UPDATE, HAKHA INN KANGHNAK KONG THAWNGPANG FIANG

Update News. Hakha Khuathar ah heater mei in inn thum a kaang, inn hlangtu U Than Wai a kanghchih. 2021 January 9 zaan 11:00 hrawng ah heater (electric meitohnak) in aa thok i inn thum a kaang, innhlangtu Seven Star kedan dawr ngeitu, Kala miphun U Than Wai a kanghchih, tiah kan theih.Hi inn thum a kaang mi ah hin inn 2 cu Pu Kio Ling inn a si i inn khat cu Pu Hniang Hmung inn a si.

Image may contain: night and fire

Caanphio in sak mi inn a si, tiah kan theih.Zaan 11:00 hrawng ah zeitin mei aa thok ti hngalh loin a kaang i Meithat Zung motor nih suimilaam 12:30 hrawng ah an hmih khawh. A thi mi pa hi Seven Star kedan dawr ngeitu a si i a nupi le fale cu Thantlang an tlawn lio a si. An inn ah hin kedan pawl chiahnak kudawng zong an ngei. A ruak hi mei an hmih khawh hnu lawng ah kan hmuh,” tiah inn ngeitu Pu Kio Ling upa Pu Ngun Ling nih The Hakha Times ah a chim.

Image may contain: night, fire, outdoor and nature

Hi kong ah Hakha Peng Meithat Zung lutlai Pu Thian Nuam Maung nih, “Inn cu ciam dih ko. Inn kangh aa thoknak hi heater ti mi electric meitohnak in aa thok mi a si. Thilri a ciam mi hi kanmah nih a tlangpi in kan tuak ning ahcun tangka Ks. 924,000 hrawng a si. Meithat motor 3, ti phur motor 2, Penguk Zung motor 2 le Ambulance 1 tiin kan zuanhnawh,” tiah The Hakha Times ah a chim.

Inn thum a kaang mi chung ah hin inn khat cu a lawng mi a si. Inn khat ah chungkhar 7 an um nain an chuak manh. U Than Wai tu cu mei an hmih khawh dih hnu lawng ah a ruak an hmuh. 2021 kum ah tutan inn kaang hi Hakha khuachung ah a voi khatnak a si, tiah kan theih. Biakilh: Credit pe loin copy paste kan sianglo. Credit: The Hakha Times

Be the first to comment

Leave a Reply

Your email address will not be published.


*