ZEIZONG VIALTE AN KHAM DIH RUANGMANG HOI CANG AI

Hitining tein thil an kalpi ahcun buainak hi alinsa chin lengmang te ko lai. Thanhnak order an chuah thluahmah cang hna. Kalay Township Administration zung nih Kalay kulhchung vialte caah order an chuah. Zanlei suimilam 8 in zinglei suimilam 4 tiang ahohmanh chawhvah angah lai lo tiah an thanh. Cun minung panga nak tam hmunkhat ah nan um lai lo tiah order an chuah. Hi thil an tuahnak aruang cu Mipi lam zawhnak atuahmi an tam chin lengmang caah asi.

Tutan ah order an chuahmi hi Penal Code SECTION 144 hmangin an chuahmi asi. Nawl an chuahmi ahcun tulio ah hin Kalay kulhchung ah minung tthenkhat, mipi himnak ding le phunglam hrawhhral hoih an cawlcang hna i, ttihnung ngai in a ummi zong hmuh an si. Cubantuk cawlcanghnak nih mipi himnak le khuachung deihnak ahrawh i, cuticun buainak zong a chuahter lai timi hi phan a um tiah theih asi.

Curuang ahcun Kalay kulchung ah mibu sin ah biachim, motor in siseh ke in siseh lamzawhnak ah i zulhdawi thluahmah, lam zawh dingin forhfialnak tuah, thilri hrawhhral, buainak chuahter timi vialte hna cu khap asi cang tiah an thanh. Nawl an chuahmi he pehtlaiin Kalay khuachung ahcun order an chuahmi minung panga nak tam hmunkhat um lo ding curfew tuah asi cang tiah tlang an au cang ti asi.

Hi konghe pehtlaiin Mandalay khuachung zongah tuzan thok in zulhphung an chuah ve cang. Nawl an chuahmi hi an i khat ngaingai. Zan suimilam pariat in zinglei suimilam pali tiang hohmanh lengchuah lo dingin nawl an chuah ve. Culawng siloin minung panga nak tam hmunkhat um lo dingin nawl an chuah ve. Lam zawhnak zong an khap pin ah lamzawh dingin forhfialnak tuah zong an khap chih. Hmunkhat ah i zulh in motor in vah zong an khap rih. Hitining cun kanram hi buainak alinsa chin ko lai timi zumh a um.

Naypyidaw Palik Biachim: Naypyidaw Police pawl biachim cu ttihnung ngai an si ko. Kawlralkap nih uknak an lakmi mipi nih an duh lo caah lamzawhnak cu an peh thluahmah. Hi konghe pehtlaiin tuchun ah Naypyidaw i, lam a zawhtu mipi hna cu police nih an hrocer hna. An biachim mi hrimhrim ttihnung ngaingai asi ko. Hi kong, police nih lam zawhtu an hrocerning ah Myanmar Now thawngzamhnak nih a tanglei bangin a langhter.

Naypyidaw ah minung thong tampi hna cu lamzawh nak an ngei tthan. Lam a zawhmi mipi hna cu police pawl nih meithahnak motor hmangin Ti in an kah hna. Culawng siloin lam a zawh mi minung thong tampi hna cu kalnak lam an zulh dingmi ri zong police nih an khiah piak rih hna. Hi ka hmun le hma cu nan lonh lai lo tiah ri an khiahpiak hna i, Police nih an timi cu Rin thumnak nan vun lonh asi ahcun meithal kuan taktak in kan kah hna lai tiah an ti hna tiah alanghter.

Be the first to comment

Leave a Reply

Your email address will not be published.


*