NAN HARNAK VIALTE KHA CHIM DIH UH: REV DR. G. ZA THIO

Nan Harnak Vialte Kha Chim Dih U: Sam 62:8 Ka mi hna, Pathian cu i bochan zungzal u. Amah cu kan himnak asi caah nan harnak vialte kha chim dih u.Atulio ah hin facebook le thawngzamhnak calawng kan rel ding asi lo. Mah pawl nak in Pathian bia kan rel deuh ah a tha. Tukar hrawng cu keimah le keimah hi kai mawhchiat tawn. Baibal nak in zeidang relah ka caan hi ka hman deuh in kai hmu.

Nan si cio dek maw? Yangon um cu kan him la loh ti phang in Lailei ah a tlungmi zong an tam pah cang. Hilakah kei cu ka tlung lai lo atimi zong kan um leen ko lai. Kan tlun pek kan tlun lo pekah Bawipa lo cun himnak a um lo ti hi thuk deuh in kan ruah caan acu. Mah ruah sawh i ruah cu aza lo, a bia kan rel ah ruahchannak kan hmuh deuh ving. Abik in atuliote ahcun Sam cauk hi rel ah a tha khun in ka thei.

Nihin ca zongah Sam 62 in thazang la usih tiah kan sawm hna. Sam 62 kan rel tikah David nih Bawipa cu hitin a hloi. Pathian cu kan khamhnak, bochantlak, hupphengtu, kan ruahchannak a thawngmi lungpi le thawnnak ati. Mah kong hi David nih ai fian tuk caah ami hna kha hitin a fawrh hna: ” Amah cu kan himnak asi caah NAN HARNAK VIALTE KHA CHIM DIH U,” (Sam 62:8). Cun minung kongah a hmuhning zong a kan chimh rih.

Minung cu thaw bantuk an si. Cuaithlainak i chiah tikah thawnak hmanh in an zaang deuh..Cucaah zaangthawnnak le puarhrannak hi i bochan hlah u. Mithil chuh khawh hi i bochan hlah u. Na rumnak a karh len zongah i bochan hlah” ( Sam 62:10). An harnak le vansannak Bawipa a chimmi hna an hlawh a tling zungzal ko. Kan Baibal chung in pahnihte zoh hna hmanh usih.

Pakhatnak. Jehoshafat chan lio ah miphun pathum komh nih raldoh ding in an fuh hna tikah zeitindah Jehoshafat nih Jehovah kha a chimh? Na kan pekmi ram chung in dawi an kan timh. Akan fuhmi bu nganpi sinah kannih cu santlailo kan si. Zeituah awk kan hngal lo. Kan mit lawng na cungah a um,” tiah an harnak a chimh ( 2 Chan 20:11,12). 2. Jesuh le a zultu hna lawng chung an um lioah thlichia a hrang i tilet a tho.

Tilet nih lawng a van khuh cun an tih tuk, an lau tuk i a zultu nih Jesuh kha an fuh i an thangh. Cun an i lak zau i, Bawipa kan khamh tuah, kan thi dih cang la hi teh, an ti. Jesuh biate hi van ruat ta hmanh. Nan hei ka bochan lo hringhran dah! ati hna. Kha hnukhan thlichia le tilet cu nawl a pek hna i daiten an um ( Math 8:23-26). Jehoshafat nih an harnak Bawipa a chimh i Amah nih ral a teipiak hna i an ram le a velchumah daihnak a um ( 2 Chan 20:30).

Azultu nih Jesuh kha an harnak an chimh i ai tuaitukmi rili a dai ziar than. Cucaah kannih zong kan Pa sinah lungthin kekkuai in atulio kan harnak vialte kha chim peng ko hna usih. Acaan a phak tikah Bawipa nih kan ram ah daihnak a kan pek ve ko lai. Jehovah Shalom, Daihnak Bawipa a min hlawrh in um um ko seh! Amen. Credit: Rev. Dr. G. Za Thio

Be the first to comment

Leave a Reply

Your email address will not be published.


*