LUNG DONG LOIN AU KO USIH: REV.DR.G ZA THIO

Lung Dong Lo In Au Ko Usih: Solomon Hla 5:6, …Au len zong nih lehrulh um ti lo.Solomon Hla hi a tha tuk, a thuk tuk. Dal nganak rel tikah kan hmuhmi cu, tlangval ( Solomon) nih nungak ( Shulamite) kha a heifuh i a ihnak innkhar a hei kingh. Nungak nih ai hnuaihnai deuh caah tlang val cu a nuar phun in lo diam hmun dangah a kal. Nungak nih innkhar a van on ahcun a um ti lo. Cutikah a celh lo i ai kawh sek, ai auh sek.

Sihmanhseh law lehrulh a um ti lo ai ( Sol. 5:2-6). Cucaah ngaknu nih a celh ti lo i heh tiin a hlam,a kawl. Hitin a hrum. Maw Jerusalem ngaknu leng rual hna, Ka dawt nunnem nan hmuh zawn ah cun, zuun in a zaw tiin vung chim tawn si u,” ati hna ( Sol 5:8). I chir in, khatin a kawl than tikah dumah an i tong (6:1-13). Mah hnu in a hlan bantuk in nuam tak in dawtnak par an tlan than ( Sol 7:1-8:4).

Zumtu tampi zong nungak nu kan lawh caan a um. Akan dawtu Khrih nih i hawikom ding in a kan fuh i kan lunginn khar a kingh tawn ko ( Bia 3:20) Asinain kan on piak lo caah amah he zanriah kan dum ti lo. Chimduhmi cu kan i hawikom kho lo. Khati dirhmun i kan dir hi avoi a tam ngai. Laodisia khrihfabu ko kan lo (Bia 3:14-19). Mah dirhmun i kan dir paoh ahcun kan har tik i kan au len zongah a kan let ve lai lo.

Akan thuh takmi a lo lai. Jeremiah bia van rel ta hmanh usih. Khuadawm pin ah khin, kan thlacamnak nih a phak lengah khin na thup,” ( Tahnak 3:44). Azeimaw caan ahcun Pathian hi kan sin in ai thupmi a lo khe ko. Aruang cu a um len ko lai. Abik in kan palhnak le a kan sawm tikah hnu kan chittak tawn caah asi. Cuccah kan i biatak i kan sualnak hna kha kan mertak a hau ( Bia 3:19). Atu ah hin zumtu a tam u cu kan ram ca le kan miphun caah thla kan cam len ko.

Asinain atutiang kan ruahning le kan duhning in thil a kal lo i a tluang lo. Asinekun ah kan thlacam cu kan ma la maw? Nemmam, ma naisai hlah. Amahbel, kan sual phuan a herhmi a um ahcun kan phuan a hau. Kan thinlung dihlak in Bawipa kan fuhpanh a hau. Shulamite nih a tlangval a kawl bang Khrih a kan dawtu le kan dawtmi kan kawl a hau. Kan thachia hlah seh, sualphuan bu le mitthli he Pathian sinah thla kan cammi cu pakpalawng an si lo.

Kan mithli hi Bawipa nih ai khon ko. Zeitluk in dah harnak ka in kha na hngalh, ka mitthli cu na thawl chungah na rawn hna, na cauk chungah na tial hna asi lo mei?tiah dawh David zong nih ati kha ( Sam 56:8). Noahte chung kha buanchukcho lio i lawng i an um ahkhan an thin a phan caan le an lungre a theih caan a um ve ko lai.Sihmanhsehlaw ni 150 a rauh hnu ceo ah Pathian nih Noah le lawng chung i a sin i a ummi saram vialte le satil vialte kha a philh hna lo i vawlei ah thli a hranter i ti cu tum hram a thok ti kan hmuh (Gen 8:1).

Kannih zong atu kan tonmi tilian le thlichia hi Pathian nih a caan a cu ati cun a tum ter ve te ko lai. Noah te chung kha lawngah thla hra le ni hra hrawng an um in pei vawlei an lamh than ko cu. Kan lung dong hlah seh. Au len zongah lehnak a um lo tiin Bawipa kawl hi kan tha chia hlah seh. Dumthar le ram thar, Pathian nih a kan timh piak ko. Ai thupmi lo tawn hmanhseh, ai thup thai lo.A caan a cut cun kan tlam a tlinter ko lai. Amen! Credit: Rev.Dr.G Zathio

Be the first to comment

Leave a Reply

Your email address will not be published.


*