fawn.Cu caah a biapi ngai mi cu: CNF/A, a si lo ah Tlangcung hriamtlai nih hmunkhat tein kan doh cang lai timi thawngpang a um hlan, CRPH nih Federal Army timi a phuan hlan ahcun Thantlang peng khuate dihlak zong nan meithal langhter rih hlah uh.

Cun pumpak in ramtaang kal, ram riah le ram lak ah kal ti bantuk tuah lo ah a ttha bik mi. Kan mah Laimi, khuami chung lila in Ralkap a dirkamh mi an um peng timi philh hna hlah usih law, thawngpang kan i thanh ning, kan cawlcangh le biachim ah tha tein kan pawngkam zoh hmasa lengmang hna usih.A bik in Meithal hrimhrim cu langhter rih hna hlah usih law, raldohnak a chuak cang, kan doh cang lai timi a um taktak hlan cu Ralkap cung ah Meithal puah hmasa lo ding zong a biapi ngai ngai.

Meithal a puahnak paoh ralkap nih a tomtom in an fuh, Kalay, Tamu ti bantuk zong meithal an puah bak in a tomtom in an fuh hna. Laitlang khuate zong ah cu bantuk cu asi ko lai. Cu aah rampi huap, Laitlang dih lak huap in kan doh cang lai timi biachahnak, thawngthanh le biakam a um hlan cu a cikpak in meithal puah lo ding, Meithal hrim langhter lo ding a si lai i meithal hrimhrim zong ap lo ding a si lai. Note: Hi thawngpang hi Thantlang peng khuate (security caah langhter a duh lo) pakhat nih an kan kuat mi asi. Na hawile sin ah share in kan bawm ve.

Be the first to comment

Leave a Reply

Your email address will not be published.


*