MIPHUN DANG TTANH NAK LUNGPUT NGEIH HI ZEI THLARAU DAH ASI?

Pastor/ Evan le zumtu vialte nih mah le miphun dirkamh hi Thiang Thlarau ngeih lo bia a si maw? Pastor le Evan, zumtu vialte nih mah le miphun țanh duh lo riangmang in miphun dang țanh deuhnak lungput kan ngeih mi hi zei thlarau dah a si ve? BC 175 ah Antiokas Epifanes Siangpahrang nih Grik ram in Vawlei cung ram tampi cu a rak uk hna.

Hi chan lioah hin Judah miphun cu harnak a phunphun an rak tawng i an rak chaihmai ngai ngai ve. Cun khatte lei kaap in Siangpahrang nih miphun țanhnak (feeling) ngeih kho hna hlah seh tiin a phunphun in an rak lemsawi ve hna. Tlangbawi cheukhat lungthin cu Antiokas Epifanes nih a lak khawh ve hna caah amah lei ah an țang ve.

An biaknak phunglam le Judah nun phung tampi cu an hlawt i Antiokas Cozah duhnak cu an zulh hna, mi tampi cu an lung an thawh ter ngaingai hna. Hi kong hi tam deuh in hngalh na duh ahcun 1 Makabia 1:11-15, chungah hmuh khawh a si. Cucaah Judah miphun cu Antiokas uknak tangah an miphun lungrualnak cu a rawk dih, a kek dih.

Judah phun a țanh tu le Judah phun a hlawt tu ( Rahudi & Hasidin) tiin an rak i țhen ve. Grik Cozah uknak harnak chungin an Pathian Yahweh nih a miphun chuah tu dingah Judah Makabia te chungkhar cu a hun hman hna. Vawlei thil Uknak chiakha mi chungah hin Pathian cu a hun i telh tawn i, Amah cungah zumh awk tlak in a nung mi hna cu Laksawng ah Teinak a pek tawn hna.

Phun țanh Judah Makabia cu Pathian thiang thlarau nih a bomh caah Siangpahrang Antiokas Epifanes cu a tei, Makabia le a hawile nih Ram uknak cu an co i an Biakinn cu dawh tein an remh țhan. Cun lunglomhnak Puai Hanukkah cu Kisliv 25 ni in an thawk i ni riat chung an tuah. Nihin ni tiang Judah mi Puai sunglawi pakhat ah a hung si lan.

Moses nih a miphun, a ram le a Pathian a țanh ruangah Ezgyp Ram Siangpahrang țhunhdanh sang cu chuahtak in a miphun Judah mi hna harnak cu i hromhve in sal sinak cu aa thim, Heb 11:24-26. Sihmanhselaw Pathian thiang thlarau nih a umpi caah Faro kut chungin a miphun cu teinak in a chuah pi ve hna. Paul nih,”Rom 9:2-4, Ka miphun, ka thi le ka sa a simi hna caah ka ngaih a chia hringhran ko i ka lung chung fahnak cu a dong lo.

Anmah ca i a ṭha ding a si ahcun keimah hi Pathian chiatserhnak in i Khrih he i ṭhen hmanh kha ka duh deuh.” a ti. Paul cu Pathian thiang thlarau in a khat mipa a si lo tiah a ho hmanh nih kan ti ngam lai lo. A miphun caah zeitluk in dah a dir ngam cu chim hau lo a fiang ko.Cucaah Pastor, Evan le zumtu vialte cu kan miphun le kan ram, kan Pathian caah fakpi in kan dir i kan țanrual chinchin ding a si ti cu kei ka pawm ning a si.(Christianity and Nonviolence Action)

Jesuh nih, Matthai 10:5-7, Jesuh nih mi pahleihnih kha a thlah hna i, Jentail mi ram ah siseh, Samaria mi hna khua ah siseh, va kal hlah u. Israel miphun chungin a tlaumi tuu hna sin longah khan va kal u. Cun, Vancung Pennak cu a nai cang, tiah va chim hna u a ti. Bawi Jesuh nih a miphun Israel a dirpi i a țanh hna ruangah Pathian fa a si lo, thiang thlarau a ngei lo tiah a hohmanh nih an chim ngam lai lo. Vancung Pennak cu a miphun Israel mi hna caah aa ham mi ko a lo.

Mah fale ei ding mi chang cu lak riangmang in Uico pek cu a hmanlo zong a ti rih. Jesuh cu a hohmanh nih a miphun a țanh ruangah sual kan phawt kho lai lo. Cu ve bantuk in, Kan ram hruaitu le uktu vialte hi a dikmi Pastor tluk tal hi si dih hna sehlaw zeitluk in dah a va țhat hnga. Pathian thiang thlarau a ngei lo mi le miphun a daw lo tu nih ram an uk chung paoh cu miphun tenau caah cun zalonnak a um taktak kho rih lai lo.

Kan Pathian caah le, kan miphun le kan ram caah hrințhan cio hna u sihlaw kan ram cu a dam lai i Kan Ram ah Yahshua(Jesuh) cu Bawi a si cang lai. Ka hla phan mi Dawt hlei hrinhniang Lairam dawh e, khuakhirh zung lai ai cang, Zunglian uk mangbawi vialte lo cang lai, Cungchin Van Bawi fa dawt hrinhniang, Biakam phurtu Phuntungtu kan chuah ni ahcun. Lairam le Lai miphun cungah Pathian thluachuah tlung ko seh…Amen. Credit: Ephraim Lian Rum

Be the first to comment

Leave a Reply

Your email address will not be published.


*