HAPPY MOTHER’S DAY: BY REV. DR. LAL PEK LIAN

Happy Mother’s Day. Nihin cu Hringtu Nu Ni (Mother’s Day) tiah nu le sin ah le Pathian sin ah lawmhnak bia chim ni, laksawng pek caan, ni sunglawi a si. Hringtu nu le caah thluachuah halpiak in thla kan cam ni, ni sunglawi khun a si. A ka hringtu kan nu nih pumsa in kan thih tak cang hmanh sehlaw kan nunnak chungah ka nu cu a thi kho bal lo. Fale le tule caah tuanbia dawh tukmi ro a kan chiah tak.

Cu rosung lawi cu Jesuh Khrih dawtnak le khamhnak chung i kan nun kan peh khawhnak ding hi a si i Baibal tuanbia rel piaknak in zan fatin a rak kan thlim mi le Zarhpi zing ah chungkhar pumhnak a kan tuah pi mi hna hi an si. Zarhpi Zing paoh ah Salm 23 hi by-heart in kan chim tti, Khrihfa Hlabu No. 11 (A Thiang, A Thiang, A Thiang) kan sa i Bawipa Thlacamnak kan chim tti zungzal.

Ka nu cu a nu nih a pawi lio ah a pa nih a thih tak i a min ah Ro Thlia an sak. Sianginn a kai kho ve lo i Baibal le Khrihfa Hlabu rel khawh a rak duh tuk ve caah Laica rel le ttial khawhnak tiang cu a rak cawng kho ve. Cafang ngan, hme, a tu i cafang fonh le catlang kan ser bantukin a thiam ve lo; ca a kan kuat tawn ahhin aa peh in a ttial dih ko nain, ka nu cakuat rel cu a nuam kan ti tuk.

1956 kum ah a tta Rev. David Van Bik nih a rak lehmi “Baibal Tuanbia” cauk kha kan ih lai paoh ah a kong pakhat lengmang a kan rel piak. Hi “Baibal Tuanbia” cauk cu Elizabeth Johnson siangbawi nu nih a rak rel piakmi (proofreading) a si i Baibal cauk hi a tungtlang pi in a huap kho mi cauk ttha ngaingai a si. Ngakchiat lio, thluak a tthawn lio caan ah tuanbia phun in ttialmi le chimmi cu i cinken khawh khun a si fawn caah, a caan lio te i ka nu nih “Baibal Tuanbia” a rak kan rel piakmi nih Pathian bia in kan tthannak a hram a bunh i a feh ter.

A fale lawng a kan rel piak lo, a tule an dihlak in a rel piak hna. A tule nih Baibal a kan rel piaktu ka pi sam par ti zong in an auh.Hringtu Nu vialte nih kan fale le kan tule kha Baibal Tuanbia in thlim ve hna usih law, Pathian hawikom ttha ah sersiam cio hna usih. Baibal rel piak duhnak, siaherhnak nganpi ngeih khawh hi a biapi tukmi a si. Miphun sersiamnak caah a ttha bik zong a si ko lai tiah ka zumh.By Rev. Dr. Lal Pek Lian

Be the first to comment

Leave a Reply

Your email address will not be published.


*