VOTE A TAMNAK HMUN AH TRUMP LE JOE BIDEN DIRHMUN AN CHIMMI

US thimnak caan cu anai pah zuahmah cang. Ni 100 hrawnghrang lawng aa duh cang tiah an chim. Campaign zong coronavirus zawtnak ruangah party pahnih hna zong duhning bantuk an tuah kho lo. US ah vote abiapi ngaingai tiah an ruahmi cu India American pawl hi an si. Hihi thimnak ah biatak tein an cawlcang tawn.

India American hna hi vote angeimi hi ting hleithum hrawnghrang an si lai tiah an ruah. Hi hna pawl hi America ah a ummi minung 26.5 lakh ah vote angeimi an si i, India American hna hi state pariat chungah a ummi an si tiah theih a si. Aliamcia thimnak ah India American hna nih Hillary kha an rak duh deuh tiah an rak tuak.

Sihmanhsehlaw state pathum chungah Trump cu biatak tein an rak dirkamh tiah an rak ti. Cutluk cun India American chungah vote hi a rak biapi mi asi i, tutan zongah India American chungah zeitlukindah vote asi te lai timi an ruahmi cu an langhter tthan. Trump le Joe Biden kongah atanglei bantukin an langhter.

India American chungah Tutan thimnak ah hin Donald Trump nak in Joe Biden hi a dirhmun attha deuh ngaingai tiah Joe Biden Campaigner asimi India America minung pakhat nih a si. Sihmanhsehlaw Donald Trump le India Prime Minister Modi hi hawikom ttha ngai an si caah Trump adirkamhmi hi an karh ngaingai tiah thawngzamhnak nih alanghter.

India American hna hi Biaknak lei ahcun Hindu an tam ngaingai. India American chungah Hindu hi 51% hrawnghrang an si i, Khrihfa hi 18% hrawnghrang an si tiah an chim. Cawnnak lei zongah hin miphun dang sinah a cungcuang ngaingai mi an si hna tiah an langhter chih. Culawng siloin an tangka hmuhmi zong a tam ngaingai.

Zapi nih kumkhat chungah tangka thongsawmnga hrawng an hmuh lio caan ah India American nih cun kumkhat ah tingkhat renglo an hmuh tiah an tuakning an langhter. Acunglei langhter cang bantukin US thimnak ah hin abiapi taktak mi an si i, hi hmun le hma hi zuamnak alutmi hna zong nih biatak ngai in rian an ttuan tiah an chim. Ref. Indiatv