TULUK PHOMHNAK DINGAH US NIH THILTUAH AN TIMH CANG

Tuluk phomhnak dingah Republican Congressman Ted Yoho nih House ah bill chuahpi a timh cang. Ted Yoho nih atimi cu Tuluk nih Taiwan a thuat asi ahcun US ralkap pawl zong cawlcangh colh asi khawhnak dingah House ah Bill chuahpi a timhnak kong a chim phuan cang. Hi konghe pehtlaiin a tanglei bangin a langhter.

US le South Korea siseh Japan hna nih hmunkhat te ah cawlcanghnak hi rampi kilven zohkhanhnak caah attha bik mi asi. Cuve rualrual in Taiwan kilven le zohkhanhnak lam ah hin US hi duhning bantukin a cawlcang lo tiah a chim chih. Republican Congressman Ted Yoho hi House Foreign Affairs Committee ah chungtel zong asi.

Culawng siloin Hong Kong Autonomy Act zongah Co-Sponsor a si rih. Henry Kissinger chan lio in US nih hin Tuluk le Taiwan karlak thilsining vialte hi biatak tein rian arak ttuan lo tiah a chim rih. Hi ruangah atubantukin Taiwan Invasion Prevention Act timi cu chuahpi a timhnak hi a si tiah langhter chih tthan rih a si.

Tutan ah chuahpi a timhmi Bill nih alanghter duh bik mi cu Tuluk nih Taiwan a tthuat asi ahcun US ralkap pawl hna rianrang in cawlcangh khawhnak dingmi Bill a si. Culawng siloin mah Bill hi an pass a si ahcun kumpi kum nga chung commander in chief nawlngeihnak hmangin Tuluk cu a thuat khawh cang lai tinak asi.

US nih hin i kilven zohkhanhnak dingah Taiwan cu hriamnam a pek i, atu ahcun Tuluk President Xi Jinping nih an kuttang ah an um khawhnak ding asi ahcun Taiwan hi thisen luannak ram asi lai tiah nawl a chuah. Taiwan nih aa kan halmi asi lo. Taiwan hi zeitikk caan paoh ah Communist China ramtthen khat asi bal lo i, a duh zong an duh bal lo tiah a chim chih.

Hi konghe pehtlaiin aliamcia mi thlachung ah khan Poll tuahmi an langhtermi cu Taiwan minung 67% hna nih Taiwanese kan si tiah an i ti i, 27.7% tu nih cun Independence kan duh tiah an ti ve tiah Republican Congressman Ted Yoho nih a chim chih. Hithil hi aliamcia kum 1994 hnu lei ah hi dirhmun hi akai bik caan asi i, 0.7% lawng nih Tuluk he ramkhat bantukin um hi an duh tiah a peh rih.