NIHIN CAAH PATHIAN BIA. JACOB MITTHLI ARAK TLAKNAK BETHLEHEM

Jakob Mithli A Rak Tlaknak Bethlehem. Mikah 5:2, Sihmanhsehlaw Bethlehem Efrath, nangmah cu Judahram chung ah a hme bik khua hna ah nai tel na in, na chung in Israel uktu a chuak lai. Bethel ti cu kan theih bang ‘Pathian inn’ tinak asi. Jakob kha mah hmun a phak tikah Pathian nih thluachuahnak a pek. Thluachuah a pek hnu tlawmpalah thih tiannak he ai tong.

Bethel a chuahtak i Efrath hmun an phakah a dawt tukmi a nupi Rachel cu nau cung in a thi. A thih hlan deuhah a fapa cu Rachel nih Ben-oni tiah min a sak. A sullam cu ka vanchiatnak fapa tinak asi. Asinain Jakob nih kha min kha a duh lo i Benjamin tiah min a sak than. A sullam cu ka vanthatnak fapa, asi lole, ka awrhlei kut tinak asi (Gen 35:16-19). Efrath hmun cu Jakob caah a ngaihchiat le a tahnak hmun sihnanhsehlaw ‘Benjamin’ tiah a fapa kha a auh bang a net nakah thluachuah hmuhnak hmunah a cang than ko.

Rachel a vuinak kum 800 a rauh hnu ah Efrath hmun timi Bethlehem ahcun David i a pi pichin, Ruth kha Pathian nih thluachuah a pek i Boaz he an i um. Khuami hna nih Ruth kha ” Efrath ah hin khuaawng tong law, Bethlehem ah hin na min thang ko seh” an rak ti (Ruth 4:10,11). Cu ti an ti hnu kum 300 a rauh hnu ah profet Micah nih acung i kan hmuh bang Jesuh chuahnak he pehtlai in bia a phuan.

Nangmah chung in Israel uktu a chuak lai ati (Mik 5:2). Jakob mitthli a luannak cuka hmun ahcun kum 1800 hrawng a rauh hnu ah Jesuh Khrih cu Bethlehem ah a chuak taktak ko. Khati khan Efrath cu Bethlehem tiin an kawh cang. Bethlehem a sullam cu Changreu inn ( house of bread) tinak asi. Duh ahcun rawl ruk ti zong in ti khawh asi.

Jakob a rak tahnak hmun cu thlarau rawlruk ah Pathian nih a can ter. Bethlehem khua hi Jerusalem in meng nga hrawng a hlat. Rachel an vuinak hmun lawng asi lo, Ruth le Boaz anni tonnak(Ruth 4:11), David kha siangpahrang ca i chiti an thuhnak (1Sam 16:12-13), le David nih tikhur ti din a rak hawt tuknak( 2Sam 23:15) hmun zong asi. Atulebang ahcun mitam tuk nih hmuh duhah an va tlawnnak hmun khuamin thangah a cang cang.

Nihin caah ruah kan sawm duh mi hna cu atanglei bang an si. 1. Kan khua le kan ram hin Bethlehem ah cang seh ti saduhthat u sih. 2. Kan khrihfabu zong hi Bethlehem bantuk in minih thlarau rawl an dumnak changreu inn
asinak lai i timtuah hna usih. 3. Kan innchungkhar zong hi Bethlehem cawkuang i an thlim bang, Jesuh umpinak si ve seh. 4. Kan thinlung cio hi Bethlehem ah cang seh law Khrih hi kan chungah khuasa ve seh.

5. Khua fate Bethlehem cu khuamin thang ah a can bang, kannih zong mi zeirel lo le nautatmi kan si zongah kan nun i Khrih a bawi ahcun miherhmi le bochanmi kan si kho ve ko. Covid ruangah mi tam tuk mual an liam cang. Jakob a rak tah bang, a tap hrammi le ngaihchia mi an tam tuk. Cu lakah zumtu zong an i tel hna. Rachel bantuk in Ben-oni ( ka vanchiatnak fapa) tiah covid caan hi min pe loin Jakob bang Benjamin ( ka vanthatnak fapa) ti tu in Jesuh zoh in ti ve usih. Kan tahnak caan hi Bethlehem i a rak chuakmi Jesuh thawngin kan vanthatnak caan ah cang ko seh.Hallelujah! By. Rev Dr G Zathio.

Be the first to comment

Leave a Reply

Your email address will not be published.


*