US LE TULUK THAWNGPANG A MAK LAWLAW BAK ASI CANG, SPECIAL REPORT

Pentagon nih a Cold War bombers hmangin Thazaang Thawng a Panhtukmi China cu a Hrocer.July 21 in khan Guam in US Air Force B-1B bombers pahnih cu an i thawh i, buaibainak a linhsat ngai nak South China Sea lei panh in Pacific Rilithuan lanh in an zuang. A tleu in a tleu mi raltuknak vanlawng pawl cu vanlawng phurtu USS Ronald Reagaon le a congkhaltu raltuknak tilawng pawl he naih tein Philippine Rili ah an zuang hna i raltuk an cawng.

China ah buan a comi Communist Party doh dingin le vawlei cung i chawlehnak hmunhma thabik ah ai tel ve mi South China Sea ah hmunhma ai halhmi vialte khampiak dingin Trump administration nih karhlannak a tuah caah a tu bantukin a raltuknak vanlawng le tilawng pawl an cawlcangh hi a si. Trump i a senior officials pawl nih China cu biaka in siseh, cun diplomatic phung zulh in an dironh lio ah, khat te lei kap in US Defense Department nih a ral hriamnaam mangtara pawl hmangin China rili lei cu an fuh colh ve hna.

B-1B le B-53 hi raltuk tikah ai zulkhal lengmang an si i, January tein khan South China Sea, East China Sea le Sea of Japan lei ah voi 20 lenglo tiang an vung zuang. Cu ti an vung zuannak a ruang cu ralrinpek an duh hna caah a si. China i a tilawng run le a titlang hmun le hma pawl hi US nih hin zeitik caan paoh ah a kah khawh ko, kan US aircraft carriers pawl zong thial hau theng lo khin kan duhnak ka paoh kan missile in kan kah khawh dih ko, tiin langhter an duh caah a si.

Thazaang thawn lei a panh cuahmah mi China i a ralkap thazaang cu Pentagon nih chimhhrin a duh caah, a hriamnaam lakah a thingbik le a tharbikmi pawl a kawp hna i China lei ah a thlah hna. Cold War lio i an hmanmi bombers pawl le tuchan an ser thar hriamnaam thar pawl cu an hmankawp hna. Supersonic B10B hi 1986 in khan riantuan hram ai thok i, B-52 vanlawng run hmasabik hi Kennedy chan lio in ser an si. Asinain, hi raltuknak rangtum (vanlawng) pipi nih hin hriamnaam tor le cheng ai phurh khawh. B-1B nih hin Long Range Anti-Ship Missiles zun 24 a phurh.

Hi missile hi 2018 lawngin an hman rih mi a si i, 600 km hlat tiangin a kah khawh. B-1 vanlawng pakhat te lawng hmanh nih hin tanglei ralkap nih nikhat chung i an herhhaimi hriamnaam vialte a phurh khawh dih. Cun hi vanlawng hi khulrang tein riantuanter khawh zong an si fawn, tiah Washington-based Mitchell Institude for Aerospace Studies ah dean a tuan mi le US Air Force Lieutenant General a si bal mi David Deptula nih a chim.Ral pawl an umnak zohchun in raltuknak tilawng pawl hi an kal a hau i, a caan ah cun a zarh hna an rau tawn.

Asinain, bombers pawl kan hman tikah cun, suimilaam tlawmte chungah an phan colh. Cun, US nih kan i tinhmi cu ral thawhter lo hi a si. China he ral i tuk hi ahohmanh nih kan duh mi a si lem lo, tiin Deptula nih a chim.Nuclear power ai ngeih veve mi ram hnih an i kah taktak sual ah cun a phalh a fawi ding a si lo, tiin China le western military mifimthiam pawl nih an chim.US le a ramdanghawi pawl nih Pacific Rili lei in tilawng in China cu an fuh lio ah, cunglei in US nih a bomber pawl a thlah hna mi hi China dohnak dingah cun hmual a ngei ngai ding khi a si.

US le a ramdanghawi le pawl nih hin an velcheh cio ah le vawlei pumpi ah himnak a um i, Indo-Pacific ah zalawngtein chawlehnak um kho seh, ti an duh caah a tu bantukin US Air Force nih bombers pawl a thlah i a thazaang a langhter hi a si, tiah Pacific Air Forices aiawhbiachimtunu Captian Veronica Perez nih a chim. Thil sining zohchun in South China Sea ah cawlcanghnak kan tuah. US belte cu Indo-Pacific velcheh dihlak cuul in a ralkap thazaang cu chap chin lengmang in a tu le tu a langhter cang, tiah Veronica nih a chim.

A Niambikmi Pehtlaihnak Dirhmun (LOWEST POINT). US nih a bomber pawl a thlah hnawh hna hnu in cun 1989 Tiananmen buaibainak hnu in khan a tu hi US le China karlak i khat le khat an i pehtlaihnak a tumchuk cem a si. Taiwan President Tsai Ing-wen nih a ram ah COVID-19 a control khawhmi ruangah conglomhnak pek dingin Aug. 10 ah khan US Secretary for Health Alex Azar cu a vung tlawng hna. Cu ti a tlawn hna lio bakah cun China nih Taiwan ramri lei ah a raltuknak vanlawng pawl cu kaite zit in a zitter hna.

Azar hi kum 40 chung i Taiwan a tlawngmi US official vialte lakah a nganbik a si. 2016 ri in khan tutan he cun China nih Taiwan ramri lei i a vanlawng a zuanter hi avoithumnak lawng a si. China nih US sibawi Azar Taiwan lei a tlawn hi a duh lo. Taiwan hi China ram chungah a ummi a si, cucaah kan Communist Party tangah hin Taiwan nih amah tein a ralkap thazaang ai ngeih kho lo, tiin an chim. Azar a vung tlawn hna hlan deuh tein khan, Trump top officials pawl nih China cu a phunphun in an thangchiat.

A ralkap thazaang a thawntertuk, ringthar nam lawng a rian, ramchungah politics lei in namhnulnak a tuah, ramdang an data fir lawng a rian, mi ngiatthlai lawng ai tim peng, COVID-19 kongah vawleipi sinah ralrinpeknak a tuah duh lo, tiin an thangchiat.China ralkap a si mi People’s Liberation Army (PLA) hi ralkap phungning in ralkap a simi an si lo, tiin July 23 ah khan US Scretary of State Mike Pompeo nih ceilakin a phomh hna.

PLA nih ai tinhmi cu Chinese Communist Party i lutlai pawl an nawlngeihnak dirkamhpiak le Chinese pennak kauhter hi a si, Chinese mipi kilven hi an i timhmi a si lo. Cucaah, kan Department of Defense nih cu a thalomi an i tinhnak cu kan vaivonh hna i, East le South China Sea le Taiwan Strait dihlak ah zalawngtein rili in khualtlawn khawhnak ser kan i timhnak hi a si.

China nih South China Sea an i halhmi hi phung he ai kalhmi a si, tiah Pompeo nih a chim. Bombers pawl le long-range missiles pawl kawpti in cun US nih PLA cabuai lehhnawh a timh hna. China rilitlaang fuh in a ra dingmi US Navy le a ramdanghawi pawl i an tilawng pawl kap kho dingin kum 20 lenglo chung China nih titlaang le ticung ralkap thazaang a tuah tamh ve cang. Cu ti a thazaang a thawnternak a ruangbik cu US aircraft carriers pawl doh khawh dingah le, Asia i US nih suttung bantukin ai hmanmi network vialte hrawhpiak hi a si.

July lio i South China Sea lei ah US nih a carrier 2 a kuat hna le cangka, US hi ka kah khawh ve ko dawkaw, tiin langhter a duh caah PLA nih cun aircraft carrier a kap khotu a missile DF-26 cu a hneksak colh ve. An hneksakmi missile hi medium (a laifang) range an si. Asinain, PLA Navy nih hin a thazaang a thawnter chinchin ve cang caah long-rage missile zong ai ngeih khawh zau mi a si. China nih hin vawlei cungah a nganbikmi navy ai ser. Cu navy ah cun aircraft carriers thar, raltuknak tilawng le a thawng taktakmi cruisers le destroyers an i tel.

PLA nih an i ngeihmi mangtara network bases le rilikap sakhaan pawl zong hi ral pawl nih an i tinh ngaimi a si. Ral an thawh taktak ah cun, China rilikap ah a ummi PLA Navy tilawng pawl sakhaan, asiloah rili tiang an hung phak tikah Western Pacific ah a ummi US bombers pawl nih hin a kah te hna hnga. China tilawng pawl an um te lai nak ding rilikulh pawl hi Japan in Taiwan, cun Philippine in Borneo tiangah a si.

Cun, cu rilikulh cu an chuahtak i Western Pacific lei an hung luh sual ah cun US caah kah an hung fawi deuh ngai lai, zeicahtiah WP hmun hi PLA land-based air defense le an raltuknak vanlawng nih a phak khawh lo nak hmun a si. An Ralhriamnam An I Thlau Ning (THE FIREPOWER GAP). Cold War hnu khan US nih hin rili cung raltuknak kongah ka thazaang a thawngbik, ti phun in ai laak i, chanthar hriamnaam tha a damhkhan a tlolh. A bikin long-range anti-ship missiles hi thitah in a ngeih kho lo. Asinain, a ramdanghawi, abikin Japan i a navy thazaang he fonh tik belte ah cun rili cung an thazaang hi a thawng ngaingai ko.

Cun, US bomber nih cunglei in a dirkamh hna ruang ko ah hin an thawn khun nak hi a si. Cu lawng hlah, a tu hi Pentagon nih a destroyers le cruisers tilawng pawl ah hriamnaam thar thatha bunh dingin karhlannak a tuah lio pi a si.China nih Taiwan a kah sual lai, cun South China Sea lei ah ringthar a tlak luaimai sual lai, ti phan ruangah a tu bantukin US le a ramdanghawi le nih bomber pawl tiangin an thlahhnawh hna nak hi a si khun. Cu ringthar tikulh pawl cu mi zei ram hmanh nih an i ngeih lo mi an si i, East China Sea chungah a ummi Senkaku Islands (Japan ah a ummi) le Diaoyu Islands (China lei ah a ummi) an si hna. Tokyo le Beijing nih an i ham veve mi an si.

Hi tikulh velceh ah hin buainak a chuak lelek. A tu belte cu Japan kuttang ah a um cang. China nih Senkakus tikulh vel cheh i China nih hmunhma ai halhmi hi Japan cozah zei a rel lo bia a si, tiin American le Japan nih an hmuh caah July ah khan Japan nih dirkamh dingin US ralbawi Lieutenant General Kevin Schneider nih bia a kamh hna. Hi tikulh hi kanmah China ram a si, tiin China foreign minister nih Kevin cu a vun leh colh ve. Japan, South Korea le Guam ah a ummi US sakhaan pawl Chinese missile attacks nih a kah khawh hna ding a si ah cun, lamhlannak tiang lawng i US bombers pawl chiah cu san a tlai lo ding khi a si.

Hi US bases pawl hi WWII le Korean War lio i an sakmi pawl an si caah ah, cu an sak lio ah khan cun China hi lamhla kahnak missile ai ngeih khawh rih hlan a si. Asinain, nihin ah cun ai ngeih ve cang hna. Guam i kan sakhaan pawl hi an him ti lo, ti US nih a theih tikah, April 17 ah khan US mainland lei ah thial dingin thawngthanhnak a tuah. Cu ti i Guam i US sakhaan a um ti lo hnu cun, China le North Korea cung i ngiatthlainak tuah ai harh ngaingai deuh cang. Western Pacific ah a ummi rilikulh hi cu South China Sea in nazi 5 kal lam lawng a si.

China nih a ralkap thazaang a tuahtamh khawh cu a fiang ngaingai. A tu cu lamhlapi tiang an kah khawh cang, tiin Australia i Griffith University ah ca a chimtu e Pentagon ah Australian air force Group Captian hlun a si mi Peter Layton nih a chim. Cu ti a si cang caah, US nih caan tawite chung caah tiin a bombers pawl cu Guam lei ah a hei kuat hna. US mainland i sakhaan an thialnak a chan cu, training thadeuh in pek khawh an duh hna caah a si, tiin US airpower kong research a tuahtu nih an chim. Asinain, Guam hi a him ti lo, ti an theih caah, 2026 tel in cun a thawng taktakmi missile defense system bunh dingah Congress sinah US Indo-Pacific Command, Admiral Phillip Davidson nih phaisa a hal hna.

Pentagon caah a dang thil harsa pakhat a um rih: PLA thazaang a thawn chinchin cang caah America bombers pawl hi an ning a ti deuh ziar cang hna. Cold War a dih hnu khan hi bomber pawl lawng hi 400 hrawng an si i, a tu ah cun 158 lawng an taang cang. Cu hna lakah cun, lawng 62 hi B-1B an si i, lawng 76 hi B-52S an si hna. Cun anmah nak a hme deuh mi B-2 stealth bombers thar 20 an i ngeih mi a um ve rih. Kum vui in cun B-1B lawng 17 hi dinhter an timh cang hna i, hi hnu kum 10 chungah an zaka ah B-21 bomber thar in thlen an timh cang hna. Hi B-21 hi China airspace chung lut kho dingin US nih an tuahtamhmi ralkap vanlawng a si. Northdrop Crumman nih a tu hi a hmasabik vanlawng a si lio pi a si.

Saddam Doh Lio He Cun Ai Lo Te Lai Lo (NOT LIKE FIGHTING SADDAM).Buaibainak a linhsat chinchin in cun, US bomber pawl nih cun PLA hi cu ti ngaingai cun a iap (tei) kho te ngai hnga maw hi, tiin Western airpower experts pawl an lung lawng a hring ko cang. China nih hin a air defense a tuahtamhnak hi kum 10 lengkai a si ve cang. US bombers nih hin China PLA Navy ships pawl hi pil lakin kap kho in tanglei sakhaan pawl kah duhah an airspace zong a thli tein luhhnawh kho hmanh sehlawh, a ngantuk mi le a thawngthatuk ve cangmi China ram vun tei dingah cun a fawi thiamthiam rih lo, tiin experts pawl nih an chim.

Cun China hna hi a ramri tiangin ral va tuk, timi hi a si kho lo zong a si kho men. Saddam Hussein an tuk lio bantuk hei cun ai lo ruam lai lo. Ral lian ngaingai a si. An ram hnih tein nuclear an i ngeih veve fawn. Nuclear in i kahtonh veve zong a fawite fawn. An pahnih in an sungh veve sual ah cun, zeithil dah a cang te lai?, tiin Layton nih a chim. US nih a bomber pawl thazaang pinah, China i a missile le Navy thazaang hrawh khawhnak lam dang US nih a kawlhawl cuahmah.

China navy le an ram chung hmunhma pawl kahkhawhnak tikulh chuanthluak ah US nih a long-range anti-ship le titlaang kahnak missile pawl cu US Marine pawl nih chiah, tunh dingin timhlamhnak an ngei. US Army lei zong nih cun cu rilikulh velcheh le Western Pacific ah a sakhaan pawl chiah a timh ve hna. Tu kum le hmai kum chungah US nih cuka hmun pawl ah cun raltukcawnnak biatak tein tuah ai tim. Cuka ah cun a ralkap pawl tampi chiah a timh hna.

Ral a thawh tikah China tilawng le a dangdang an sakhaan pawl kah khawhnak dingah, tiin US nih cun pineline ngan pipi chungah an hriamnaam cu an khumh cang hna. Long-range hypersonic missile hi kan ser lio pi a si i, test kan tuah cang le a tha ngaingai, tiin US Army’s top commander General James McConville nih July ah khan a chim. Kan ralkap pawl nih kan ral hna an tilawng kah khawhnak hriamnaam nan i ngeih kho cang lai.

Tilawng pil lakin a kap khotu mid-range missile kan i ngeih chom cang lai, tiin McConville nih a chim. US le a ramdanghawi le hna cu an thohhlansi (surveillance) system le an hriamnaam vialte hmanti dingin hnatlaknak an ngei cang hna i, an ral (China) an hlathlai tik i a herhmi thawngpang vialte cu radar station, statellites, rilicung tilawng, submarines, raltuknak vanlawng le ke ralkap pawl karlak ah i thanh khawh cio dingin timhlamhnak an ngei. Stealth fighters pawl cu carriers in an i thawh lai i, rili ah a kalmi ral tilawng pawl an sining a zoh hna lai i, ke ralkap pawl sinah thawngpang a hei thanh chin te hna lai i, cu hna pawl nih cun anti-ship missile in ral tilawng cu an hun kah ding khi a si.

May 21 ah khan US B-1B bombers pahnih cun Guam in an i thawh i, Japan ram Misawa Air Base pawng tiangin an vung zuang. Cu ka hmun ah cun P-8 Poseidon vanlawng le USS Ronald Reagan carrier he a long-range anti-ship missile training an vung tuah. Tutan raltuk an cawnmi nih hin zeidah a langhter tiah cun, US nih hin zeitik caan paoh ah zeika hmun paoh ah a duhnak paoh a missile in a kah khawh, ti a langhter, tiin Perez nih a chim. Tutan raltuk an cawnnak ah hin tilawng le vanlawng pawl cu an theihmi thawngpang tete khat le khat an vun i hrawm kho i, cu ti cun raltuktinak thawnter nawl an cawng hna. Cun, US bombers pawl cu US, Japan le South Korea fighters pawl he raltuk an cawngti than rih.

CHINESE AIRSPACE.A tu bantuk i khat le khat tangti in thawngpang theihmi zong i hrawmti in ral an tuk khawh taktak ko a si ah cun, Pentagon raltu rangtum tar (old warhorse) pawl hi ral pawl caah cun tihnung taktak an si ko rih lai. Cold War lio i an hmanmi US bombers pawl hi an zuam a cah lawng si lo in lamhlapi tiang an a zuang kho mi an si caah, China targets pawl hi a kaakip in an fuh khawh lai i, missile defense system nih thitha in a ven khawh lo mi missiles pawl in China tilawng pawl cu a kah khawh hna lai. Cun, Washington nih pipeline chungah a thuh rih mi lamhla taktak a kap khomi missile nih cun China air defense system nih a phaak khawh lo nak hmun in khin a vun kah te hna lai.

Cun, hi bombers pawl nih hin rili cungah siseh, rilitlang sakhaan lam le suul pawl phih, hrawh dingah computer in control mi bomb pawl a kah khawh fawn rih. Cun, B-1B hei ti bantuk a hlunmi bomber pawl nak hmanh in hin, B-2 stealth bombers hi cu air defense system in thitah in radar in a tlaih khawh lo caah China targets pawl hi hmualngei ngai in a kah khawh deuh rih hna lai. Hi B-2 pawl nih hin tinhnak a nganh a nganh kho lo mi bomb pawl ai phurh tung hna i, Long Range Anti-Ship Missile zong phurh kho dirhmun ai ngeih thiamthiam.

B-1B bombers pawl hi US in ai thawh hnga i, lampi ah zinaan ai rawn pah lai i, nazi 15 chungah Western Pacific hi a phak khawh te lai. Hawaii in ai thawh a si ah cun nazi 9 hrawng lawng a rau hnga. Northern Australia in ai thawh le bangah cun a nai chinchin hnga i, zinaan rawn hau lo tein nazi 6 chungah a phan ko hnga. Northern Territory ah a ummi Tindal i kan air base hmunhmapi tuahtamhnak dingah $814 million ka hman lai, tiah Febuary ah khan Australia cozah nih thawng a thanh.

Cu ti tuahtamh a duhnak a ruangbik cu, US Air Force pawl zalong tein cawlcang kho hna seh, ti a duh caah a si. US bombers pawl nih cu hmun cu an hman cuahmah ko cang. B-1B bomber hi nuclear bomb thlatu ah hman a rak si. Asinain, cu a rian cu an ngolter diam cang. A tu i ai phurhmi bomb hi cu computer in control mi le control lo mi, 75,000 a ritmi bomb an si. Hi vanlawng hi US vanlawng vialte lakah thilri a phur tambik a si. 9/11 hnu i US ralkap raltuk ai thawh hnu khan cun hi bombers pawl hi rian an tuan huaha ti lo.

Kum 20 deng a si cang la cu. China hi mi dironh kho a si ve cang hi teh, tiin Pentagon nih a hmuh hnu cun, ral pawl tilawng kaptu dingah, tiin US nih B-1B cu biatakthlak in hman a thok than cang hna. Hmailei ah cun, hypersonic missile thar pawl le Air-Launched Rapid Response Weapon pawl (a tu hi an test lio pi a si), cun long-range cruise missile thar thatha pawl kan phurhter te lai, tiah US Air Force commanders pawl nih an chim.

Aw nakin a let 5 cak in a tlimi hypersonic missile hi fawitein a nehnang dawi (detect) tuah khawh a si te lai lo. B-52 le bang hi cu B-1B pawl nakin a hlun deuh mi an si. Annih hi 1950 hrawng i an hmanmi an si. B-1B nakin a thil phurhmi zong a tlawm. Cold War chan lio i hmanmi Harpoon anti-ship missile 14 ai phurh khawh ve. Hmailei belte ah cun, Long Rang Anti-Ship Missiles zun 20 phurh khawhter an i tim.

B-2 bangin B-52 zong hi nuclear missile a phur kho ve thiamthiam. Bomber hlun pawl hi US air power caah an tangkai ngai rih ko nain, hi hnu kum 10 ah khin cun B-21 tu hi hmual an ngei deuh te ding a si. Hi B-21 bomber thar pawl hi thatein a program an tuahtamh lio pi a si. An tuahtamh ning zoh tikah, that chinchin a panh, ti hi a fiang, tiah Deptula nih a chim. Credit: Chelsea Bawi

Be the first to comment

Leave a Reply

Your email address will not be published.


*