DINFELNAK CU ZEITINDAH KAN CO LAI? REV.DR.G. ZA THIO

Dinfelnak Cu Zeitindah Kan Co Lai? Math 6:33, Pathian pennak le a dinfelnak kha kawl hmasa u law, mah thil dang vialte zong chap nan si lai( Seek first God’s kingdom and his righteouness; and all these things shall be given to you as well) from World English Bible. Nihin Pathian ni dam le himten a kan phak tertu Bawipa a min thangthat si ko seh.

Kawl lei cu kan biakinn ah kan i pum kho rih lo le tuzing kan hrawmhmi hna hi phungchim ngaih canah thaten rak rel u tiah kan sawm hna. Siaherh buten ka tialmi asi i thlacam bu in rel law a thahnem ko lai. Aluancia kum hra lio ahcun vawlei thiamnak thang tuk kaw kan rak theih bal lomi cabia le thilri hna an hung chuak. Ipod, Iphone le Ipad hei ti te hna.

Tlawmpal ah cunak sang deuh Icloud le Iwatch ti pawl nih an van zulh. I ticu Mirang cafang asi. Lai holh cun Ka asi lo le, Keimah ti asi. Keimah tuahmi keimah ta ti phun a sawh. Mah thilri a hmang khomi cu mi men lo le minung tlingah ruah an si. Cucaah mah thilri cawk le ngeih le hman kha hei tiah i zuam asi. Minung tahnak ah hman asi cang.A cheule bang cu ngeih an duh tukah an kal khatlei hna an zuar i an i cawk ko.

Jesuh chan lioah Judahmi nih Pathian hmai i mi ding sinak caah an rak i zuammi cu minung tuahmi le tuah lomi in a rak si. Ka peek, rawl ka ul, thla ka cam ti le, Ka fir loh, ka lih loh, ka sual loh ti in an rak i zuam, an rak i phorhlaw i an i lungsi. Abik in Farasi pawl nunning le minung an tah ning asi. Cucaah Jesuh nih biakinn i a kalmi Farasi pa le ngunkhuai khawltupa in tahchunhnak a chimh hnanak a si ( Luke 18:9-14).

Farasi mi cu a tuah lomi le a tuahmi kha Pathian a hei thanh. Ngunkhuai khawlpa tu nih cun tangdorbu ten, Maw Pathian, kei misual cungah hin zaangfahnak ngei ko, ati ( Luke 18:13). Khan Pathian nih thiam a coh ( na sual lo) i innah a tin. Minung kan tuah le tuah lomi ruang i minung hmai i kan dinnak tham cu Pathian hmai ah cun fihnungmi puanchiatlek bantuk ceo pei an si ko cu ( Isaiah 64:6).

Kan chunglei ai thlen lo paoh ahcun a leenglei kan sinak cu van kainak caah san an tlai lo. Rul cu vate bawm i chiah zongah vate ah ai cang lo, rul thiam asi ko. Asikunah dinfelnak cu zeitindah kan co kun lai? A ol te ko. Amah bel i tangdor le duh taktak a hau. Dinfelnak cu velngeihnak thawng in Pathian nih a kan pekmi laksawng asi. Rom cakuat 5:17 hi rel ko hmanh. Nai lawm tuk lai.

Pathian hmai ah kei cu misual ka si, keimah ten ka sualnak in kai thianter kho lo ti nai hngalh i mi vialte kan caah Khrih nih a kan thih piak cang, ka sual thiannak caah a thisen a luang cang ti na zumh ahcun khamh na si lai. Cule caangka Pathian nih Khrih chungah an chiah lai iJesuh Khrih cu na dinfelnak le na thiannak le na tlanhnak ah a cang cang lai. Hallelujah! I Korin 1:30.

Dinfelnak taktak, asi lo le, vancung luhnak ah a herhmi dinfelnak cu kani zuamnak in hmuhmi asi lo, Pathian laksawng asi. Phundang i chim ahcun Jesuh Khrih lawng hi Pathian hmaiah kan dinfelnak asi. Jehovah-Tsidkeenu” ( BAWIPA cu kan finfelnak) kan timi cu mah hi a chim duhmi asi ( Jeremiah 23:6). Amen! Share ve ko. Bawipa riantuan asi hih. Credit: Rev.Dr. G. Za Thio

Be the first to comment

Leave a Reply

Your email address will not be published.


*