US CAAH TTIHNUNG TAKTAK MI FBI NIH AN PHUAN CANG

US caah ttihnung bik mi thil cu FBI nih an phuan cang. FBI nih an timi US caah ttihnung a simi cu Tuluk hi an si tiah an thanh. Hi konghe pehtlaiin FBI director nih a chimmi cu US caah ttihnung bik mi cu Tuluk ram hi an si i, Tuluk hi US caah cun thinphang le ttihnung peng an si thai ko cang lai tiah a chim.

Tuluk nih hin zeibantuk hriamnam paoh hmangin vawlei cung ramtthawng bik si dingin alam kip bak in rian a ttuan cuahmah tiah FBI Director Christopher Wray nih a chim.Tuluk nih hin vawlei cung ramdang dang ah anmah Tuluk minung thiamsang hna cu an ramchung ah kirtthan dingin a lem cuahmah hna i, Coronavirus dottletnak lei zongah US hi a zuamcawh taktak tiah a peh rih.

Tuluk rian ttuannak hi akau tuk hringhran i, chaw leh chawhrawl nak siseh, ngiatthlainak lei zongah siseh miram ramdang hna thiamnak fir lei zongah siseh, ramdang tangka man angeihnak kongah thlennawn ah siseh alamkip aa thlak kho dih. Suimilam 10 chung vialte hi FBI nih Tuluk ngiatthlainak lei ah a tuahmi zohtthannak case hi pakhat tuah piak lengmang bantuk asi tiah a chim.

Hi konghe pehtlaiin mifim thiam tampi hna nih an chim lengmang mi cu Tuluk nih US hi a lamkip a zuamcawh lengmang i, biatak tein US nih tei a rial lo i, aa thlahdah asi ahcun US dirhmun le sining hna hi Tuluk a khumh te lai tiah an ti. Theih cio bangin US le Tuluk karlak ah zuamcawhnak tampi a um lengmang cang.

Naihrawng hrang Tuluk le US karlak ah thawngpang a linsa ngaingai. Coronavirus zawtnak a chuah hnu in cun rampi pahnih karlak ah pakhat le pakhat bia raldohnak a chuak leng mang. Culawng siloin a tu hi ram hnih karlak ah hriamnam lei zongin tthit pheihnak an tuah rih. Tutan zongah US ral nganbik cu Tuluk an si tiah FBI nih an vun phuan tthan.