UAR A UM BAK HIH, JOE BIDEN NIH FIANG TAKTAK IN APHUAN CANG

Donald Trump dirhmun cu achia chin lengmang ko cang. Michigan nawlngeitu hna nih Joe Biden cu teitu a si tiah fehternak an tuah. Cun Pennsylvania zong nih Joe Biden cu teitu asi tiah fehternak an tuah tthan cang. Trump legal Team hna cu an lunglawng amit ko cang ti asi. Joe Biden cu General Services Administration nih cozah thar dirhnak dingah nawl apek.

Curuang ah Joe Biden nih a cabinet minister ding hna cu athim cuahmah cang hna. Culawng siloin Joe Biden cu US cozah biathli vialte zong theih khawhnak nawl angei cang. Aharh dingmi tangka zong hmannak nawl an pek rih cang. Hi konghe pehtlaiin Joe Biden cu Wilmington, Delaware ah biachimnak angei. Cu ah a chimmi cu a tanglei bangin hin an si.

America ram hi hnu afual ding asi lo, Vawleipi hruai dingah timhcia asi cang, Abiapi bik mi cu America ram sipuaizi a rawk cuahmah mi thanchoter ding siseh zawtnak tlangrai pi dohkham ding le khuacaan thlennak kongah rian biatak tein ttuan colh hi abiapi taktak mi asi tiah a chim. Zawtnak ruangah US ah a thimi hi 259,000 an si cang i, zawtnak angeimi hi 12.6 million an phan.

US President elect Joe Biden nih abawmtu dingah athimmi hna cu Secretary of state ah Antony Blinken athim i, Climate change envoy ah John Kerry athim, Cun Director of national intelligence ah Avril Haines athim i, Secretary of homeland security ah Alejandro Mayorkas athim. White House National security adviser ah Jake Sullivan athim i, UN ambassador dingah Linda Thomas-Greenfield athim.

Relchih:US Senate, Trump Le Biden Kong Tawi. President Trump nih sunghkhan a duh rih lo. A nun chungah Biden nih a ka tei ti hi chim aa tim lo ti a fiang. President an i cuh tikah November 3 zan khin cun result a fiang cang. A sungmi nih a teitu kha phone an chonh i ka sung. Na ka tei caah kan lawmh pi. Kan hruai tiah a ti tawn. Asinain Trump le Biden zawn ahcun aa phun dang. Result zong November 3 zan ah a chuak kho lo; vote thlakning a hmaan lo tuk caah Trump zong sungh a khaang kho lo.

Na ka tei ti zong a chim duh lo; conglawmh bia zong a chim duh lo. Sau ngai a rauh hnu state zeimawzat nih Biden tei in fehternak an vun tuah thluahmah cang ca le hruaitu thlennak le Inn Raang chuah le luhnak caan a naih chin lengmang cang caah mipi le ram zawnruah ah Trump nih a kianh.Hitihin a tial: “Official tein nawlngaihnak thlennak tuah ding in ka riantuantu pawl cu Biden team sinah theihter ding in nawl ka pek cang hna” tiah Trump nih a tial. Sungh a khan a si hrim lo. Sungh cu a cohlang kho lo nain vote ning in kal a hauh cang caah caan karlak cu a lung a thumh bia tu khi a si. Asinain Trump a pehmi cu “thil hmaan taktak kan theih hlan cu kan doh lai i kan tei hrim lai” tiah a tial chih.

January 20 tiang ah Trump team leiin zeihmanh tuah khawhmi a um lo ahcun Biden cu US president a si cang lai. Inn Raang a chuah hnu zong in a legal team le a support tu hna bawm in an fight peng lai tiah ka zumh. Cun Congress i House le Senate zong hi Democrats nih majority tlaih dawh an si. Tuan deuh zong ah khan House cu Democrats majority an si i, atu zong an si than. Senate hi tu lio an dirhmun ahcun 50-48 an si.Republican majority a si, nain Januar 5 ah Georgia ah senate thutnak pahnih cuhnak a um lai. Republican nih a pahnih in an tlaih i Democrats pahnih nih an cuh hna. D nih a pahnih in an lak ahcun 50-50 veve an si lai.

An vote aa tluk poah ah VP Kamala Haris nih a hruai hna lai caah 50-51 in D hoih in vote a tlu lengmang lai. Cucaah atu hi Republican upa lungre a thei. Fak taktak in an i cuh lio si.D lei nih tangka a tomtom in an vorh chin lengmang ti si. D hi inn pathum ning in hruaitu an si ahcun conservative pawl cu hngawng lengmang an si ko lai. Cun Biden zong hi ruahnak leng in a tha deuh kho men. Obama he in kan zoh ti lengmang tikah a thatnak hmuh khawh a rak si lo. Asinain riantuantu upa pawl a vun thimmi hna hi ruah ding tete an um.Secretary of state a thimmi kha Jew mipa Antony Blinken a si.

Tuan deuh ah khan Obama nih minak nu Susan Rice kha secretary of state caah a halpiak. A cohlanpiak lo. Cun khatlei in Congress nungak pawl a hleiin Palestinian nu Rashida Tlaib hna kha cu a zai tuk. Jew miphun a thimmi kha a lungtling lo tuk. Ruah awk a ummi cu Biden hi Obama a si lo ti hi a vun lang pah tiah ka ruah.A fanu pasal hi Jew miphun a si fawn.Asinain Ivanka Trump khi cu a pasal zumhnak aa hrawm i, Biden fanu tu cu a pasal zumhnak aa hrawm lo. Israel ram caah cun a tha lai ka zumh.Biden a si ve caah Biden cozah a si cang lai i zoh awk cu a um len ve te kho men. Amah tu cu Trump he cun ram chung a siah ram leng a siah an policy an i lo lai lo. A hleiin ramleng kong. Credit: Luther Tinhre

Be the first to comment

Leave a Reply

Your email address will not be published.


*