ZAWTNAK THLOPNAK SII US COZAH NIH HNATLAKNAK ATUAH CANG

Coronavirus Thlopnak, Remdesivir Sii. Biopharmaceutical company, Gilead nih Coronaviurs thopnak caah an serchuahmi, remdesivir sii cu nizan ah US cozah he phawtzamhnak kongah hnatlaknak an tuah cang. Gilead company nih direct in Department of Health and Human Services (HHS), sin ah a kuat hmasa lai. HHS nih state cozah sin ah a kuat ve lai. September thla chungah remdesivir cu state cozah sin ah kuat dih ding in Gilead company nih timthuahnak an ngei.

State cozah nih sizung le a herhnak hmun poah ah a caan ning tein an phawtzamh dih lai. Gilead CEO Dan O’Day nih a herhnak hmun le a caan teah phawtzamh khawh dih kan I zuam lai tiah AP news ah a chim. Gilead company ngeitu hna nih an chimnak ah cozah insurance a tlaihmi hna nih minung pakhat thlopnak ah US$ $2,340 a dih lai. Private insurance a tlaihmi hna caah minung pakhat tlopnak caah US$ 3,120 tluk an dih lai tiah an chim. Mah sii hi US ca lawng si loin vawlei pumpi tiang in kuat an timhmi a si.

Obama Nih Trump USA Ah Um Ka Zuam Ti Lo A Ti.Donald Trump nih “Kung Flu” timi biafang a hman ruangah Trump umnak USA ah um ka zuam ti lo tiah Obama nih a chim. Asean miphun pawl thleidannak biafang a si caah aipuang in a ka tuah” tiah a chim. Tuluk cozah nih Coronavirus cu US ralkap pawl nih an kan chiah tami a si tiah Tuluk cozah nih US a puh hnu in Donald Trump nih Chinese Virus timi le Kung Flu” timi biafang hi a faak deuh in a hman venak a si. Chinese Virus timi biafang cu a hram thawk ah CNN, Washington le New York Times nih a hman hmasa. Asinain President Donald Trump nih a hman ahcun miphun thleidannak a ngei tiah an puh.

Joe Biden Cu Dementia Zawtnak Ngeih Dawh Si.Rasmussen timi phu nih minung 1000 bia an halmi poll ah, democratic party in president a cuh dingmi Joe Biden cu thluak hman lo zawtnak a ngei lai tiah 40% nih an zumh. Poll an laakmi, 60% nih Dementia zawtnak a ngeih le ngeih lo hi mipi sin ah thimnak tuah hlan hrimhrim ah fiang tein a chim ding si tiah an ruah. Joe Biden hi Cognitive timi thil theih khawhnak le I chingchiah khawhnak a ngei tuk lo tiah an zumh. Biden nih tuchun ah “ka Cognition a ttum le ttum lo a herh ahcun ka chek lai” tiah a chim.

Coronavirus Virus Zawtnak US Ah A Karh.Dr.Fauci nih tuchun ah Senate biahalnak I a chimmi ah “Atu ning in zawtnak control loin a karh lengmang than ahcun nikhat ah minung 100000 tluk in an kharh than kho tiah a chim. Atu kan sining hi a dik lo, lamdang kan pial cang rua tiah a chim. State 16 cu an on hnu ah a thar in a karh than I, phih kharnak an tuah than. Atu lio hi nikhat ah zawtnak a ngei tharmi 40,000 lengmang an si. Tulio I a karh biknak state cu, Texas, Florida le Arizona ah a si. Mah ti zawtnak a karhmi hi minak ttanhmi, Black Lives Matter pawl lam zawhnak, rili kam an onmi le state cheukhat an on than hnu ah ralrinnak a tlawn caah a si lai tiah an zumh. Credit: Salai Lairamthang