KHUA AWNG TONNAK PATHIAN BIA: REV DR. ZA THIO

Khua Awng Tonnak Pathian Bia, Joshua 1:8, Hi phungbia cauk nih hin na ka chuahtak hlah seh; sihmanhsehlaw a chungah ai tialmi vialte ning in tuah awkah ralringten na umnak hnga, chun zan in mah cucu na ruat lai;zeitintiah khi tikah na lam kha na tluanter lai i khi tikah khua awng na tong lai.Nizan chunah Rev. Dr. Abraham Ngun Mang he phone chung in bia kan i ruah. Matupi a rak um lio i thanghnak kong a ka chimh pah in a hrinthan kami hna Baibal rel a fawrh hnanak kong a van ka chimh chih.

Nan lung a thawh lo zongah Baibal cu rel ko uh. Athawh zongah rel ko uh. Rawl zong kan duh lo bu i kan ei zongah thazang ca, kan duh tuk bu i kan ei zongah thazang ca, ka ti hna,” ati. Cu bia nihcun ka nunah bia a chim ngaite caah nihin cu Baibal rel hi kan lung a thawh zong, thawh lo zongah rel usih; zeicahtiah khua awng tonnak asi ti hi tawiten van langhter ka duh.Wales ramah nungak note, Mary Jones an timi cu Baibal a thatzia pastor le cawnpiaktu hna hmurka in a theih lengmang tikah Baibal cauk ngeih le rel kha a duh tuk cang.

Cucaah phaisa kawlah rian ai tuan sek. Shiling pakhatte a van khon. Asinain apa a dam lo ruangah an hman.Cun a kawl than i shiling pakhat a van ngei than. Mah le cangka, an khua in meng 50 dan a hlatmi Balah khuaah Thomas Charles nih uk hnih a ngeih ti a theih caah ava kal hnawh. An iton tikah pakhat kha a rak zuar cang.Atangmi cu amah caah ai chiahmi asi. Asinain Mary nih Baibal a duh tuk ruang i rian a tuannak, phaisa ai khonnak le meng 50 dan in a van rat hnawh nak tehna a van chimh khan a zaang a fak tuk i a zawrh.

Baibal cauk cu a tangah ai pom zau i an khua ah nuam tak in a kir than. Mah nu kong hi van ruat ta hmanh. Culio chanah cun Baibal hi suinak in hmuh le ngeih awkah a har deuh. Atu kannih chan tu ahcun cawkawk atamtuk pinah kan smart phone ah olten kan i khumh i kan kalnak kipah kan i ken. Cucaah Bainal hi kan rel duh lo ahcun kan poi tuk lai. Khualtlawngmi paoh nih lampiahnak catlap ( Laanpiah mipung) an i ken dih.Cu lo cun kalnak lam an tlau.

Baibal rel lo cun kan kalnak lam kan tlauve ko lai. Atulio Amerikaram zong Baibal tam cem a chuahtu le a ngeitu an si nain atu lio an ram hruaitu hna pawlisi le an awder zoh tikah ngaihchia ngaite an si. Baibal in pial an i thok cang ko. Hlan lio ram an ser ka i an tamadah hmasa bik George Washington nih cun, ” Baibal tel lo cun vawlei
hi uk khawh ding asi lo,” arak ti. Ralbawi minthang General Douglas Mac Arthur zong nih, Zeitluk ka tha a baat zongah Baibal ka rel hnu lawngah ihnak ka panh,” ati ve.

Nang le kei teh? Pathian Bia kongah hngalh ding: Na lung a dongh tikah, Biabal rel. Na ngaih a chiat tikah Baibal rel, Na lung a buai tuk tikah Baibal rel. Na hngilh khawh lo tikah Baibal rel. Na kong an in ceih tikah Baibal rel, Na lung a kehkuai tikah Baibal rel, Na nincan lo tuk tikah Baibal rel, Na lam a tluan lo tikah Bible rel.Moses nih a thih lai ah amah a van chawngtu ding Joshua bia a cahtakmi cu a cungah kan hmuh ko. Mah biacah kha Joshua nih a ngaih caah Kananram ah a miphun kha thaten a hruai khawh hna.

Ral an tei, ram an lak. An lam a tlunag i khua awng an tong. Kannih zong Baibal kan rel le kan zulh ve ahcun kan hlawh a tling lai i khua awng kan tong ve ko lai. Tukum chung i a taang rihmi thla hleikhat caah Pathian bia cu kan kee caah meiinn le kan lam caah ceunak si ko seh (Sam 119:105).Nihin hi Chinmi asi vemi, Myo miphun sinah kal kan tim. Hmawbi kamah tunaite ah an i thial.Khrihfa lawngte an si. Inn 30 hrawng an si. Phung va chimh le Bawipa zaanriah va pek ding an si. An har ngaingai. Tuan kal ka duh caah tuan takah ka van postnak asi. Thlacam rak bawm cio hna u tiah kan nawl hna. Credit: Thio Za

Be the first to comment

Leave a Reply

Your email address will not be published.


*