LAMKALTU TLUANG LIAN MARTAR: LUNGSAU TEIN A REL DIHMI CUNGAH KHUARUAHHAR JESUH VEL UM KO SEH

KAN THI CANG ( Lungsau tein a rel dihmi cungah Khuaruahhar JESUH Vel um ko seh). THIANG THLARAU in a khat i PATHIAN rian hmanh a țuan cangmi hna le THIANG THLARAU he hawikomhnak a ngei lengmang i Cathiang a rel lengmangmi hna, rawlulh thlacam nun zong a ngei cangmi hna zong nih kan daithlanh i kan kal taak sual tawnmi Biatak cu, KHRIH he vailamcungah kan thih cangnak Biatak hi a si.

Zeicahdah kan kal taak ti ahcun, KHRIH he kan hun i ton i hrințhannak kan hmuh i THIANG THLARAU le lawmhnak i kan khah tikah, thlarau leiah kan duh a faak i kan țang ngai cio hna. Ticun a rian lei khelah kan thinlung le ruahnak cu kan peek cio cang caah a si.Thlarau lei he a pehtlaiin țuan ding le cawn ding le nun țhannak ding hi hi a tam ngaingai ko.

Kan mah le si khawh chung cio in JESUH dawt kan i zuam i, a lamkip in thazaang chuah kan duh. PATHIAN cu kan duhbik le kan dawtbik a hung si cang. Cucaah, BAWIPA le a Pennak rian caah kan si khawh chung cio in kan i zuam cio hna.Cubantuk zumtu țha hna cu, kum 10, kum 20, kum 30 hnu ahcun Efesa Khrihfabu bantukin, hmasa a dawt bantukin JESUH KHRIH a daw peng kho ti lomi hi zumtu zeizat remruam dek kan va si cang hna mu?

Kan thazang dihlak, kan thinlung dihlak, kan ruahnak dihlak le kan thlarau fimnak dihlak he BAWIPA cu kan zulh i zumhtlak si ding cu kan duh i kan i zuam hna. Sihmanhselaw zingzan a hung tam, ni thla an liam, kum caan aa thleng. Pawngkam aa thleng, hmuhning le zumhning hna a hun i thleng i kan lung chung feeling hna zong an i thleng dih cang hna. Hneksaknak a phun phun kan cungah a hung um.

Dawtkhunmi zumtu țha hna kalnak lam thluan thlarau lei ram car le thlarau lei zanmui hna kan nun nih a hun ton. Cutik ahcun, kan rak i thokka bantukin lungthawhnak hna a um kho ti lo, chungkhar ah duh lomi ton a hung si, taksa pum zong nih derthawm nak le zawtnak hna a hun ton. Kan rianțuanning aa thleng i kan tangka hmuhnak hna a hung zawr, zeidang vialte nakin THIANG THLARAU hawikomhnak hna a hun zawr deuhdeuh i Bible rel le thlacam hna a hung har ngai caan hna kan hung phan.

Cutikah tisami kan sinak cu a hung corh i kan tei cia tukmi thil tampi nih an kan naih i an kan tuk forh țhan. BAWIPA caah pasalțha nusalțha a rak i timi tampi thaba tha-uai in a kal kho ti lo mi le a tluk zong a tlu cangmi zumtu tampi hmuh khawh an si. Zumtu țha hna nih kan i palh tukmi cu, kan mah thazaang țhawnnak chuahin zumtuțha sinak lam kan i ser. Kan i sermi lam cu hihi a si.

Bible ka rel lengmang lai, thla ka cam lengmang lai, rawl ka ulh lengmang lai, THIANG THLARAU he hawikomhnak ka ngei lengmang lai, i, cutin khatin ka um lai, kan i ti i cucu kan i seh chih. THIANG THLARAU he i hawikomh, Bible rel, thlacam, rawlulh, peekchannak le tehte khaannak hna in kan țang i kan tha kan chuah. Sihmanhselaw kan chungah a nungmi KHRIH THLARAU nih a kan thokpimi a silomi, kan lungthawhnak tu nih a kan tuahtermi, peekchannak te hna rawlulhnak te hna, thlacamnak te hna, tehte khaannak te hna le thawngțha chimnak te hna nih kan lungcuarpar a kan tan kho naisai lo.

Lungcuarpar tan lo piin, BAWIPA rianah kan țang i hechet kan tha kan chuah. Lungcuarpar tan lo in kan ţannak le kan i zuamnak nih, zumtu BAWIPA ah a țang taktakmi aa daw kho tung lomi tampi ah a kan chuah dih. Unau, KHRIH he vailamcungah na thih cangnak hin thok cang. KHRIH he Cross ah na thih cang ahcun, na chungah KHRIH cu a nung! Na lungthawhnak siloin, na chung i KHRIH cu hngalh thiam i tim.

THIANG THLARAU nih KHRIH hngalhnak ah an țhanter lai i a hmaanmi hngalhnak in ankhah ter lai. Cuticun, THIANG THLARAU nih an hruai lai i KHRIH chungah an Baptist lai i na Lungcuarpar cu an tanpiak lai. An lungcuarpar THIANG THLARAU nih KHRIH JESUH ah a tanpiak cangmi hna lungput cu KHRIH lungput a si. Cubantuk lungput a ngei khomi hna cu zeitluk mi Thluachuak dah an va si mu. Na thi cang, KHRIH he Vailamcungah na thi cang. By, Lamkaltu Tluang Lian ( martar )

Be the first to comment

Leave a Reply

Your email address will not be published.


*