KAN SUAL KAN PHUAN LO AHCUN KAN CUNGAH A TLUNG DINGMI

Zumtu Nih A Sual Tikah: Pathian fale cu sualnak kha tuah ti lo ding in cawnpiak kan si. Johan nih, Hi ca kan kuat hna cu sualnak kha nan tuah nakhnga lo caah asi, ati. Cun ai lak than i, Pakhatkhat nih sualnak nan tuah ahcun, adingmi Jesuh Khrih, Pa sin i bia a kan chimpiaktu kan ngei ko ati than ( 1 Johan 2:1). Hi nih a fiantermi cu zumtu nih sual loin kan um kho i, a sual zong kan sual kho thiam tinak asi.

Mah zawnah pakhatte van tenh ka duh. Zumtu cu kan sual asi hmanhah kan sual peng kho lo ( 1Johan 3:9). Cun kan sual kan phuan lo i kan sual peng ahcun atanglei hna hi kan cungah a phan lai. A caang lawng si lo in abia zong tial chih ka duh nain asau deuh lai caah a fiannak vial in ka langhter. Zumtu Nih A Sual Tikah: Pakhatnak. Pathian he an i hawikomhnak a cat. Sam 32:3,4; Isa 59:2. Nu le va, pa le fa, kan i sik i kan i kawmh khawh lo phun khi asi.

Pahnihnak. A khamh lawmhnak a tlau. Sam 51:12, David nih Pathian kha, ka khamh than ati lo, na khamhnak chung in a chuakmi lawmhnak kha ka pee than ati. Pathumnak. A thlacamnak leh lo asi. Sam 66:18. Kan sualnak kan thuh ahcun kan thlacam kha Pathian nih a ngai lo. Palinak. Thiang Thlarau ngaih a chia. Efes 4:30. Pathian ngaihchiat hi tih a nung tuk.

Panganak. Thlarau tlau dawtnak a zor. Sam 51:13. Paruknak. Pathian chimhhrinnak a tong. Heb 12:5,6 Kan sual ko bu i chimhhrinnak kan ton lo ahcun fa tak kan si lo tinak asi. Pathian chimhhrinnak ah hin, zawtnak, sunghnak le thihnak tiang ai tel kho. Pasarihnak. Khrihfabu in chuah le dawi a tong lai. Math 18:17; 1Kor 5:5. Biatak ai cawnpiak mi khrihfabu nih cun mah hi atu zongah an hman peng ko.

Pariatnak. A chan a tawi kho. 1 Kor 11:30. Korin khrihfabu member an rak thih kha Bawipa zanriah kha duhpaoh in an ei caah asi khah. Pakuanak. Vancung ah laksawng a sung lai. 1Kor 3:13; 2Kor 5:10. Vawlei laksawng nak in van laksawng hi a sung deuh vingvan. Pahranak. A tuhmi a zuun lai. Gal 6:7. Sual man hi zumlotu lawng nih an zuun lo. David kha zumtu asi hnu ah mi nupi he a sual man letli letnga ti awk in a zuun ko khah.

Hlan lio kan ram hruaitu Pu Ne Win nih Tiluk le Kala a rak dawi hna lio ah cawhnuk a rak zuarmi Kalapa cu India ah tinbaw in a kir. Phaisa ai kenmi kha a kut in ai put peng. Ruah lopi ah rili chungah a phaisa bawm cu a thlak sual i a alo ko. Khatikah ai lak zau i, Cawhnuk ah ti tam tuk ka rak cawhmi kha tuchunah ti ah an kir than,” ati an ti.

Zumtu he zumlotu he dik lotuk i chaw kan kawl le kan khonmi cu a caan a cut tikah khatlei khatlei in zuun than a si ko. Sual chir le sual phuan caan kan ngeih lio ah kan sual i phuan i Pathian he i hawikomh than hi i tim ko hna usih tiah kan sawm hna.Nihin cu zarhpini asi caah Pathian hmai zoh buten midang SHARE ve hna mu. Credit: Rev. Dr. G. Zathio

Be the first to comment

Leave a Reply

Your email address will not be published.


*