ZAWTNAK HI TTIH HLAH UH, TIAH TRUMP NIH A CHIMPAH IN TEHTE A LANGHTER

COVID hi Tih Hlah U tiah Zawtnak nih a Luhhnawh Cang mi White House lei a Kir Pah in khin Trump nih a Chim. Coronavirus nih a tlunh ruang i sizung ah zaan 3 chung an ihter hnu ah Monday ah khan Trump cu sizung in a chuak than cang i, White House panh in a kir pah khin “Lengah chuak ko u, Covid hi tih hlah u” tiin American mipi sin ah a chim.

Sizung a chuahmi kong hmanthlaak in tehte langhter a duh caah ai hrukmi a Mask zong ai phoih i hman ai thla. “Na riantuantu hna le na campaign hruaitu pawl coronavirus nih a tlunh hna nak hmun White House lei na vung phaak than mi kongah na tlungthin (feeling) zeidah a lawh?”tiin journalist pakhat nih a hal i, “A tha ngaingai ko (real good)” tiin Trump nih a leh.

Washington lenglei ah a ummi ralkap sizung in White House lei a phurtu helicopter in a chuah lio ah khan cun Mask ai hruk ko rih. Asinain, White House South Portico lei kalnak dothlei a kai pah ah khin a Mask cu a poih i hman ai thla, a kut a hei zauh hna, salaam a pek hna, cun a kutpi a tunpiak (thums-up) hna.Cu hnu cun White House innchung lei ah a ke in a hei kal i, a Mask cu a angki zaal chungah a chiah peng ko rih.

Cu lio cu TV zongah a lang. Vawleicung pumpi ah minung 1 million lenglo a that i, US lawng bak ah minung 209,000 lenglo a thattu (vawleicung ram vialte lakah a thimi an tambik), COVID-19 cu Trump nih zeirello in a chiah peng ko rih.A term hnihnak peh dingin Biden he Nov. 3 US election ai cuah lio cuahmah ah Republican President Trump cu kan hnung zarh Friday ah khan Covid nih cun a tlunh i Walter Reed Medical Center ah thlup dingin an kalpi.

COVID hi vun i ukter hna lai ci. Tih hlah u. Riantuan kan i thawh than chom lai. Suul kan nam than rih lai. Covid hi vun i ukter hlah u. Lengah chuak u law, ralringte tu in um u, tiin video in bia a chimnak ah Trump nih mipi a cah hna.White House lei a kir hnu tlawmpal lawng a rauh ah khin, bawngbawng chengcheng ai tummi music cu White House lei a panh than lio video ai zeihmi ah a aw (music) ah a khum i Twitter ah turbung in a post.

Cikkhat te chungah million 1 tluk nih a video cu an zoh (view) colh.Virus a karhnak kham khawhnak dingah social distancing tuah dingin lam an hmuhsakmi hna cu Trump nih a nolhcip in a buar zungzal. Events na tuahnak hmun i mipi he hlaatpi i na um ko zongah cun hme cu Mask nai hruk peng ko rih cu, tiin Tuesday i presidential debate an tuah zaan ah khan Trump nih Biden cu a nihsawh len.

Mask Hi A Biapituk. Trump nih a taarmi a nehhnungbik (White House lei a kir hnu) a video hi Biden nih a zoh cang le zoh cang lo ai fiang rih lo. Asinain, tutan virus hi a tih a nungtukmi a si caah Mask a hruk hi a biaptukmi a si, tiin Biden nih a chim.Kan president nih a tonmi rai tha lo hi thatein tei khawh dawh dang a si caah kai lawm ngaingai. American mipi sinah a dikmi chawnpiaknak (lesson) a thlah cang nak lai ruahchannak ka ngei ko.

Mask hi a biapi hringhran, tiin Biden nih Miami i NBC News town hall ah a chim. Kum 74 a si cangmi Trump cu rai nih a tlunh hnu suimilaam 72 chung an zoh i a tak zong a linh lo caah, cun a takpum chung oxygen level zong hi punghman (normal) a si ko, tiin sizung a kainak ah a ummi thawnglatu pawl sinah Trump i a medical team nih an chim. Hi zawtnak hi President i a cuap a phan cang maw, asiloah zeitik ah khan dah President hi coronavirus in a thian (Negative) a si manh? tiin thawnglatu nih doctors pawl an hal ko hna nain an let duh hna lo.

Voihnih hrawnghrang cu President hi Oxygen an dawpter ve ko, tiin a medical team nih an chim. “Tupi (harnak) lenglei pi tiang taktak cu a chuak kho thlu rih lo zong a si kho. Monday tiang i a dirhmun amahning te hna a si, asiloah a thancho lei hna a panh, thatdeuh hna a panh ko ah cun, tupi (harnak) kan lonh dih cang, hnangam a si cang, tinak a si te la cu, tiin White House sibawi Dr. Sean P. Conley nih a chim.

Trump hi sizung chuak kho a si cang ko, tiah kannih a medical team nih cun kan zumh. White House a phaak tik zongah hin suimilaam caan hmaantein vawleicung a thabikmi siai thlopnak hmangin kan kilven ko rih lai, tiin Conley nih a chim.Trump hi zawtnak nih a tlunh le cangka khulrangtuk lehpek in caktuk in kan thlop colh caah hin, sibawi pawl hi ringthar (uncharted territory) nam ko kan lo.Trump hi a khing a rit, kum upa a si cang fawn tikah, a zawtnak hi a zualtuk te lai i, midang bangin a pumsa a hnursuantuk te lai, asiloah hi zawtnak hin a thih zong maw a thih phah te, tiin a zawtka hrawngkhan sibawi pawl an lungre a thei ngaingai.

Trump cu a zualhma taktakmi lawng an dineiter mi steroid, dexamethasone si in sibawi te nih an tlop.Kan hnung zarh i zawtnak nih a tlunh lio ah khan Trump hi sizung kal a duh lo ngai. Cu tikah sizung a phaak hnu zongah chuah rumro a duh, tiah Monday ah khan a zawtnak kong a theifiangtu source pakhat nih Reuters ah a chim. Asinain, Trump i a medical team nih an chim ve ningah cun, sibawi pawl hi sizung chuak dingin rumro in cun a kan hne hraw lo, ti a si ve.

Hi hnu ni 5 chung cu thahri ah ronhmi antiviral an ronh ko rih lai i, cun, caan zei maw zat chung cu a dang tein chiah a si lai.Trump kiangkap minung pawl Virus nih a tlunh ve hnanak thawngpang cu Monday tiang zongah an i chap chinchin ko rih. White House press secretary Kayleigh McEnany zong Positive ka si ve cang, ti a si. Mask hruk lo tein Thursday ah khan McEnany cu thawnglatu sinah biachimnak a ngei bal, ti si.

White House’s press office ah rian a tuanmi Chad Gilmartin le Karoline Leavitt zong Positive kan si ve, ti a si cang.Poll ah cun a mei lei ah a um peng ko rih. Sunday i Reuters/Ipsos poll an chuahmi ah Biden nih Trump hi 10% points bak in a hleih cang. Trump nih hin virus hi thadeuh tein rak tawlrel sehlaw cu amah zong hi zawtnak nih a tlunh hnga lo, tiin American mipi 65% nih an chim.Biden zong cu kan hnung debate hnu khan nolhcip in virus test cu an tuah ko nain, nihin tiang cu Negative a si ko rih.

Sibawi thiamsang pawl nih a him ko, an ti a si ah cun Oct. 15 i Miami i tuah te dingmi avoihnihnak debate ah tel ka duh ko, tiin Biden nih a duhnak a langhter.Oct. 15 debate ah tel a duhnak kong Trump zong nih a langhter, tiah a campaign team nih an chim.White House lei a kir than khawh cang caah, Trump campaign hi punghman tein a kal kho than kho mi a si. A zawt hlan deuh lio i ai tinhmi kha cu, US economy nunter/chanhchuah than (recovery) ai timhnak kongkau le Sumpreme Court ca i a thimmi Amy Coney Barrett namhnehpiak dingin ceihhmainak um kho seh, ti a duhnak kong chim ai tim.

Asinain, White House le Congress tiang i COVID nih artlangtlai pawl lila zong a vun tlunh hna hnu khan cun (Republican senators 3 zong Positive an si cang), Trump nih Covid-19 a tawlrel ning kongkau hi a linsami biasu ah i can than dawhdang in a um cang.Trump sizung a chuah hlan tein le, Congress ah bomhnak phaisa kongah a thar in sersiamnak a um cuahmah lio ko zongah cun Monday chung lila ah khan US stock markets biapihla deuh pawl an khar chinchin cang. Friday i Covid nih Trump tlunh hna khan cun Wall Street i biapihla Indexes pawl cu an tla ngaingai. Credit: Chelsea Bawi.

Be the first to comment

Leave a Reply

Your email address will not be published.


*