JESUH NIH THEIPI KUNG CHIAT A SERHNAK A RUANG. BY. BAWI MIN LIAN

Jesuh Nih Theipi Kung Chiat A Serhnak Aruang. Tulio khrihfa tampi nih kan i fiang khawh rih lomi cu zeiruangah dah Jesuh nih theipi kung a tlai caan a zat rih hlan ah chiat a serh timi hi asi. Mah kong cu a tanglei ah tawi tein fianternak ka van tuah lai.A thaizing cu zingka tein Jesuh cu Jerusalem khua ah khan a kal than I lampi ah a rawl a tam. Lam pawngah khan theipi kung a hei hmuh I a hei fuh, a si nain a hnah lawng a rak si ai.

Cucaah thingkung cu aa thawh I, ‘Zeitikhmanh ah na tlai ti lai lo’tiah a ti. Hmakhatte ah theipi kung cu a car ko” (Mathai 21:18-19). Bible thiamsang pawl nih an chimnak ahcun Jesuh nih theipi kung chiat a serh caan kha thaal a chuah ka te asi i theipi a tlai caan a si lo lio te asi tiah an chim. Cu ti si cun zeiruang ah dah Jesuh nih khan a tlai caan a silo mi rumro cu thinhung ngai in chiat a serh ne?

Kan theih awk a herh mi cu Jesuh nih theipi kung chiat a serh hlan ah khan Jerusalem biakinn ah a rak kal i biakinn chung i chaw a rak zuar mi le a rak caw mi kha a hmuh hna tikah a thinhung tuk ruangah a thawl dih hna (Mathai 21:12). Mah ruang ahhin Jesuh nih theipi kung chiat a serhnak a chan bik cu biakinn zohkhenhtu, tlangbawi le biaknak hruaitu hna nih an rian ah felfai tein an tuan in an zohkhenh lo caah asi bik tihi ruahdamh/theih khawh asi.

Jesuh nih biakinn chungah chaw a let mi a hmuh hna i a thinhung mi nih a kan cawnpiak mi cu lenglei cun biakinn cu ai dawh in rumra a ngei hringhran nain a chungum mi hna cu zeihmanh rak silo Pathian zeiah rak rel lo zia, cu lawng hlah Pathian riantuan tu hna tam uu cu lenglei lawngah i dawh ngai i chunglei ah rak zer ngai, fih a nung mi kan rak tamtuk hi asi. Mah ruang ahhin Jesuh nih theipi kung cu a langtlang cun a kung le a hnah a that ning a hei hmuh tung i a hei fuh tik i ei awk pakhat hmanh a hmuh lo tik ah a thinhung in chiat a serhnak cu pei asi cu.

Thei a tlai lo mi chiat serh a tongmi theipi kung bantuk silo hi tulio Pathian riantuantu hna nih kan i zuam dingmi rian asi. Kan nih cu lenglei he chunglei he ai dawh mi kan si awk le Pathian caah thei a tlai mi si hi Jesuh nih a kan duh piak mi le mah theipi kung bianabia nih a kan cawnpiak duh mi cu asi. A reltu nan za te cungah Pathian vel um ko seh!Note: Paul Heusel nih a tialmi he zohchunh in mah ca hi tialmi asi. By Bawi Min Lian

Be the first to comment

Leave a Reply

Your email address will not be published.


*